“Dili Nako Isalikway ang Akong Tinuohan”
Edouard Ngindu, Katoka, Democratic Republic of the Congo
Nahimo akong puntirya sa pagbiaybiay ug pagtamay sa trabaho. Nganong nagpabilin man ko sa trabaho nga nahimong hulga sa akong espiritwal nga kaayohan?
Paghulagway pinaagi ni Greg Stevenson
Wala madugay human ako nadawat isip assistant director sa usa ka dakong librarya, ang akong mga kauban ug ako misugod og ambisyusong proyekto sa pag-digitize sa 37,000 ka libro. Usa ka adlaw ang akong superbisor mitawag kanako sa iyang opisina.
“Edouard,” miingon siya, “gidapit ako sa pagpresentar sa atong proyekto sa pag-digitize sa mga libro ngadto sa Estados Unidos ug sa pagpangayo og bag-o nga mga kapanguhaan [mga libro]. Gihangyo ako nga magdala og kasaligan nga katrabaho. Aduna akoy pagsalig kanimo apan dili sa imong simbahan. Kon imong isalikway ang imong tinuohan, pwede kang mokuyog nako.”
Sa wala pa ko makasulti og bisan unsa, gisultihan ko niya sa paghunahuna niini ug dayon gipalakaw ko.
Nianang gabhiuna, akong gipaambit sa akong asawa kon unsa ang nahitabo. Giawhag ko niya nga magbaton og hugot nga pagtuo. Pagkasunod adlaw, giingnan nako ang akong superbisor nga magpabilin ko sa akong tinuohan. Nasuko siya ug miingon nga mag-inusara na lang siya nga mobiyahe.
Paglabay sa usa ka tuig, aduna akoy oportunidad nga mobiyahe ngadto sa France aron sa pagdawat og pagbansay kalabut sa panalapi, kapanguhaan, ug pagdumala sa librarya. Gikinahanglan lamang nako ang pagtugot sa akong superbisor. Miingon siya nga motugot lamang siya kon akong isalikway ang akong tinuohan. Mibalibad na usab ako. Gigisi dayon niya ang dokumento ug gilabay kini sa akong nawong. Paglabay sa panahon miduol na usab kanako ang akong superbisor.
“Molarga ko alang sa laing biyahe,” miingon siya. “Pwede ka nga mokuyog nako, apan ang kondisyon mao ra gihapon. Dili gayud ako mobiyahe nga kuyog ang usa ka miyembro sa inyong simbahan.”
“Dili nako isalikway ang akong tinuohan,” miingon ko. Mibiya siya nga walay gisulti. Wala madugay misugod siya sa paghisgut kanako ngadto sa akong mga kaubanan.
“Mihatag ako kaniya og mga oportunidad,” miingon siya. “Apan giusikan niya ang tanan tungod sa iyang walay hinungdan nga pagtuo. Buangon siya.”
Sugod niana, nahimo akong puntirya sa pagbiaybiay ug pagtamay sa trabaho. Nawad-an ako sa kadasig. Usa ka gabii, naghunahuna niini nga problema, akong giablihan ang Biblia ug mibasa, “Kon ang imong too nga mata mao ang makaingon kanimo sa imong pagpakasala, lugita ug isalibay kini; kay maayo pa alang kanimo nga mawad-an kag usa ka bahin sa imong lawas kay sa ibanlud ang tibuok mong lawas ngadto sa impyerno” (Mateo 5:29).
Kon ang Ginoo miingon nga kinahanglang wagtangon nato ang usa ka butang aron maluwas ang atong kaugalingon, nganong nagpabilin man ko sa trabaho nga nahimong hulga sa akong espiritwal nga kaayohan? Pagkasunod adlaw, misumiter ko sa akong pagluwat sa trabaho [resignation].
Karon, nalipay ko niini nga pagpili. Uban sa kaisug ug hugot nga pagtuo diha ni Jesukristo, akong giatubang ang pagpakaulaw sa trabaho ug temporaryo nga pagkawalay trabaho. Ang akong bag-ong trabaho karon naghatag og mga oportunidad nga wala kanako kaniadto. Ang Ginoo mipanalangin kanako, ug nagpasalamat ko Kaniya tungod sa Iyang pagkamabination ug sa Iyang gugma ngari kanako.