Katak jān Ennaan ko an Kweilo̧k eo Eļap (2018 im 2019)
Katak ko an rikanaan ro remour, rilolo ro, im ribōk revelesōn remaron̄ letok unin tōl eo eim̧we n̄an jerbal eo an doulul ko an elder ro im Doulul eo an Kōrā ro. N̄an wiik ko n̄e ennaan ko an kweilo̧k eo enaaj ekkatak kaki, doulul eo an elder ro ak būreejtōnji eo an Doulul eo an Kōrā ro enaaj kālet juon ennaan an kweilo̧k eo n̄an kōjerbale, pedped ioon aikuj ko an membōr ro. Ilo jet iien, bisop eo ak stake būreejtōn eo emaron̄ in barāinwōt kwaļo̧k juon ennaan. Ritōl ro raikuj kōmejajaik ennaan ko jān ro uwaan Būreejtōnji eo Kein Kajuon im Doulul eo an Jon̄oulruo Rijilōk ro. Ijowōt ke, ro uwaan būreejtōnji eo remaron̄ kālet jabdewōt ennaan jān kweilo̧k eo ekāāl tata, pedped ioon aikuj ko an Armej ro Rekwojarjar ijo jokwe ie im im̧we eo jān Jetōb.
Ritōl im rūkaki ro raikuj kappukōt wāween ko n̄an kōketak membōr ro n̄an riiti ennaan ko kar kāleti m̧okta jān iien eo. Rej aikuj kōketak membōr ro n̄an itok n̄an kweilo̧k ko pojak n̄an kwaļo̧k m̧ool ko an gospel eo em̧ōj aer kar ekkatak im ļōmņak ko aer kōn ekōjkan jerbali m̧ool kein. M̧akūtkūt in katak ko kar elmakoti itulaļ, ko rej pedped ioon pedped in katak ko ilo Teaching in the Savior’s Way, emaron̄ jipan̄ membōr ro ekkatak jān ennaan ko an kweilo̧k eo eļap.
Quentin L. Cook, “Oktak eo Em̧wilaļ im Aitok Kitien n̄an Jemedwōj Ilan̄ im Irooj Jisōs Kraist.”
Membōr ro remaron̄ in itok limoier n̄an ron̄jake jān doon ta en̄jake ko aer m̧oktata ke raar ron̄ kōn oktak ko kar kōmeļeļeik ilo ennaan eo an Elder Cook. Eļan̄n̄e eo m̧ōttad jān bar juon kabun̄ kar tōn kajjitōk ippāer etke Kabun̄ in ej kōm̧m̧ani oktak kein, ta eo renaaj kar ba? Kōketak er n̄an kappukōt uwaak ko remaron̄ ekkar ilo ennaan eo an Elder Cook. Ta eo jemaron̄ kōm̧m̧ane āinwōt kajjojo armej im baam̧le ko, im āinwōt juon doulul an elder ro ak Doulul eo an Kōrā ro, n̄an kanooj lale bwe oktak ko ren kadedeļo̧k ta eo Irooj ej jibadōke? Ejja m̧ōttan wōt ekōnono in, komaron̄ barāinwōt kwaļo̧k ļōmņak ko jān Naan in Kōppeļļo̧k ko an Būreejtōn Nelson me rej im̧we membōr ro n̄an “laudin̄din̄ kautiej” oktak kein.
Ronald A. Rasband, “Kom̧win Jab Lōļn̄o̧n̄”
Ennaan eo an Elder Rasband ej kalikkar jet eoon in jeje ko rekwojarjar me remaron̄ jipan̄ kōj kōm̧akūtļo̧k jabdewōt mijak ko emaron̄ wōr ippād kōn iien ko rōkamijak jej mour ie. Kajjitōk ippān mem̧bōr ro n̄an etale eoon in jeje kein rekwojarjar n̄an kapilōk eo me remaron̄ kwaļo̧ke ippān bar juon me emijak kōn ilju im jekļaj. Bar ta eo remaron̄ kwaļo̧ke jān ennaan eo an Elder Rasband? Ekōjkan an mijak “[kōm̧m̧an jon̄an] tōmak eo an ajri ro nejin Anij”? Kūr membōr ro n̄an kwaļo̧k ekōjkan aer kar ekkatak n̄an anjo̧ ioon mijak ko aer im mour kōn tōmak.
David A. Bednar, “Kuktok Ippān Doon ilo Juon wot Kōn Men Otemjej ilo Kraist”
Ļōmņak in bōktok juon to im juon laajrak in men kōm̧m̧ane n̄an kwaļo̧k. Kūr membōr n̄an ekōnono kōn oktak ko ikōtaan lale m̧ool ko an gospel eo im būrookraam̧ ko an Kabun̄ in āinwōt juon to im kalimjōki āinwōt juon laajrak in men ko kōm̧m̧ani kōn unin kōnono ko an kajjojo armej im jerbal ko. Kōketak membōr n̄an kappukōt ļōmņak ko ilo waanjon̄ak ko ilo ennaan eo an Elder Bednar. Ta meļeļe in n̄an “kobaik men ko otemjej ilo Kraist”? (lale Epesōs 1:10). Ta eo jemaron̄ kōm̧m̧ane n̄an bōk kallim̧ur eo ilo jem̧ļo̧k in ennaan eo an Elder Bednar?
Dallin H. Oaks, “M̧ool im Karōk eo”
Ekōjkan an meļeļe kōn “m̧ool ko kar kōjepļaakitok” jipan̄ kōj n̄e jej jelm̧ae jum̧ae n̄an tōmak ko im iminene ko ad? N̄an uwaake kajjitōk in, membōr ro remaron̄ etale waanjon̄ak ko an m̧ool ko m̧oktata ilo jekjōn II in ennaan eo an Būreejtōn Oaks. Remaron̄ barāinwōt etale waanjon̄ak ko kōn ekōjkan an m̧ool kein jerbal lale jekjōn III). Emaron̄ in jipan̄ n̄an membōr n̄an kōm̧m̧an waanjon̄ak kōn ekōjkan aer naaj kar kōjerbal jet iaan m̧ool kein m̧oktata n̄an uwaake rikōraat ro kōn juon katak an Kabun̄ in ak iminene.
D. Todd Christofferson, “Dim im Pen kōn Tōmak ilo Kraist”
Komaron̄ ijjino kōn juon ekōnono kōn ennaan in kōn je juon ļain ioon boot eo kōn Lim̧otak in Ikitōltōl ilo juon jekjek im Kallim̧ur āinwōt Kraist ilo bar juon jekjek. Kūr membōr ro n̄an riiti pārokūrāāp eo me ej ijjino kōn “Eitōn aolepād jej loe kōj make ilo ejja wāwein ko wōt …” im kejōkļo̧kjeņ ia eo rej en̄jake rej pād ie ilo ruo kain oktak ko ilo bōk kuņaan. Ta eo jaar ekkatak jān waanjon̄ak ko ilo ennaan eo an Elder Christofferson me ej im̧we kōj n̄an dim im kijin̄en̄e ilo kaen̄taanan? (lale barāinwōt Alma 36:27–28). Kōketak membōr ro n̄an kwaļo̧k waanjon̄ak ko kōn armej ro rejeļā kajier me raar kwaļo̧k kallim̧ur eo āinwōt Kraist n̄an gosepl eo, jekdo̧o̧n n̄e jelm̧ae kaen̄taanan.
Ulisses Soares, “Juon Wōt ilo Kraist”
Ekkar n̄an Elder Soares, ekōjkan an Amazon River eo jutak kōn membōr ro an Kabun̄ eo an Jisōs Kraist kar kōjepļaaktok? Ta eo keidi in ej katakin kōj kōn kareel eo an membōr ro rekāāl maron̄ wōr aer ie ilo Kabun̄ in? Ekōjkan ad maron̄ āinwōt juon doulul eo an elder ak Doulul eo an Kōrā ro ļoor kapilōk eo an Elder Soares n̄an kōketak, rejtak, im iakwe rioktak ro rekāāl? (lale Moronai 6:4–5). Bōlen jet membōr ro remaron̄ kwaļo̧k jet apan̄ ko raar jelm̧ai āinwōt membōr ro rekāāl an Kabun̄ in im ekōjkan an membōr ro jet kar jipan̄ er. Komaron̄ barāinwōt ekōnono kōn wāween ko me membōr ro rekāāl raar kōkajoorļo̧k ward ak branch eo ami.
Gerrit W. Gong, “Ad Kijeek in Tōmak”
Ļōmņak in kwaļo̧k juon pija in juon kijeek in kāām im kūr juon n̄an kwaļo̧k juon en̄jake ke eaar kam̧m̧oolol bwe ewōr juon kijeek in kāām. Kajjitōk ippān membōr ro n̄an ekōnono kōn ta kar meļeļe in an Elder Gong ke eaar kōnono kōn juon “kijeek in kāām an tōmak.” Innām komaron̄ ajejā membōr ro n̄an kumi ko im kūr kajjojo kumi n̄an etale im kwaļo̧k juon iaan wāween ko ļalem me Elder Gong eaar elmakoti “kijeek in kāām an tōmak” remaron̄ kōketak kōj. Leļo̧k n̄an membōr ro iien n̄an kejōkļo̧kjeņ kōn ekōjkan aer maron̄ kōkajoorļo̧k tōmak eo aer make ak tōmak eo an juon eo rejeļā kajien.
Dieter F. Uchtdorf, “Tōmak, Iakwe, Kōm̧m̧an”
Komaron̄ ijjino juon ekōnono kōn ennaan in kōn je ioon boot eo Jeļo̧k kōjatdikdik im M̧ōņōņō. Kūr membōr ro n̄an etale ennaan eo kōn m̧wil ko im tōmak ko me rej tōlļo̧k n̄an leļo̧k kōjatdikdik im m̧ōņōņō im kōllaajraki ioon boot eo. Kūr membōr ro n̄an kwaļo̧k wāween ko raar en̄jake m̧ōņōņō eo me ej itok jān tōmak, iakwe, im kōm̧m̧an, āinwōt an Elder Uchtdorf katakin. Kōketak membōr ro n̄an pukōt juon kout ekōketak jān ennaan eo n̄an likūti ilo m̧weo im̧weer ak kwaļo̧k ippān juon m̧ōttaer.
Joy D. Jones, “N̄an E”
Ļōmņak in kwaļo̧k bwebwenato eo ilo jino in ennaan eo an Sister Jones im kajjitōk ippān membōr ro n̄an ļōmņak kōn iien ko ke jerbal in jipan̄ eo aer im kijejeto in jerbal in karejar ko aer maron̄ in kar āinwōt “jab kūli ak … jab kam̧m̧oolol kaki ak em̧ool jab kōņaan.” Ālkin ekōnono kōn bwebwenato eo, ļōmņak in je ioon boot eo Etke jej aikuj jerbal? Kūr membōr ro n̄an uwaake kajjitōk in jān etale aolepān ennaan eo an Sister Jones, pukōt meļeļe ko (lale barāinwōt (bar lale Katak im Bujen ko 59:5). Ekōjkan an kapilōk eo an Sister Jones maron̄ ukōt wāween ad kea kōn im jerbal in karejar n̄an doon?
Michelle D. Craig, “Jab Ju Būruwōn”
Sister Craig ej kōnono kōn “bwe ewōr oktak ikōtaan ia im wōn kōj, im ia im wōn eo jej kōņaan erom.” Ekōjkan an Anij kōņaan bwe jān en̄jake kōn kōtaan in? Ekōjkan an Setan kōņaan bwe jān en̄jake kake? Kajjojo membōr emaron̄ etale juon iaan jekjōn ko jilu ilo ennaan eo an Sister Craig n̄an pukōt uwaak ko n̄an kajjitōk kein. Ta eo jemaron̄ kōm̧m̧an n̄an lale bwe “jab ju būruwōn” eo ad en jab erom “kabweerer eo bwe jeban tōprak”?
Cristina B. Franco, “Lan̄lōn̄ eo an Jerbal in Jipan̄ Ejjab Lōmņak Kōn E Make”
N̄an katakin bwe “iakwe ej kōm̧m̧an bwe en ekwojarjar kōn kaarmejet,” Sister Franco ej kwaļo̧k ruo bwebwenato ko—juon kōn Victoria im juon kōn lio emej pāleen. Komaron̄ kōņaan kūr ruo membōr ro n̄an pojaktok n̄an kwaļo̧k ta eo rej ekkatak kōn iakwe im kaarmejete jān bwebwenato kein. Ta en̄jake ko jet jemaron̄ kwaļo̧k me rej katakin ejjab pedped in katak eo wōt? Kwaļo̧k pija eo me ej kwaļo̧k an Rilo̧mo̧o̧r eo jerbal n̄an ro jet (eo āinwōt “Light the World—Follow the Example of Jesus Christ” ilo LDS.org) maron̄ tōlļo̧k n̄an juon ekōnono kōn ekōjkan ad maron̄ ļoor waanjon̄ak eo An kōn “jerbal in jipan̄ koba in iakwe im kaarmejete.”
Henry B. Eyring, “Kōrā ro im Ekkatak Gospel eo ilo M̧weo”
Eoon ko an jeje ko rekwojarjar im kout ko jān “Baam̧le Eo: Juon Naan in Kean̄ n̄an Laļ in” me Būreejtōn Eyring ej kōjerbale ilo ennaan eo an ej letok ļōmņak ko kōn aorōk eo an kareel an kōrā ro ilo m̧weo. Membōr ro remaron̄ jerbal n̄an pukōt eoon kein im kout ko im ekōnono kōn ta eo rej ekkatak. Ta kūr ko Būreejtōn Eyring eaar litok? Ta kallim̧ur ko eaar kōm̧m̧ani? Ļōmņak kōn ekōjkan an al ak riiti al eo kōn m̧weo, eo āinwōt “Mweo Emaron̄ Lan̄ ilo Laļin” (Al, nō. 298), emaron̄ kōkajoorļok ekōnono eo.
Dallin H. Oaks, “Ro Jinen im Jemen im Ajri ro”
Ilo am̧ m̧aanjappopo n̄an katakin, ļōmņak kōn jekjōn ta eo jān ennaan eo an Būreejtōn Oaks eļap tata an jejjet n̄an armej ro ilo doulul eo am̧ ak Doulul eo an Kōrā ro. Errein kajjitōk ko komaron̄ in kajjitōk n̄an kōkajoorļo̧k ekōnono eo kōn ennaan eo an: Ekōjkan an oktak in ikitōltōl ko rainin kar kōnono kaki ilo ennaan eo an Būreejtōn Oaks ilo jekjōn I jerbal ņae karōk eo an Jemed Ilan̄? Ta waanjon̄ak ko an kōrā ro retiljek jemaron̄ kwaļo̧ki me rej kwaļo̧k kōn ennaan ko kōn kōrā ro ilo jekjōn II? Ekōjkan ad maron̄ kōketak jiron̄ ro jejeļā kajier n̄an ļoor kapilōk eo āinjuon an Būreejtōn Oaks n̄an er ilo jekjōn III?
Russell M. Nelson, “An Sister ro Bōk Koņaer ilo Aiintok Israel”
Eļan̄n̄e kwoj katakin Doulul eo an Kōrā ro, ļōmņak in ajijā sister ro n̄an emen kumi ko im kajjitōk ippān kajjojo kumi n̄an riiti juon iaan kūr ko emen ilo ennaan eo an Būreejtōn Nelson. Kumi ko remaron̄ ekōnono kōn ta eo ej aorōk n̄an er kōn kūr eo, en̄jake ko raar jerbali, im ļōmņak ko kōn ekōjkan jerbali ilo ilju im jekļaj. Innām kajjojo kumi remaron̄ kwaļo̧k ippān jabdewōt ta eo raar kōnono kake. Eļan̄n̄e kwoj katakin rikabwijer ro an priesthood eo, komaron̄ kajjitōk ippāer n̄an pukōt ennaan ko ilo ennaan eo an Būreejtōn Nelson me ej kwaļo̧k ekōjkan an Jemed Ilan̄ en̄jake kōn leddik ro Nejin. Ta eo jemaron̄ kōm̧m̧ane n̄an rejtake im kōketak bōk kuņaan eo an sister ro ilo aiintok Israel?
M. Russell Ballard, “Visōn eo kōn Lo̧mo̧o̧r eo an ro Remej”
Komaron̄ kūr membōr ro n̄an bōk kūr eo an Būreejtōn Ballard im riiti Katak im Bujen ko 138 m̧okta jān ekōnono eo ami. Kajjitōk ippān membōr ro n̄an kwaļo̧k en̄jake ko aer im ļōmņak ko jān jekjōn in ilo iien kweilo̧k eo. Kajjitōk ko āinwōt kein remaron̄ jipan̄ membōr ro meļeļe aorōk eo an revelesōn in: Ekōjkan an kar revelesōn in bōktok n̄an kōj kaenōm̧m̧an? im Ta m̧ool ko repād ilo revelesōn in me remaron̄ jelet ‘wāween ad mour mour ko ad kajjojo raan’?
Bonnie H. Cordon, “Erom̧ juon Rilale Sip”
N̄an jipan̄ membōr ro ļōmņak kōn wāween ko remaron̄ kōkōm̧anm̧anļo̧k ilo kijejeto in jerbal in karejar ko aer, komaron̄ ajijā er n̄an jilu kumi ko im kajjitōk ippān kajjojo kumi n̄an riiti juon iaan jekjōn taitōļ ko jilu jān ennaan eo an Sister Cordon. Kūr er n̄an kwaļo̧k pedped in katak ko an jerbal in karejar me raar katak. Ekōjkan an kajieon̄ ļoor pedped in katak kein maron̄ jipan̄ kōj “erom seperd ro Irooj eaikuji bwe jān erom ”? Kūr membōr ro n̄an kwaļo̧k en̄jake ko ke jerbal in karejar an bar juon armej eaar jipan̄ er bwe raar jeļā kajier im iakwe er jān Rilo̧mo̧o̧r eo.
Jeffrey R. Holland, “Jerbal in Karejar in Kajim̧we”
Komaron̄ jino ekōnono eo kōn ennaan eo an Elder Holland kōn kūr membōr ro n̄an ļōmņak kōn kadkad eo ilo mour ko aer me ej aikuj kemour ak kōm̧anm̧an kōtaan. Innām remaron̄ etale ennaan eo an Elder Holland, pukōt ekōjkan an Brad im Pam Bowen kar maron̄ jipan̄ kemour eo jemeer. Ta kōjeraam̧m̧an ko raar itok jān kijejeto in? Ta ļōmņak ko membōr ro rej bōk me remaron̄ jipan̄ er kemour kadkad ko aer make?
Neil L. Andersen, “Ikkinejnej”
N̄an kwaļo̧k kadkad in ennaan eo an Elder Andersen komaron̄ riit ippān doon Luk 10:30–35 ak alooje pija eo “Parable of the Good Samaritan” (LDS.org). Ekōjkan ad aolep āinwōt em̧m̧aan eo eaar pād ilubwilijin riko̧o̧t ro? Ekkar n̄an Elder Andersen, in ta ļamļam eo Jisōs Kraist ej “Risamaria eo Em̧m̧an ad”? Ekōjkan ad maron̄ bōk An kemour? Bōlen komaron̄ kūr membōr ro n̄an kwaļo̧k wāween ko me Rilo̧mo̧o̧r eo eaar kemour kinej ko aer ak kinej ko an ro rej iakwe er. Remaron̄ barāinwōt etale naan ko an Elder Andersen n̄an pukōt ennaan in kōketak eo me remaron̄ kwaļo̧ke ippān jabdewōt eo ej ikkinejnej.
Russell M. Nelson, “Jim̧we in Etan Kabun̄ in”
Jisōs Kraist eaar kakien bwe Kabun̄ in en kar an̄inn̄in ālkin Etan. Komaron̄ jipan̄ membōr ro kōļapļo̧k ikdeelel eo aer n̄an ļoor tōl in kōn kūr er n̄an etale ennaan eo an Būreejtōn Nelson, kappukōt wun ko etke “āt eo etan Kabun̄ ejjab maron̄ leļo̧k letok kake .” Innām, kūr er n̄an etale jem̧ļo̧k in ennaan eo an Būreejtōn Nelson kōn kallim̧ur ko eaar ba renaaj itok ilo ad jerbal n̄an “kōjepļaaktok āt eo ejim̧we etan Kabun̄ eo an Irooj.” Ta eo jemaron̄ kōm̧m̧ane n̄an jipan̄ ilo kijejeto in?
Henry B. Eyring, “Kajjieon̄, Kajjieon̄, Kajjieon̄”
Būreejtōn Eyring ej kōm̧m̧ane “ruo kajjitōk ko rekanooj aorōk”: “Ta eo ij aikuj kōm̧m̧ane n̄an bōk etan [Rilo̧mo̧o̧r eo] ioō ?” im “Ekōjkan aō naaj jeļā n̄e ij kōm̧m̧an eddōkļo̧k?” Bōlen komaron̄ je kajjitōk kein ioon boot eo im kūr membōr ro n̄an kwaļo̧k ļōmņak ko rej bōk kōn kajjitōk kein jān ennaan eo an Būreejtōn Eyring im waanjon̄ak eo an Sister Eyring. Būreejtōn Eyring ej barāinwōt kōnono kōn al eo “I’m Trying to Be like Jesus” (Children’s Songbook, 78–79). Ta eo naan ko an al in rej kobaik n̄an ekōnono eo?
Dale G. Renlund, “Kom̧win Kāālōt Rainin”
Membōr ro remaron̄ ļōmņak kōn juon eo rej kōņaan kōketake n̄an ļoor karōk eo an Jemed Ilan̄, ko āinwōt juon uwaan baam̧le eo ak juon eo me rej katakin. Innām remaron̄ etale ennaan eo an Elder Renlund n̄an lo ekōkjan an Jemed Ilan̄ im Jisōs Kraist en̄jake kōn kōj. Ekōjkan Aer jipan̄ kōj kālet pokake? Ta eo waanjon̄ak eo Aer ej kwaļo̧k kōn ekōjkan ad maron̄ kōkōm̧anm̧anļo̧k kijejeto ko ad ilo baam̧le ko im ad jerbal in karejar?
Gary E. Stevenson, “Seperd n̄an Jetōb ko”
Ro kwoj katakin remaron̄ kar kajjitōk juon kajjitōk āinwōt in jān ennaan eo an Elder Stevenson: “Ekōkjan ad jeļā jej jerbal in karejar ilo wāween eo an Irooj?” Remaron̄ jeraam̧m̧an jān ekōnono kōn uwaak ko remaron̄ n̄an kajjitōk in me rej lo ilo ennaan in. Ijello̧kin, komaron̄ bōktok pija eo kōn Rilo̧mo̧o̧r āinwōt juon seperd (lale Gospel Art Book [2009], no. 64) im kūr membōr ro n̄an kwaļo̧k juon m̧ool jān ennaan eo an Elder Stevenson me pija eo jutak kake. Innām membōr remaron̄ kwaļo̧k men ko me raar aorōk n̄an kōm̧m̧ani āinwōt juon tōprak in ekōnono eo.