Mga Pangutana ug mga Tubag
Unsaon nako pagtabang ang akong mga higala nga daw magul-anon?
Dapita Sila nga Mouban Nimo
Dapita sila sa pagbuhat og makalingaw nga mga butang uban nimo. Ayaw pagkawala sa kadasig kon dili sila moresponde sa paagi nga imong gusto. Usahay ang usa lang ka pagdapit ngadto sa usa ka butang o gani ang pagkahibalo nga gusto nimo sila nga makauban makahimo nila nga madasig.
Alyssa F., edad 16, Washington, USA
Hupaya Sila
Kon kauban nako ang magul-anon nga mga higala, dili nako ibale-wala ang ilang problema. Apan motabang ko sa pagpagaan sa ilang mga kalisud. Maningkamot ko nga mohupay ug mohigugma kanila. Mohatag ko nila og oportunidad nga mapagawas ang ilang mga kasagmuyo.
Angbo K., edad 18, Ivory Coast
Ayaw Tuguti ang Imong Kaugalingon nga Maguol Sama Nila
Ang labing maayong paagi sa pagtabang nila, ug sa imong kaugalingon, mao ang pagkamatinud-anon. Isulti ang mga butang nga nakahatag nimo og kalipay. Kon nanlimbasug ka sa pagpabiling malipayon, pahibaloa sila nga anaa ka alang kanila, apan atimana ang imong kaugalingon. Mas maayo alang kanimo nga ma-okey ra kay sa maguol sama nila.
Kira W., edad 16, Kansas, USA
Hunahunaa ang Positibo
Pwede ka nga magpabiling positibo kuyog sa imong mga higala kinsa daw magul-anon pinaagi sa paghunahuna og positibo nga mga butang nga imong nasinati o hapit na masinati sa imong kinabuhi. Paghunahuna lamang sa mga butang nga imong giganahan, sama sa kataw-anan nga mga kasinatian.
Luke P., edad 14, New Mexico, USA
Pahinumdumi Sila sa Maayo
Kon aduna akoy higala nga magul-anon, mosulay ko sa pakigsulti kanila kalabut sa usa ka butang nga interesado sila aron mapahinumduman sila sa pipila ka maayong mga butang sa ilang adlaw o kinabuhi. Usahay mosulay ko sa pagpakatawa kanila o modayeg nila aron maayo ang ilang bation, ug usahay mohangyo ko nila sa pagbuhat og importanting butang aron masayud sila nga aduna silay katuyoan.
Carson D., edad 15, Texas, USA