Mga Young Adult
Pagwagtang sa Pamugos sa Pagpangita og Mahangturong Kauban
Diyutay ra og mga miyembro ang Simbahan sa Poland. Sa tinuoray lang, diyutay kini bisan asa sa Eastern Europe. Kasagaran nga kami wala kaayoy mga miyembro sa Simbahan nga susama namo og edad sa among tibuok nasud, ug ilabi na diha sa among ward o stake. Maayo na lang kay adunay mga komperensya alang sa mga young single adult nga gipahigayon matag tuig sa daghang mga nasud sa Europe.
Kini nga mga komperensya gi-organisar dili aron sa pagtabang kanimo sa pagpangita sa imong “perpekto nga kaparis,” apan kasagaran aron sa pagtabang sa mga young adult sa paghimo og bag-ong mga higala kinsa susama kanila og mga hiyas ug makalig-on kanila sa ilang pagtuo pinaagi sa pagpakigsulti ngadto sa uban mahitungod sa ilang espiritwal nga mga kasinatian.
Pagtutok diha sa Pakighigala
Atol sa usa ka komperensya sa Poland niadtong 2010, akong nahimamat si Radu. Gikan siya sa Romania. Nag-istorya kami kadali, apan wala madugay milarga siya alang sa iyang misyon ug wala na kami magkita pag-usab hangtud sa laing komperensya sa YSA paglabay sa tulo ka tuig. Didto duna kamiy panahon nga tinud-anay nga makaila og gamay sa usag usa, apan mobiya na ako alang sa akong kaugalingong misyon paglabay sa usa ka bulan. Nanghinaot si Radu sa labing maayo alang kanako ug miingon, “Atong ipadayon ang atong komunikasyon.” Wala gayud ako magtuo nga iyang himoon, apan gihimo niya. Misulat siya kanako sa akong tibuok misyon. Walay romantiko sa iyang mga sulat, apan nahimo siyang usa sa akong mga pinanggang higala. Ug ganahan ko sa iyang respeto alang kanako ug sa misyonaryo nga buhat sa kinatibuk-an.
Dihang miuli na ko, si Radu ug ako parehong naghinam-hinam nga makaila ang usag usa sa tukmang paagi—makahimo na gayud kami niini human sa daghang katuigan! Mipili kami og barato nga dapit nga didto kami mag-abut (nga mao ang Belgium nianang panahona) aron makagahin og panahon nga mag-uban. Nag-istorya mi ug nag-istorya ug nag-istorya pa gyud.
Wala namo butangi og bisan unsa nga pagpamugos ang among relasyon. Gitutokan namo ang pagpalambo sa panaghigalaay ug aron makaila lang ang usag usa. Kanunay kaming nalingaw pag-ayo nga magkauban, apan aduna usab kamiy makahuluganon kaayo ug lawom nga mga diskusyon mahitungod sa mga butang nga labing mahinungdanon. Paglabay sa panahon, ang among panaghigalaay nagkalig-on. Nag-Skype kami hapit kada adlaw, ug sa kadugayan misugod kami sa pag-ampo kada gabii nga magdungan. Sa katapusan misugod kami sa pagbisita sa nasud sa usag usa matag pipila ka bulan.
“Mag-ampo Kita kabahin Niini”
Wala madugay, misugod ko sa pagbati og kabalaka tungod kay gibati nako nga ang among panaghigalaay milambo ngadto sa mas labaw pa. Apan gikan siya sa Romania! Dili ko gusto nga mosulod og relasyon nga managlagyo tungod kay ang usa ka relasyon mahimong mosangput ngadto sa kaminyoon, nga nagpasabut nga usa kanamo kinahanglang mobalhin ngadto sa laing nasud. Wala ko mobati nga andam alang niana.
Usa ka adlaw sa dihang mibati ko og partikular nga kabalaka, mipahinumdom si Radu nako sa usa ka yano apan gamhanan nga baruganan. Miingon siya, “Atong i-ampo ang atong relasyon ug tan-awon unsay atong bation.”
Wala ko masayud nganong wala ko maghunahuna kalabut sa pag-ampo mahitungod sa among relasyon sa sayo pa. Apan mao kadto ang labing maayong tambag nga akong nadawat nianang higayuna. Busa nag-ampo ko alang sa giya.
Wala ko magdahum og bisan unsang piho nga tubag nianang higayuna, apan nakahukom ko nga ipadayon ang pag-ila kang Radu. Naglaum ko nga ang Langitnong Amahan mohatag nako og usa ka pasidaan kon ang among relasyon dili angay nakong ipadayon. Apan paglabay sa panahon, ang tubag nga akong gipangayo miabut. Duna koy mga pakig-istorya kabahin ni Radu ngadto sa akong pamilya ug mga higala, ug sa matag pag-istoryahanay gisiguro kanako nga sakto ang akong gibuhat.
Wala madugay aduna koy makalingaw nga pagkaamgo. Human sa laing nindot na usab nga pakig-istorya kang Radu pinaagi sa Skype usa ka gabii, nakaingon ko sa akong kaugalingon, “Siya gayud ang labing suod nakong higala sukad. Gusto nako nga mahimo niyang higala sa hangtud!” Niana nga higayon nga nakaamgo ko. Diha-diha dayon usa ka tingog diha sa akong ulo mitubag sa akong kaugalingong gisulti, “Nan, kinahanglang makigminyo ka kaniya!” Nasayud ko nga ang Langitnong Amahan nagpahiyom sa akong relasyon ni Radu. Akong makita nga siya maoy akong labing suod nga higala ug nga mahimo kaming magmalipayon nga mag-uban.
Pagwagtang sa Pamugos sa Pagpangita og Kapikas
Busa mibalhin ko ngadto sa Romania ug nakigminyo ni Radu. Wala gayud mosulod sa akong hunahuna nga mapunta ko sa Romania. Apan upat na ka tuig karon nga naminyo mi, ug aduna kamiy usa ka talagsaong anak nga babaye, si Amelia.
Nahibalo ko unsay inyong hunahuna—usa lang ako niadtong mga young single adult nga nakasugat sa akong “soul mate” sa usa ka komperensya sa YSA ug sayon ra kaayo nga nahitabo ang tanan. Apan dili kana tinuod. Ang rason nga gisultihan ko kamo niini nga istorya mao nga mohunong kamo sa pagpugos sa inyong kaugalingon sa pagpangita sa inyong mahangturong kauban ug hinoon tugutan ang Dios sa paggiya kaninyo.
Miadto ba ko niadtong mga komperensya sa YSA aron sa pagpangita og bana? Wala.
Naghunahuna ba ko nga usa sa mga lalaki nga akong mahimamat didto mahimo nakong bana? Wala gayud.
Hinoon akong giwagtang ang pamugos sa pagpangita kon kinsa ang gusto nakong minyoan ug miadto lamang ako niini nga mga komperensya aron mokonektar sa uban ug mougmad og paghigalaay— nga mao gayud ang gibuhat nako ug ni Radu sa sinugdanan.
Ang pagpamugos nga makita ang atong mahangturong kauban sa labing dali nga mahimo usahay anaa gayud. Apan walay limit ang panahon sa mahangturon nga mga relasyon. Dili kinahanglang magproblema tungod niini. Ang kinabuhi dili mahitungod sa pakigminyo, apan hinoon pagkahimong labing maayong bersyon sa atong kaugalingon ug tugutan ang Dios sa pagpahigayon sa Iyang plano diha sa atong kinabuhi. Oo, kinahanglang manggawas kitang tanan, motambong og mga kalihokan, makighimamat og mga tawo, mohimo og bag-ong mga higala, ug mohimo og mga butang nga tingali dili komportable alang nato. Apan ato kining buhaton uban sa panghunahuna nga, “maglingaw-lingaw ko ug makigkita og pipila ka nindot nga mga higala” imbis nga “kinahanglang bukas ang akong mga mata aron makit-an ‘ang usa’ o maguba gyud ang plano sa akong tibuok kinabuhi!”
Usa ka butang nga gisulti ni Radu kanako sa dihang nagkasabut na mi nga magminyo mao nga bisan tuod sa kasagaran mobati siya og gamayng kakulba kon duol sa mga babaye nga iyang ganahan, dili ingon niana ang iyang gibati kanako. Miingon siya nga tungod sa among panaghigalaay, kanunay siyang mibati nga relaks ug daw makalihok kanunay sa iyang natural nga linihokan.
Busa pangita og maayong mga tawo nga makauban ug paglingaw kon asa ka karon. Tungod kay sa tinuod lang, kon mohunong ka sa pagproblema niini ug mopili lamang sa pag-ugmad og panaghigalaay ug magkat-on sa paghigugma kon kinsa ug asa ka, niana ang kinabuhi mahimong mas makalingaw.
Pagsalig sa Plano sa Dios alang sa Atong Umaabut
Si Radu ug ako dili perpekto. Wala gayud kami mangita sa “perpekto” nga tawo—nagpakanatural lang gayud kami. Ang akong naobserbahan mao nga kon si kinsa ka sa tinud-anay ug giunsa nimo sa pagpakabuhi mao ang labing makapadani sa uban. Kon maningkamot ka nga mosunod ni Jesukristo, makadani ka sa uban nga naghimo sa ilang labing maayo aron mosunod usab Kaniya.
Nakat-unan usab nako nga samtang mahimo kitang mas maayo ug adunay hingpit nga pagtuo nga ang Dios ang nagdumala, atong dapiton ang Iyang impluwensya diha sa atong kinabuhi—ug kon atong mabantayan ang Iyang impluwensya, dili kinahanglan nga mahadlok sa umaabut. Hinumdumi ang gitudlo sa Ginoo kang Nephi: “Ug Ako usab mao ang inyong kahayag diha sa kamingawan; ug Ako moandam og agianan alang kaninyo, kon kini mao nga kamo mohupot sa akong mga sugo; busa, tungod kay mohupot sa akong mga sugo kamo pagatultulan ngadto sa gisaad nga yuta; ug kamo mahibalo nga pinaagi kanako kamo pagatultulan” (1 Nephi 17:13).
Dili kita angay nga mobutang og kanunay nga pagpamugos sa atong kaugalingon tungod kay wala makakab-ot sa piho nga mga ekspektasyon o dagkong panghitabo sa atong kaugalingong gitakda nga panahon. Sa tinuoray, ang panahon sa Langitnong Amahan lahi kay sa atoa—mahangturon kini. Aduna Siyay plano alang kanato sa pagtuman sa matag panalangin nga atong gitinguha. Ug kon mobuhat kita sa atong labing maayo sa pagsalig sa Iyang plano ug pagpangita og katumanan diha sa bisan unsang kahimtang nga maanaa kita, mao kana ang panahon nga makakaplag kita og tinuod nga kalipay. Ang Iyang plano kanunay nga mas maayo kay sa atong plano alang sa atong kaugalingon.