Las Toktok
Testemoni mo Fasin blong Jenisim Laef
I Kam long Elda David A. Bednar
Blong Kworom blong Olgeta Twelef Aposol
I kamaot long wan toktok blong jeneral konfrens blong Oktoba 2012.
Wan impoten lesen abaot testemoni mo fasin blong jenisim laef i go tugeta mo i impoten long ol misinari wok blong ol boe blong Mosaea.
“Olgeta we oli tekem olgeta blong kam save long saed blong trutok, tru long ol prijing blong Amon mo ol brata blong hem, folem spirit blong revelesen, mo blong profesi, mo paoa blong God we i stap mekem ol merikel long olgeta—yes, … olsem we Lod i stap laef, olgeta long Ol Man blong Leman we oli bin biliv long ol prijing blong olgeta, mo oli jenisim laef blong olgeta long Lod, oli neva foldaon i go lus.
“From oli bin kam wan stret mo gud pipol; oli bin putum daon ol tul blong faet blong olgeta, oli no faet agensem God bakegen. …
“Nao, hemia i olgeta we oli jenisim laef blong olgeta long Lod” (Alma 23:6–8).
I gat tufala bigfala samting we oli tokbaot long ol ves ia: (1) save long trutok, we yu save talem se i testemoni, mo (2) jenisim laef i go long Lod, we mi andastanem se hem i taem yumi tanem yumi i go long Sevya mo gospel blong Hem. Long wei ia nao, taem yu joenem tugeta, testemoni mo jenisim laef i go long Lod, i mekem yu yu stap strong mo yu stanap strong mo no muvmuv mo yu gat proteksen long saed blong spirit.
Wan testemoni i wan save long saed blong spirit long trutok we yumi kasem tru long paoa blong Tabu Spirit. Fasin blong stap gohed blong jenisim laef i wan strong divosen long trutok we yumi bin kasem—wetem wan hat i glad blong mekem mo blong ol stret mo gud risen. Blong stap save se gospel i tru i laef blong wan testemoni Blong stap tru oltaem long gospel i laef blong fasin blong jenisim laef. Yumi mas save se gospel i tru mo stap tru long gospel.
Blong putum “ol tul blong faet’ we yumi laekem tumas long saed, olsem fasin blong stap selfis, hae tingting, mo fasin blong no stap obei, i nidim moa bitim fasin blong stap biliv mo save samting nomo. Wanem i kam fastaem long hemia i, strong tingting we i winim evri samting, fasin blong putum tingting i stap daon, fasin blong sakem sin, mo save lisin; evri samting ia i kam fastaem long fasin blong lego ‘ol tul blong faet’ blong yumi. ?Yu mo mi i gat ol tul blong faet we i holemtaet yumi yet blong jenisim yumi i go long Lod? Sapos yes, yumi nid blong sakem sin naoia.
Mi promes se taem yumi kam long wan save blong trutok mo stap konvet i go long Lod, bae yumi stap strong mo no muvmuv, mo no save foldaon.”