Stap Jusum Rod Ia We I Stret Mo No Isi Bitim Isi Rod
I Kam long Elda Takashi Wada
Blong Olgeta Seventi
I bin gat tu rod long fored blong mi, mo mi save se i gat wan wei ia nomo blong save wijwan blong tekem.
Ol pikja foto i kam long Chris Ede
Mi bin groap long Nagano, Japan, wetem papa mo mama blong mi. Relijin i wan pat blong evri samting we famli blong mi i mekem. Papa blong mi i nildaon long fored blong olta blong Budis evri moning mo naet. Mi no bin tingting long Budis olsem wan relijin—hem i wan wei blong laef. Bae hem i isi long mi blong gohed stap wan Budis blong ful laef blong mi, be God i bin pruvum long mi fulap taem se isi o popula wei, oltaem i no bes wei.
?Teks Buk o Tabu Buk?
Olsem wan yangfala boe, mi fesem hadtaem fulap wetem aedentiti blong mi. Mi stap tingting long miwan from wanem mi stap long wol ia mo huia mi mas kam olsem. Taem mi gat samples long 13 yia, prinsipol blong skul blong mi i givim long evri studen wan kopi blong Niu Testeman long Inglis mo lanwis Japan we i stap saed saed long tufala. “Hem i no blong ol stamba tingting blong relijin,” hem i talem. “Hem i wan translesen we i gud tumas, so yusum blong stadi Inglis.” Be taem mi openem, hem i givim ol skripja blong taem we yu filim se yuwan, nidim ol ansa long ol kwestin blong yu, o stap fesem hadtaem. !Mi save andastanem ol situesen ia!
Mi bin ridim abaot Jisas Kraes. “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.” (Matiu 11:28). “Karem kros [blong hem], [mo] biaen long mi” (Matiu 16:24). Ol toktok ia i gohed blong saon long mi nomata we mi no bin andastanem olgeta fulwan. Mi tingting long miwan huia Jisas Kraes mo i minim wanem blong gat Hem olsem wan Sevya. Mi tingting long miwan sapos i miwan nomo we i stap filim koneksen ia long wanem we i sapos blong stap olsem wan teks buk.
?Ronwe o Stap mo Lisin?
Sam yia afta, mi bin mitim sam misinari blong fas taem. Papa mo mama blong mi i bin wonem mi abaot ol yang Kristin we oli stap go raon mo prij. Taem mi stap wokbaot i gobak long haos, wan tol Ameriken misinari i stopem mi wetem wan kaen smael. Mi no save stret wanem blong mekem. Mi fraet se bae hem i tokbaot jos blong hem. Sapos hem i bin mekem, !maet bae mi ronwe long nara rod! Hem i askem nomo olsem wanem blong faenem post ofis. Mi bin talem long hem mo afta wokbaot i gobak long haos.
Taem mi stap wokbaot i go, mi filim wan samting. Sapos mi luk ol misinari bakegen, mi tingting long miwan, bae mi toktok wetem olgeta.
I no longtaem afta long hemia, mi fas long sam nara misinari. Mi bin sek se God bae i harem mo ansa long ol prea blong wan boe olsem mi, kasem taem mi bin ridim abaot Josef Smit. Mi bin ridim long Niu Testeman blong prea oltaem, ?be God blong i kamaot long wan man? Mi filim hat se hem i tugeta posibol mo stret. Mi no bin ronwe be mi putum wan apoenmen blong oli kam tijim mi.
?Mekem Ol Eskius o Faenemaot Trutok?
Afta wan manis we mi stap luk ol misinari, oli bin invaetem mi blong kasem baptaes. Mi no bin wantem blong mekem olgeta i no glad, be mi tingting tu blong lego kastom blong papa mo mama blong mi mo evriwan raon long mi. I gat tu rod long fored blong mi, mo mi save se i gat wan wei mo wei ia nomo blong save wij wan blong tekem—mi mas prea olsem Josef Smit. Mi bin askem long Papa long Heven long nem blong Jisas Kraes, sapos ol samting we ol misinari i bin stap tijim long mi oli tru.
Ples ia nao i jenisim evri samting long mi. Stat long taem ia i go,mi save blong miwan se gospel ia we i kambak hem i tru. I no gat wan i save tekemaot save ia long mi. Mi bin save wij rod blong folem, mo i no gat samting i save jenisim hemia.
Mi bin gat fulap kwestin taem we mi yang moa. Mi bin lanem se mi wan pikinini blong God, Hem i lavem mi, Hem i gat wan plan blong mi, mo Hem i wantem blong ansarem ol prea blong mi. Save ia i bin jenisim ful lukluk blong mi long laef. Mi bin lanem huia mi mo wanem mi mekem i impoten.
?Go Wetem Evriwan o Stanap Miwan?
Bifo we mi bin lanem se mi wan pikinini blong God, mi bin wantem go wetem evri man. Mi fraet blong stap stanap miwan. Be afta mi lanem se mi wan pikinini blong God, mo mi kam blong luksave mi save stanap miwan; mi save defren.
Blong stap prea mo luksave se mi wan boe blong God i givim mi strong tingting blong eksplenem ol filing blong mo long papa mo mama blong mi, be tufala i no andastanem gud tumas. Oli ting se mi stap go agens mo mi smol tumas blong mekem desisen ia blong kasem baptaes. Oli bin sem se boe blong tufala i stap folem wan relijin we oli no save tumas long hem mo i no ol kastom blong olgeta. Mi bin save huia mi mo wanem mi wantem, be tu, mi bin wantem blong givim ona long papa mo mama blong mi mo hop se bae tufala i givim ona long relijin blong mi.
?Givim Ona long Papa mo Mama blong Mi o Tanem Baksaed long Ol Wari blong Olgeta?
Mi eksplenem situesen blong mi long ol sista misinari. Oli bin gat wan aedia—bae oli kam blong toktok long papa mo mama blong mi mekem se bae oli filim moa gud abaot relijin ia. Mi talem long olgeta se mi fraet se nogud bae papa mo mama blong mi oli no wantem toktok long olgeta. Afta, wan long ol sista i givim tingting se bae mifala i lego kakae tugeta.
Taem mi no bin kakae brekfas, mama blong mi i bin wari. “?From wanem yu no kakae?” hem i askem. Mi eksplenem se mi stap lego kakae, mo hemia i mekem hem i wari moa.
“Faswan, yu stap go long wan relijin we yumi no save tumas long hem, mo afta naoia yu no stap kakae. Mi mi wari. !Mi sek ia! Bae mi ringim ol misinari ia.”
Hem i ringim ol sista, mo long sam wei, !oli invaetem tufala i kam long haos blong mifala blong kakae tugeta!
Mifala i bin gat wan gudfala taem. Ol misinari oli tijim papa mo mama blong mi hym ia “Mi Pikinini blong God” (STSP, pej 58), mo mifala i singsing long hem tugeta. Papa blong mi i bin laekem tumas. Afta long dina wetem ol sista, papa mo mama blong i no wari abaot mi blong stap go long jos. Mo mi filim se mi save givim ona long tufala taem mi stap laef folem gospel from hem i kavremap evri samting we oli bin tijim long mi. Mi bin tingting se sapos mi lavem olgeta longtaem inaf mo tritim olgeta kaen inaf, bae long en bae oli andastanem. I tekem mi 35 yia afta long baptaes blong mi, be mama blong mi i bin baptaes mo !go tru long tempol sam yia i pas nomo!
Blong save se mi mi wan pikinini blong God i bin gat paoa long fulap desisen blong laef blong mi. Mi save tu se taem yumi folem Spirit mo mekem wanem Papa long Heven i askem yumi blong mekem, iven taem i luk se i had, Hem bae i blesem yumi. Hemia i oltaem bes joes.