Andam ba nga Magpabunyag ang Akong Anak nga adunay Kakulian sa Panglawas?
Ang tagsulat nagpuyo sa Utah, USA.
Ang ikawalo nga birthday sa among anak nga lalaki nagsingabut na. Apan unsaon namo sa pagsiguro nga andam na siya alang sa bunyag?
Gilitratohan ni Randy Collier
Dili na lang kaabut og tuig, ang among anak, si David, mag-otso anyos na. Ang akong bana ug ako gusto nga maandam siya sa paghimo sa sagradong mga pakigsaad sa bunyag. Nagpasabut kana sa paghimo og mga butang sama sa pagbasa sa Basahon ni Mormon, pagtuon sa mga pakigsaad sa bunyag, ug pagribyu sa mga pangutana sa interbyu sa bunyag. Nabuhat na namo kining tanan sa magulang ni David nga babaye, apan si David adunay autism, busa ang paghukom kon angay ba siya nga magpabunyag dili sayon alang kanamo.
Oo, nasayud kami unsay buhaton sa pagtabang kaniya nga maandam, apan ang kanunay namong gihunahuna mao ang mga pangutana: Angay ba nga bunyagan si David? Andam ba siya? Kinahanglan ba nga mabunyagan siya? Nakasabut ba siya kon unsa nga pasalig ang iyang buhaton? Unsaon namo nga siguradong makahibalo nga husto ang among gibuhat?
Sama sa daghang mga ginikanan nga adunay anak nga may kakulian, kini nga mga pangutana midala kanamo sa usa ka panaw sa pagtinguha og mga panabut sa doktrina ug personal nga pagpadayag.
Ang Edad sa Pagkaadunay Tulubagon vs. Pagkaadunay Tulubagon
Ang Doktrina ug mga Pakigsaad 68:27 mabasa, “Ug ang ilang mga anak pagabunyagan alang sa kapasayloan sa ilang mga sala kon moabut sa walo ka tuig ang panuigon, ug makadawat sa pagpandong sa mga kamot.”
Kon mosalig lamang kita niini nga kasulatan, makaingon kita nga ang bisan kinsang otso anyos andam na nga magpabunyag. Hinoon, ang mga kasulatan nagtudlo usab:
“Ang gagmay nga mga bata natubos … pinaagi sa akong Bugtong Anak;
“Busa, sila dili makasala … hangtud nga sila magsugod nga mahimo nga adunay tulubagon sa akong atubangan” (Doktrina ug mga Pakigsaad 29:46–47; tan-awa usab sa Moroni 8:7–22).
Unsaon namo sa akong bana pagsabut kon si David may tulubagon na? Mipadayon kami sa pagsiksik.
Among nakat-unan gikan sa polisiya sa Simbahan nga ang pagkaadunay tulubagon sa indibidwal parehong mag-agad sa iyang mga tinguha ug sa iyang lebel sa pagsabut: kon si David takus ug matinguhaon nga mabunyagan ug mopakita nga mahimo siyang manubag, kinahanglang dili namo ihikaw ang bunyag kaniya.
Nakat-unan usab namo nga kon ang kakulian ni David mipugong sa iyang intelektwal nga kapasidad kutob ngadto sa usa ka gamay nga bata, wala siyay tulubagon ug dili magkinahanglan og makaluwas nga mga ordinansa (tan-awa sa Tamdanan nga Basahon 1: Mga Presidente sa Stake ug mga Bishop [2010], 16.1.8; ang mga miyembro nga dunay mga pangutana mahitungod sa mga polisiya sa Simbahan mahimong mokonsulta sa ilang mga bishop).
Ang intelektwal nga kapasidad ni David sa tinuod kasarangan ra. Hinoon, nagpangutana gihapon ko sa akong kaugalingon kon si David nakaabut ba og tukma nga lebel sa pagkaadunay tulubagon. Mipadayon ko sa mainampoong pagsiksik ug paglaum alang sa giya nga makahatag nako og kalinaw.
Mga Kakulian ug Pagka-inosente
Nasayud ko og pipila ka mga ginikanan nga adunay anak nga may kakulian kinsa mobati og dakong kahupayan sa pagbasa nga kadtong miagi sa mortalidad nga wala mahimo nga adunay tulubagon magpabilin sa kahimtang nga inosente: “Ang tanan nga gagmay nga mga bata mga buhi diha kang Kristo. … Kay ang gahum sa katubsanan modangat diha sa tanan kanila nga walay balaod; … ug ngadto kanila ang bunyag walay kapuslanan” (Moroni 8:22).
Si Propeta Joseph Smith mihulagway usab sa kahimtang sa mga bata nga namatay ug wala mahimo nga adunay tulubagon: “Ug ako usab nakasud-ong nga ang tanan nga mga bata kinsa namatay sa wala pa sila moabut sa panuigon sa pagkamay-tulubagon maluwas diha sa celestial nga gingharian sa langit” (Doktrina ug mga Pakigsaad 137:10).
Nasayud ako nga alang niini nga mga indibidwal, ang bunyag dili kinahanglan niini nga kinabuhi. Nasayud usab ako nga ang Dios motabang kanamo nga masayud unsa ang labing maayo alang kang David.
Pagtinguha og Balaan nga Giya
Alang niadtong adunay mga kakulian, adunay daghang nagkalain-lain nga mga abilidad. Daghang mga indibidwal nga adunay mga kakulian ang mas taas og lebel sa panghunahuna sa otso anyos ug mahimong mabunyagan ug makumpirmahan kon mahimo sila nga adunay tulubagon (tan-awa sa Tamdanan nga Basahon 1, 16.3.5). Ang ubang indibidwal walay tulubagon. Nasayud ko nga ang akong bana ug ako makahimo sa pagkonsulta sa among anak, sa Dios, ug sa among bishop, kinsa mobarug isip “maghuhukom sa Israel,” aron makatabang sa paghimo og dinasig nga desisyon mahitungod sa kaandam ni David nga magpabunyag (tan-awa sa Doktrina ug mga Pakigsaad 107:76).
Kini nga mga pulong gikan kang Alma mihatag kanako og dakong kalinaw: “Ug karon, ingon nga kamo mga matinguhaon sa pag-ipon ngadto sa panon sa Dios, ug pagatawgon nga iyang mga katawhan, … unsay anaa kaninyo batok sa pagpabunyag diha sa ngalan sa Ginoo, ingon og usa ka saksi sa iyang atubangan nga kamo nakasulod ngadto sa usa ka pakigsaad uban kaniya, nga kamo mag-alagad kaniya ug maghupot sa iyang mga sugo, nga siya unta mobubu sa kabuhong sa iyang Espiritu diha kaninyo?” (Mosiah 18:8, 10).
Human sa tanan namong pagpangandam, sa tanan namong mga leksyon sa panimalay ug diha sa Primary, misugod ko sa pagpangutana kang David sa mga pangutana nga nasayud ko nga pangutan-on siya sa iyang interbyu sa bunyag.
Usahay ang iyang mga tubag nagpakita og pagsabut, apan usahay dili siya kahibalo unsaon sa pagtubag. Naghunahuna ko kon husto ba ang among gibuhat.
Sa katapusan, ang Espiritu mihunghong sa akong kasingkasing, “Nganong dili man nimo pangutan-on si David kon unsay iyang hunahuna?”
Miatubang ko ni David ug nangutana, “David, gusto ba nimo nga magpabunyag?”
Mitan-aw siya nako ug miingon, “Oo!”
Sa dihang gipangutana nako siya nganong gusto niya nga magpabunyag, miingon siya, “Aron mahimong sama kang Jesus.”
Nasanapan ko sa kalinaw ug direksyon. Nasayud ko diha-diha dayon nga bisan kon si David wala makasabut sa hingpit sa matag pangutana, andam na siya nga magpabunyag ug magpakumpirma. Nasayud siya sa unsay kinahanglan niyang masayran, ug labing importante, aduna siyay tinguha nga mosulod sa gingharian sa Dios pinaagi sa bunyag.
Ang adlaw nga nabunyagan ug nakumpirmahan si David isip miyembro sa Ang Simbahan ni Jesukristo sa mga Santos sa Ulahing mga Adlaw puno sa gugma, panaghigalaay, ug kalinaw. Ang kwarto napuno sa pamilya, mga miyembro sa ward, mga higala sa eskwelahan, ug bisan mga magtutudlo sa eskwelahan ni David. Ang ehemplo nga gipakita ni David nianang adlaw sa pagpili nga mosunod ni Jesus ug magpabunyag usa ka ehemplo nga nakaimpluwensya og daghan alang sa kaayohan. Ang among pamilya mas lig-on tungod kay kami adunay oportunidad sa pagkat-on kon sa unsang paagi ang buhat sa Dios mahimong ipakita pinaagi sa among anak, si David (tan-awa sa Juan 9:3).