Ignatius mo Adelaide Baidoo

Akra, Gana

Pikja

Baidoo family reading scriptures together

Ignatius mo Adelaide i bin luk olsem wanem Jos litresi program mo stap lanem gospel long hom olsem senta we oli tokbaot bigwan, i bin blesem ol memba blong stek mo famli blong olgeta.

Christina Smith, man blong tekem foto

Ignatius:

Mi bin kam pat blong gospel litresi program ia olsem wan memba blong stek presidensi. Mi bin visitim wan klas mo luksave hem i no blong olgeta we oli no save rid mo raet nomo. Hem i blong yumi evriwan blong save andastanem moa gospel blong Jisas Kraes.

Adelaide:

Mi save fulap sista long wod blong mifala we gospel litresi klas i bin helpem olgeta. Wan sista i no bin filim gud tumas abaot hemwan from hem i no save rid, raet, o helpem ol pikinini blong hem wetem homwok. Hem i bin tekem klas mo naoia i save rid mo help. Hem i hapi tumas. Oltaem taem mi luk hem, mi talem: “Gospel ia i tru tumas. I jenisim mo blesem laef blong ol pipol.”

Ignatius:

Kam Folem Mi mo stap lanem gospel long hom olsem senta bae i helpem ol famli tu, blong ridim ol skripja tugeta mo lan aot long wanwan long olgeta.

Ki ston blong relijin blong yumi hem i Buk blong Momon. Long ples ia long Afrika, oli tijim mifala taem mifala i smol i kam antap long Baebol. Nomata hemia, fulap oli no save se Buk blong Momon i holem ol simpol mo gudgudfala trutok. Taem yumi stap yusum Kam Folem Mi blong stadi long Buk blong Momon insaed long gospel litresi program ia mo lanem gospel long hom olsem senta, yumi stap lanem mo andastanem evri infomesen we yumi nidim blong helpem yumi blong progres long laef ia.

Adelaide:

Taem oli anaonsem blong stap lanem gospel long hom olsem senta long jeneral konfrens, mi tingbaot sam long ol memba long wod mo mi bin wari smol. ?Olsem wanem bae oli mekem hemia? Mi tingting long miwan. Mi prea se ol memba bae oli mekem folem revelesen ia. Mi save se sapos oli folem wanem profet i talem, bae i helpem olgeta long ol hom blong olgeta.

Long famli blong mi, mifala i traem mo mekem wetem wanem mifala i save mekem Evri man i pat insaed. Mi hapi tumas wetem olsem wanem ol pikinini i helpem olgeta wanwan taem mifala i stap ridim Buk blong Momon tugeta. Oli lavem Buk blong Momon. Mifala i bin gat gudtaem blong stap ridim mo serem testemoni blong mifala tugeta.

Ignatius:

Presiden Russell M. Nelson i bin talem: “Fasin blong kam olsem wan god, i wan famli problem.”¹ Mi lavem waef mo ol pikinini blong mi. Mi wantem blong stap wetem olgeta mo Papa blong yumi long Heven blong oltaem, mekem se mifala i nid blong helpem mifala wanwan.

Adelaide:

Ol sista insaed long Rilif Sosaeti tu, i stap helpem wanwan long olgeta. Taem yumi kam tugeta, yumi tingting: “Sista ia i nidim mi” o, “Mi nidim hem.” Yumi sidaon narasaed long yumi mo helpem yumi wanwan blong rid, andastan, mo serem wanem yumi stap lanem. Yumi stap mekem bes blong yumi tingting: “Sapos Sevya i stap ia, bae Hem i mekem wanem?”

Ignatius:

I gat wan lukluk long gospel litresi program we i askem ol studen blong droem wan pikja blong wanem bae oli mekem blong mekem olgeta i kam moa gud blong stap lanem gospel mo mekem skripja stadi. Wan i droem wan pikja we i soem wan famli we i sidaon raon long wan tebol wetem ol skripja blong olgeta long fored blong olgeta mo oli stap toktok raon abaot gospel. Hemia i bin tajem hat blong mi. Gospel litresi i no abaot blong stap rid mo raet nomo. Ol pikja i save helpem yumi blong lan tu. Iven sapos yumi ting se yumi save evri samting, oltaem yumi save lan moa abaot gospel mo mekem testemoni blong yumi long Lod Jisas Kraes i kam moa bigwan.

Ol skripja i talem se hem we i strong long Spirit, hem i mas tekem wetem hem, hem ia we i no strong blong hem tu, i kam strong (luk long Doktrin mo Ol Kavenan 84:106). Sapos i gat sam long yumi we i filim se oli no strong long gospel, yumi save givhan long olgeta, wan afta wan, mo helpem blong mekem olgeta i strong bakegen. Wok blong stap givhan bae i go long we blong help blong leftemap ol memba.