Isaako ma le Malumalu
E alala le tusitala i Colorato, ISA.
Sa osooso Isaako i luga ma lalo o lona nofoa. Sa tilotilo atu o ia i fafo o le faamalama o le taavale. Sa latou o e asiasi ia Tamamatua ma Tinamatua. Sa latou o foi e vaai se isi mea faapitoa.
“O afea o le a tatou vaai ai i le malumalu fou?” Sa fesili ai Isaako ia Tina.
“Taeao,” na ia fai ane ai.
Sa ataata Isaako.
Na oo ina taunuu Isaako ma lona aiga i le fale o Tamamatua ma Tinamatua.
O le taeao na sosoo ai, sa fai ai ofu o Isaako o le Aso Sa. Sa foliga malie le fai o lona fusiua i le ogatotonu o le vaiaso. Sa fai le tausamiga a Isaako ma lona aiga i le taeao. Ona latou o ai lea i le tatalaga o le malumalu mo maimoaga. Sa latou o e matamata i totonu o le malumalu fou a o lei faapaiaina.
“Ua ou iloa atu le malumalu!” Sa fai mai ai Isaako. Sa tusi atu lona lima i le maota paepae ma le agelu o Moronae i lona tumutumu.
Sa i ai se fale o le Lotu i autafa o le malumalu. Sa o muamua Isaako ma lona aiga iina. Sa latou matamata ai i se vitio. Sa fesoasoani se tasi e faamaulu ni ufiufi i luga o o latou seevae.
Na oo i le taimi e o ai i totonu o le malumalu! Sa savali atu Isaako i faitotoa o le malumalu. Sa lagona le fiafia o lona loto.
Sa vaai Isaako i le tele o atavali i luga o puipui. O nisi o ata sa faaalia ai tagata o loo tatalo. O nisi atavali sa faaalia ai ni laau ma manu matagofie.
Ona vaaia lea e Isaako o se atavali sa sili ona ia fiafia i ai i lo ata uma. O se atavali o Iesu! Sa tu Iesu ma Ona aao o loo faaloaloa.
“E foliga mai o loo faamafola mai e Iesu Ona aao ia te au,” na musumusu ane ai Isaako i lona Tama.
“O Iesu e fofola mai lava e le aunoa Ona aao mo oe” sa toe musumusu atu ai Tama. “E alofa o Ia ia i tatou taitoatasi.”
Sa i ai se faalogoga lelei o Isaako i lona loto. Sa mafaufau faapea o la e savali o ia i autafa o Iesu i totonu o le malumalu. Sa ia mafaufau o la e opo atu e Iesu o ia.
E alofa Iesu ia Isaako. E alofa foi Isaako ia Iesu! ●