Dali, Sunod Kanako: Basahon ni Mormon
Sa Unsang Paagi ang Pagpalambo og Humok nga Kasingkasing Makatabang Kanato nga Makaangkon og Espirituhanong Kahibalo?
Alma 8–12 Hunyo 8–14
Sa dihang gisangyaw ni Alma ang ebanghelyo didto sa Ammonihah, kadaghanan sa mga tawo misalikway kaniya, apan si Amulek naminaw ug mituo. Ang kalainan tali ni Amulek ug ang tibuok Ammonihah nagpakita kanato sa mga sangputanan sa pagbaton og humok nga kasingkasing o tig-a nga kasingkasing ngadto sa mga butang sa Dios (tan-awa sa Alma 12:10). Makapili kamo nga magbaton og humok nga kasingkasing.
Si Amulek ug ang Katawhan sa Ammonihah
Si Amulek mituo nga si Alma usa ka propeta sa Dios (tan-awa sa Alma 8:20). Sa dihang ang usa ka anghel misulti kaniya nga pasudlon si Alma sa iyang panimalay, mipili siya nga mosunod (tan-awa sa Alma 10:8). Misanong usab siya sa tawag sa Dios sa pagsangyaw sa ebanghelyo (tan-awa sa Alma 8:29–30). Hinoon, ang ubang mga tawo sa siyudad misalikway ni Alma ug nagdumili sa pagtuo.
Mga Panalangin sa Humok nga Kasingkasing
Tungod kay midawat siya sa pulong sa Dios, si Amulek napanalanginan og espirituhanong kahibalo. Siya “napuno sa Espiritu Santo” (Alma 8:30), nakaangkon siya og pagpamatuod sa gahum sa Dios (tan-awa sa Alma 10:5), ug nasayud pa gani siya sa mga hunahuna niadtong misulay sa paglingla kaniya (tan-awa sa Alma 10:17). Makapili usab kamo sa pagdawat sa pulong sa Dios ug modawat sa Iyang mga panalangin.
Mga Sangputanan sa Tig-a nga Kasingkasing
Tungod kay ang katawhan sa Ammonihah nagpatig-a sa ilang mga kasingkasing sa mga pagtulun-an ni Alma, nawad-an sila og bililhong mga panalangin. Wala silay kahibalo sa mga milagro sa Dios (tan-awa sa Alma 9:5), ug gipasidan-an sila nga ang Dios molaglag kanila ug dili sila makapanunod sa Iyang gingharian (tan-awa sa Alma 9:12).
Mga paghulagway pinaagi ni Ben Simonsen