Niufala, Olfala Famli blong Mi
Hem we i raetem hemia i stap long Yuta, YSA.
Sapos yu letem, i nogat wan samting we gospel i no save jenisim.
Pikja droing i kam long Lobo
Ol misinari oli holem wan foto i go antap. “?Wanem nao yu luk?” oli bin askem,
“Wan hapi famli,” mi ansa.
“?Evri famli oli hapi?”
Mi saksakem hed blong mi se no. “Yu bin luk famli blong mi,” mi eksplenem.
Mi bin gat 16 yia mo stap laef long Brasil, ples we mi laef long hem ful laef blong mi. Ol misinari oli bin stap tijim mi blong sam wik, be i no gat wan nara man long famli blong mi we i wantem blong lisin. Long taem ia, ol misinari oltaem oli luk famli blong mi stap faet mo raorao. Famli blong mi mo famli ia we i stap smael long foto ia i no gat wan samting we semmak.
Wan long ol elda i talem, “Maet, ating famli blong yu naoia i no olsem. Be yu save bildim fiuja famli blong yu i defren long hemia.”
Taem mifala i klosem visit, oli askem mi bakegen blong prea abaot wanem mifala i bin stap stadi long hem. Olsem oltaem, mi no promesem olgeta stret blong mekem. Mi laekem tumas olsem wanem mi bin filim taem ol misinari i visit, mo gospel i gat mining long mi. Be mi fraet long ansa we bae mi kasem. Sapos gospel i tru, bae mi nidim blong mekem fulap jenis.
Wan Niu Joes
Afta we ol elda oli bin go, mi no save stop blong tingbaot ol hapi famli. Famli blong mi i no iven kolosap long wan hapi famli. Papa blong mi i no pat blong laef blong mi. Rilesensip blong mi wetem mama blong mi i no gud tumas. Bubu woman nao i lukaot long mifala, be i no gat wan long mifala i mekem samting olsem famli ia we ol misinari i bin tijim abaot olgeta. No gat wan long mifala i soem lav long mifala wanwan o iven spendem taem tugeta.
Ful laef blong mi, mi promesem miwan se bae mi wan gud papa sam dei. Bae mi papa mo mama ia we mi neva gat. Be yet, taem ol misinari i tijim mi, mi stat blong luksave se mi stap mekem ol semmak samting we papa mo mama blong mi i stap mekem long ol yia olsem mi. Mi stap stap let aotsaed, mekem wanem mi wantem mekem, mo laef olsem wan man blong mekem trabol. Mi stap ripitim semmak stori we i no gat mining.
I taem mi askem God.
Long en, taem mi bin prea, mi kasem wan ansa we mi stap tingting long hem fultaem i kam. !Jos ia i tru! Naoia i taem blong mekem wan joes.
Wan Niu Mi
Bubu woman blong mi i mas givim raet long mi bifo mi save baptaes. Hem i i bin agensem be mi fos.
“Bubu woman, ?wij Leonardo nao yu wantem?” Mi askem. “?Hemia we i stap aotsaed i stap drink mo smok mo kambak long haos let? ?O yu laekem huia mi naoia? Ol jenis ia oli from gospel ia.”
Long en, bubu woman blong mi i agri, mo mi bin kasem baptaes mo kasem konfemesen. Stat long taem ia, wan intresting samting i stat blong hapen long famli blong mi—wan samting we mi no luksave fulwan kasem sam yia afta.
Wan Niu Famli
Stret long taem bifo mi aot blong go long misin long saot blong Brasil, bubu woman i bin kam long stek konfrens wetem mi. Afta long hemia, mifala i mekem wan smol testemoni miting wetem ol famli mo ol fren. Long sapraes blong mi, bubu woman blong mi i wantem talem wan samting.
“Stat long taem we Leonardo i bin joenem jos blong yufala, famli blong mi i stat blong kam wan tru famli,” hem i talem. Afta, hem i talem ol wei we ful famli blong mifala i bin kam moa kolosap: Naoia mifala i spendem moa taem tugeta. Mifala i stat blong talem “mi lavem yu” long wanwan long mifala, we mifala i neva mekem olsem bifo. Ol faet mo raorao i stop. Ol tru frensip i stat blong develop long medel blong mifala evriwan. Mifala i gat moa blong kakae mo kasem fulap blesing long ol nara eria.
Mi bin luksave ol jenis ia tu, be mi no luksave se taem blong hem i bin stat long taem we mi bin kasem baptaes.
“Maet mi no wan memba blong jos blong yufala,” hem i talem, “be mi wan fren blong jos blong yufala. Mo mi save se famli blong mifala i bin kasem blesing from joes blong Leonardo.”
Wan Niu Andastaning
!I had blong mi bilivim! Mo yet, taem bubu woman i stap toktok abaot olsem wanem famli blong mifala i gro kam moa kolosap, kwiktaem mi tingbaot foto ia we ol misinari oli bin soem long mi plante yia bifo. Long taem ia bifo, mi bin ting se wei ia nomo blong gat wan hapi famli hem i wetem fiuja famli blong mi.
Be mi bin rong. !Famli blong mi naoia i hapi! Mifala i kam blong lavem mifala wanwan.
Ating bae i no gat wan long ol memba blong famli blong mi bae i joenem Jos long laef ia. Be iven sapos oli no ol memba, mi save se God i blesem mifala finis long fulap wei. Gospel blong Jisas Kraes i soem long yumi olsem wanem blong mekem ol famli blong yumi i kam moa gud, nomata wanem situesen blong famli blong yumi i olsem wanem.