O Se Ipu Vai Mafanafana
E alaala le tusitala i Seoul, Korea i Saute.
O le vai i le vaipapatiso sa malulu pei o le aisa. Ona oso ae lea o se manatu ia Minjun.
Sa faanatinati atu Minjun ma lona Tama i le fale Lotu, ma sa agi mai i o la’ua tua le matagi malulu. Sa matuai malulu foi totonu o le fale. Sa faamoemoe Minjun o le a mafanafana atili pe a potopoto atu ni tagata e toatele.
O le uo a Minjun, o Jungmin e papatiso i le asō. Sa feiloai Jungmin ma faifeautalai tamaitai ma sa mafaufau ai mo se taimi umi e papatiso. Sa anapopogi ma taalo le uarota atoa mo ia. Na iu ina filifili o ia e papatiso. Ma o le asō, o le aso lea!
O la sa tau faatumu le vaipapatiso i le taimi na savavali atu ai Minjun ma Tama i totonu o le potu. Sa la saofafai i autafa o le uo a Minjun o James. E lei leva ae savali atu i totonu Jungmin, o loo ofu ona ofu papae mo le papatisoga.
“Sa fai si ona popole teisi,” na fai ane ai James.
Sa lue atu le ulu o Minjun. Na fiafia o ia ona sa mafai ona i ai iinei mo lana uo.
E lei leva ae tumu le vaipapatiso. Ua oo i le taimi e amata ai le papatisoga! Ae nai lo le amataina, sa talanoa ia faifeautalai ma ni isi o le au paia, ma sa foliga popole. Sa alu atu Tama e vaai po o le a le mea na faaletonu.
“O le a le mea ua tupu?” Na fesili ai Minjun ia Tama.
“Ua gau le masini o le vaivevela o le fale, o lea ua matuai malulu ai lava le vai o le vaipapatiso,” na fai mai ai Tama.
Sa tilotilo atu Minjun i le vaipapatiso. I lona papatisoga, sa mafanafana le tau, mafanafana le vai, e oo lava i le fusi mafanafana a lona tamā ina ua ia sau i fafo mai le vai. Sa le mafai ona ia mafaufau i le papatisoina i le vai malulu i se aso o le taumalulu.
Sa matau atu e Minjun ia Jungmin o laa ifo ma le lototoa i totonu o le vai, faatasi ai ma Elder Keck, o lē o le a papatisoina o ia.
“Ua fai lava si malulu tele!” Fai mai ai Jungmin. “E le mafai ona toe umi atu se taimi ou te tu ai ii.” Sa ia toe a’ea’e ane i luga o le vaipapatiso, ma le tetete. Sa lagona e Minjun le faanoanoa mo ia.
I ni nai minute mulimuli ane, na toe taumafai ai Jungmin e alu i totonu o le vai. O le taimi lea sa na o ni nai laa iti lava ae toe faatopetope ese mai i fafo. Sa ia toe taumafai mo nisi taimi se lua. Sa matua maatiati le malulu o le vai! “E mafai ona taofi?” Sa fesili atu ai Jungmin. “Sa foliga mai o le a tagi o ia.
Sa faia e Minjun se tatalo le leoa e ole atu ai pe mafai faapefea ona ia fesoasoani.
“O le a se mea e tatau ona tatou faia?” sa fai mai ai se tasi.
“Pe tatau ona tolopo le papatisoga?” sa fesili ane ai se isi tagata. Sa mananao tagata uma e fesoasoani ia Jungmin, ae sa latou le iloa pe faapefea.
Ona oso ae lea o se manatu ia Minjun. Sa ia eueu atu James. “Ta o, James!”
Sa o Minjun ma James i le umukuka. Sa la mauaina se iputi lapoa ma se pesini ma sa faatutumu i le vaivevela mai le masini o le vaivevela. Sa la aveina ma le faaeteete i le falesa ma asu atu le vaivevela i le vaipapatiso. “Atonu o le a fesoasoani lea e faamafanafana ai le vai!” Na fai mai ai Minjun.
Sa ofo tagata uma. “Aisea na tatou le mafaufau ai i lena mea?” sa fesili ai se tasi.
Sa latou amata ona taufai faaopoopo atu le vai mafanafana mai le umukuka. Sa tunuina e nisi tagata le vaivevela i le ogaumu. O isi sa latou aveina ma le faaeteete ia ulo agai atu i le faapaologa ma liligi i totonu o le vaipapatiso. E oo foi i isi tamaiti o le Peraimeri sa fesoasoani, e tasi le ipu vai i le taimi.
Na iu lava ina lava le mafanafana o le vai. Sa laalaa ifo Jungmin ma Elder Keck i lalo o le vaipapatiso. Sa lagonaina e Minjun le mafanafana i lona loto a o faalogo atu ia Elder Keck o fai ia upu o le tatalo o le papatisoga. Ina ua alu ae Jungmin mai le vai, sa ataata o ia. Sa fiafia tagata uma.
Ina ua uma ona sui ia Jungmin i ona ofu mago, sa tuuina atu e Minjun ia te ia se opo tele. Sa iloa e Minjun o soo se taimi lava e tatalo ai ma le lototoa, e fesoasoani mai lava le Tama Faalelagi ia te ia ia iloa le mea e fai. O le papatisoga lenei o se tasi lea o le a le galo lava ia Minjun. ●