Mga Young Adult

Pagkat-on nga Magmalipayon Samtang Dili Pa Ko Minyo

Ni Landon Hawes

Nakaamgo ko nga sayop ang akong panglantaw kabahin sa pagpakig-date.

neighbors outside

Paghulagway pinaagi ni Josie Portillo

“Nganong ang tanan nakig-date man ug naglingaw-lingaw?”

“Nganong wala man ko maminyo?”

“Unsay dili maayo kanako?”

Kadaghanang dili minyo nga mga young adult tingali nangutana sa ilang kaugalingon niini nga mga pangutana bisan kausa! Ang hagit sa pagpangita og mahangturong kauban makaluya sa pagtuo ug paglaum sa bisan labing mapahinunguron nga Santos sa Ulahing mga Adlaw. Ug oo, sa akong sitwasyon usab, ang pakig-date lisud gayud.

Ang kaminyoon kanunay nga daw sama sa usa ka dakong panimpalad kanako, ug naghandum ako niini sukad pa sa pagkabata. Apan nawad-an ko sa kadasig sa dihang mora og napakyas ko sa pagpakig-date sa akong mga tuig sa kolehiyo. Bisan tuod nakig-date ko sa makadaghan, adunay pipila ka seryoso nga mga relasyon, ug nakahimamat og malampuson ug makapaikag nga mga babaye, wala ako magminyo. Ug alang kanako, kadtong pakyas nga mga relasyon mabati nga daw timailhan nga ako minos ug dili madanihon.

Ang akong mga pagbati kalabut sa akong pagkadili minyo misamot hinoon human sa pipila pa ka panagbulag sa dihang misugod ko sa akong panarbaho. Sayon ra alang kanako nga mangutana kon unsa ang dili maayo ngari kanako ug maayo ngadto sa tanan nga magminyo. Ang akong patriyarkal nga panalangin, uban sa pipila ka mga panalangin sa pagkapari, kusganon ug piho nga mipasabut nga masilyo ako dinhi sa mortalidad ngadto sa matarung nga babaye. Busa nganong wala man kini mahitabo?

Misugod ko sa paghunahuna, “Aduna ba akoy nabuhat nga nakadaot sa plano sa Dios alang kanako?”

Sa katapusan, human “makigbisog” atubangan sa Dios sulod sa katuigan pinaagi sa pag-ampo, pagtuon sa kasulatan, ug pagtambong sa templo, nakadawat ko og pagpadayag kalabut sa akong sitwasyon pinaagi sa akong higala ug magtatambag, si Brad (ang ngalan giusab). Atol sa usa sa among mga sesyon sa pagtambag, miingon siya: “Ang imong kalipay nag-agad kanimo—dili sa laing tawo. Kon malipayon ka nga dili minyo, magmalipayon ka sa bisan unsang kahimtang.” Sa samang paagi, si Presidente Russell M. Nelson mitudlo, “Ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi” (“Hingpit nga Kalipay ug Pagsugakod sa Espirituhanong Paagi,” Liahona, Nob. 2016, 82).

Ang akong tibuok panglantaw nausab samtang ang Espiritu lig-ong mipatuhop niini nga mga pulong sa akong kalag. Ug akong naamguhan nga kanunay akong nakig-date aron matubag ang usa ka panginahanglan—sa akong sitwasyon, ang panginahanglan nga maminyo aron lang dili na ako mag-inusara.

Dili gayud kini paagi sa panghunahuna nga mogiya ngadto sa usa ka mahangturong magmahal nga kauban! Pinaagi ni Brad, ang Ginoo hinay-hinay nga mitudlo kanako nga ang Iyang plano alang sa Iyang mga anak dili nga magminyo sila base sa panginahanglan o pagpamugos sa kultura o kahadlok. Ang kaminyoon ibase sa Kristohanong gugma. Dayon mitudlo Siya nako nga ang akong kahimtang sa pagkadili minyo magpadayon sa pagtudlo kanako sa pagpuyo sa kinabuhi ug pagtinguha og kaminyoon base sa putli nga gugma ug dili sa kaayuhan. Sa pagtinguha og kaminyoon alang sa husto nga mga rason.

Pinaagi niini nga kasinatian, nakakat-on ko og tulo ka kamatuoran nga akong tan-awon kon mobati ko og kawalay kadasig mahitungod sa pagpakig-date:

1. Ang imong bili wala mag-agad sa imong estado sa pagkaminyo [marital status]. Si Isaias mitudlo nga “ang … hunahuna [sa Dios] dili mao ang [atong] mga hunahuna” (Isaias 55: 8). Abi nako nga ang pagkadili minyo nagtimaan sa akong kakulang sa bili. Hinoon, ang Dios mitabang nako nga makakita nga ang pagkadili minyo nag-andam kanako alang sa mas maayo nga kaminyoon kay sa ako untang maangkon kon nagminyo ko sumala sa akong gilatid nga panahon. Kini walay bisan unsa nga labut sa akong bili.

2. Ang pagpangandam makawagtang sa kahingawa o kaguol. Ang Ginoo nagsulti kanato nga “kon [kita] andam dili [kita] mahadlok” (Doktrina ug mga Pakigsaad 38:30). Ang pagtinguha ug dayon pagsunod sa kabubut-on sa Dios nakatabang nako nga mabuhian ang kanhi mga kahadlok ug kasagmuyo mahitungod sa akong estado sa pagkaminyo. Nakatabang usab kini kanako nga tutukan ang pag-andam sa akong kaugalingon alang sa bisan unsay mahitabo sa akong kinabuhi sa umaabut.

3. Adunay kalipay sa pagkadili minyo. Ang pagkadili minyo mipanalangin kanako og makahinam nga mga oportunidad sa pagbiyahe, propesyonal nga kalamboan, ug mga paagi sa pagserbisyo sa Simbahan. Samtang nagtinguha gihapon ko pag-ayo sa kaminyoon ug mga anak, ang Dios mitabang nako nga makasabut unsa kadaghan ang buluhaton diha sa Iyang gingharian karon, aduna man akoy kauban sa akong kiliran o wala.

Wala pa gihapon ko maminyo! Ang akong asawa wala mokalit og tunga karon nga nausab na ang akong panglantaw kalabut sa pakig-date ug kaminyoon, ug nasayud ko nga usahay masagmuyo gihapon ko sa pagpakig-date sa umaabut. Apan ang dakong kahadlok ug kabalaka mahitungod sa akong estado sa pagkaminyo wala na. Ug nasayud na ako karon nga okey ra kaayo nga dili pa minyo samtang ang Ginoo ug ako nagtinabangay sa pagtuman sa mahangturong mga saad ug mga panalangin nga Iyang gihimo ngari kanako—sa mortalidad ug sa kahangturan.

Si Landon Hawes kanunay nga mobiyahe sa tibuok kalibutan ug tighimo og mga plano sa kalungsuran kinsa ganahan og maayong mga sinulat, nindot nga mga libro, ug mosuhid sa kalibutan. Makit-an nimo siya sa iyang lokal nga librarya, nag-abiba sa iyang team diha sa dulaanan sa baseball, o anaa sa kadalanan sa probinsya nga nangita og nindot nga mga dapit nga wala pa makit-i sa uban.