Sa Digital Lamang
Nagkinahanglan Siya og Panalangin sa Pagkapari. Makahimo ba Ako Niini?
Kanunay gyud kong mahadlok nga mohatag og panalangin sa pagkapari. Kon moabut na kanang higayuna, andam na ba kaha ko?
Usa ka adlaw, ang akong mama ug ako nagdrayb pauli dihang ang usa ka tawo nga nagbisikleta mipadulhog sa usa ka gamay nga bungtod. Ang nagbisiklita kalit nga miliko aron dili maigo sa trak nga nagsingabut. Sa tunga sa segundo nga daw sama sa kahangturan, ang hinayak kaayo nga pagliko maoy hinungdan nga ang tawo wala makakontrolar sa iyang bisikleta, milupad ibabaw sa manobila, ug ang iyang ulo grabe nga naugbok sa karsada. Mihunong kami diha-diha dayon. Nakuyawan, nanaog ko sa akong sakyanan ug midagan ngadto sa iyang kiliran. Ang iyang pagginhawa bug-at, apan wala na siyay panimuot.
Diha-diha dayon nasayud ko nga kini nga tawo nagkinahanglan og panalangin sa pagkapari, apan wala ko kapugong sa paghunahuna nga: makahimo ba ako niini?
Nianang higayuna, nakahinumdom ko nga naminaw sa mga pulong ni Elder Jefferey R. Holland sa dihang ako usa pa ka batan-ong naghupot sa Aaronic nga Pagkapari: “Batan-ong mga lalaki, kamo makakat-on, kon wala pa kana mahitabo, nga sa makalilisang, gani sa makuyaw nga mga higayon, ang inyong hugot nga pagtuo ug ang inyong pagkapari magkinahanglan sa labing maayo ninyo ug sa labing maayo nga inyong mapangayo gikan sa langit. . . .
“. . . Ang adlaw moabut—sa pagkatinuod, ako sigurado nga moabut—sa dihang sa usa ka wala damha nga mga kahimtang o usa ka panahon sa grabeng panginahanglan, ang kilat moatake, ingnon ta, ug ang umaabut magdepende sa inyong mga kamot. Pangandam kon kana nga adlaw moabut ” (“Sanctify Yourselves,” Ensign, Nob. 2000, 39, 40; Liahona, Ene. 2001, 47, 49).
Pagbuntog sa Akong Kahadlok
Isip usa ka batan-on, kini nga mga pulong mituhop gayud pag-ayo sa akong kasingkasing ug nakatabang sa pag-andam kanako nga mahimong takus nga tighupot sa Melchizedek nga Pagkapari. Apan sulod sa katuigan human sa pagdawat sa pagkapari, wala ko makahimo sa paghatag og panalangin sa pagkapari ngadto sa uban, ug ang labing dako nga rason mao ang kahadlok.
Nahadlok ko nga dili ko takus o basin dili ko makasulti sa eksakto nga igsusulti. Kini nga kahadlok nakapugong kanako sa paggamit sa awtoridad sa pagkapari, diin nga gisalig diri kanako, sa pagtawag sa mga gahum sa langit sa pagpanalangin sa uban. Apan sa kinahiladman ako nasayud nga kon gusto nako nga mapalambo ang pagkapari, ang akong mga pagbati kinahanglan nga mausab. Kinahanglan nga mabuntog nako ang akong mga kahadlok ug kabalaka mahitungod sa paggamit sa gahum sa Dios sa pagpanalangin sa uban.
Pinaagi sa pagpakita og hugot nga pagtuo sa Ginoo ug pagsunod sa dinasig nga tambag sa Iyang mga sulugoon, akong gipahiuyon ang akong kinabuhi sa Iyang mga pagtulun-an. Ako migahin og panahon sa pagbu-bu sa akong kalag diha sa pag-ampo matag adlaw, ug nag-ampo ko nga malig-on sa espirituhanong paagi samtang ako nagtuon sa mga kasulatan. Gipakigbahin nako ang mga bersikulo sa kasulatan ni bisan kinsa nga akong nahunahunaan samtang nagbasa ko. Naminaw ko sa mga pakigpulong sa kinatibuk-ang komperensya. Akong gipakigbahin ang akong pagpamatuod sa ebanghelyo ngadto sa uban. Ug nagpuasa ko sa dihang nagkinahanglan ko og dugang kalig-on.
Samtang nagsunod ko niining sukaranang mga instruksyon sa usa ka tinguha nga mapahiangay ang akong kabubut-on ngadto sa Dios, mas nabati nako ang Espiritu Santo, ang akong espirituhanong kapasidad milambo, ug nalig-on ang akong koneksyon ngadto sa mga gahum sa langit. Sa katapusan, naangkon nako ang kaisug sa paghatag og panalangin sa kahupayan ug giya.
Nahinumduman nako nga mibati og kakulba sa sinugdanan ug nabalaka kon unsay isulti. Apan ang Espiritu misanap kanako, nawala ang akong kahadlok, ug ang akong kabalaka napulihan sa mga pulong nga kinahanglan nakong isulti! Sakto kaayo ang akong gibati, nga murag dunay usa ka bahin sa akong kaugalingon nga sa nangaging mga panahon nawala kanako!
Sukad niadto gitawag ko sa paghatag og dugang nga mga panalangin kay sa akong maihap, ug ganahan ko niini! Matag higayon nga ako mohatag sa mga panalangin ngadto sa Iyang mga anak, ako napanalanginan pag-ayo. Ang usa ka panalangin sa pagkapari tinuoray nga mopanalangin sa tanang tawo nga mosalmot.
Pagtawag sa Gahum sa Ginoo Kon Kini Importante Gayud Kaayo
Sama sa gipanagna ni Elder Holland, ang kilat miigo niadtong adlawa didto sa dalan pinaagi sa wala damha nga pagkaangul sa tawo nga nagbisiklita. Kon wala pa unta ko magpakitabang sa Ginoo sulod sa miaging mga tuig sa pagbuntog sa akong kahadlok sa paghatag og mga panalangin sa luwas nga kahimtang, kaming duha wala untay nahimo niining makahulga sa kinabuhi nga sitwasyon. Apan sanglit ang Ginoo naggiya ug naglig-on kanako, ako miluhod tupad niya [sa tawo] ug hinay nga mihunghong sa mga pulong nga gibati nako nga isulti samtang ako nanalangin kaniya.
Dihang nahuman ko, mihangad ko ug usa ka opisyal sa kapulisan nagbarug tapad nako. Diha ra diay siya sa akong likud sa tibuok nga higayon ug nanawag ug ambulansya. Apan ang samaran nga tawo dali nga naulian sa panimuot, miinsister nga maayo ra siya, ug mipadagan sa iyang bisikleta, gilabyan lang ang ambulansya sa unahan. Samtang ako nakasabut nga dili tanang panalangin sa pagkapari makahatag og ingon niana kadali nga mga resulta, usa kini ka kasinatian nga dili gayud nako makalimtan. Mapasalamaton ko nga sa dihang miabut ang panahon, andam na ko.