Kweilo̧k ko ilo Jabōt Kein Kemān (Oktoba–Tijem̧ba 2018)
Ekkatak Jeje Ko Rekwojarjar an Juon Make im Baam̧le
Ilo Jabōt ko kein kemān ilo 2018, doulul eo an elder ro im Doulul eo an Kōrā ro renaaj ekōnono kōn ekkatak jeje ko rekwojarjar an juon make im baam̧le. Ritōl ro ak rūkaki ro remaron̄ kālet n̄an tōl ekōnono ko ilo jabdewōt pedped in katak ko rej ellaajrak.
Ekkatak Jeje ko Rekwojarjar an Juon Make
N̄an jipan̄ im̧we membōr ro n̄an ekkatak jeje ko rekwojarjar aolep iien, ļōmņak in kajjitōk ippān kajjojo membōr n̄an kālet juon iaan eoon kein n̄an riit: Joshua 1:8; 2 Timote 3:15–17; 1 Nipai 15:23–25; 2 Nipai 32:3; Katak im Bujen ko 11:22–23; 33:16–18. Ālkin an wōr aer iien n̄an riit im kejekļo̧kjeņ, remaron̄ kwaļo̧k ippān bar juon ilo ruum̧ eo ta eo eoon eo aer ej katakin er kōn ekkatak jeje ko rekwojarjar.
Komaron̄ barāinwōt kūr membōr ro n̄an kwaļo̧k naan in kam̧ool ko aer kōn kōjeram̧man ko rej būki ilo aer ekkatak jeje ko rekwojarjar. Membōr ro remaron̄ barāinwōt jeraam̧m̧an jān ron̄jake an doon kwaļo̧k ta eo raar kōm̧m̧ane n̄an kōm̧m̧an bwe ekkatak jeje ko rekwojarjar an juon make en ļap meļeļe in (lale jet iaan waanjon̄ak ko ilo “Ļōmņak ko n̄an Kōkōm̧anm̧anļo̧k Ekkatak Jeje Ko Rekwojarjar An Juon Make” ilo Itok, Ļoor Eō—N̄an Kajjojo Armej im Baam̧le ko). Komaron̄ kwaļo̧k ippān membōr ro ta eo Elder Quentin L. Cook eaar katakin kōn “Jibadbad ko im kōjeraam̧m̧an ko rej pād ilo [oktak eo ilo jikejuul in Jabōt] im oktak ko jet im̧aanļo̧k” (lale “Oktak eo Em̧wilaļ im Aitok Kitien n̄an Jemedwōj Ilan̄ im Irooj Jisōs Kraist,” Liaona, Nob. 2018). Membōr ro remaron̄ ekōnono kōn ekōjkan an kijejeto ko ad aikuj kōkōm̧anm̧anļo̧k ekkatak jeje ko rekwojarjar emaron̄ jipan̄ kadedeļo̧k jibadbad kein. Pija kein ilo LDS.org remaron̄ barāinwōt im̧we membōr ro: “Words with Friends,” “The Blessings of Scripture,” “Daily Bread: Pattern,” im “What Scriptures Mean to Me.”
Jokkun wōt juon ilo Ekkatak Jeje Ko Rekwojarjar
Elder David A. Bednar eaar keidi jokkun wōt juon ekkatak jeje ko rekwojarjar an baam̧le im iminene ko jet rejim̧we n̄an brushstroke ko reddik me rej kōm̧m̧ane juon pija eaiboojoj. N̄an jipan̄ membōr ro meļeļe ta eo Elder Bednar eaar katakin, bōlen komaron̄ kwaļo̧k juon pija me burshstroke ko an rijin̄a eo rej alikkar. Innām membōr ro remaron̄ riiti waanjon̄ak eo an Elder Bednar, epād ilo “More Diligent and Concerned at Home” Liahona, Nob. 2009, 19–20), im ekōnono kōn ekōjkan an brushstroke ko ilo pija in rej āinwōt ekkatak jeje ko rekwojarjar. Ta eo ekar jipan̄ kōj anjo̧ ioon kabbōjrak ko n̄an jokkun wōt juon ilo ekkatak jeje ko rekwojarjar, eļan̄n̄e jej ekkatak jeje ko rekwojarjar āinwōt kajjojo armej ak ippān baam̧le ko ad? Ta eo Būreejtōn Russell M. Nelson eaar kallim̧uri ro me rej “kate er n̄an bar kōkāāl [m̧ōko im̧wer] n̄an juon jikin ekkatak gospel eo”? (lale “Erom̧ Riwaanjon̄ak ro rej Armej ro Rekwojarjar ilo Raan-ko Āliktata,” Liaona, Nob. 2018). Leļo̧k iien n̄an membōr ro n̄an kejekļo̧kjeņ im kwaļo̧k ta eo rej im̧we n̄an kōm̧m̧ane kōnke kōn ta eo raar katak raan eo.
Ekōnono ko an Gospel ilo M̧weo im ilo Kabun̄ in
Juon wāween n̄an jipan̄ membōr ro meļeļe aorōk eo an ekōnono ko an gospel eo ilo m̧weo im m̧ōn jar eo emaron̄ in n̄an kūr juon ajri im juon jinen ak jemen n̄an al “Katakin Eō Etal Lo Meram̧” (Al, nō. 304). Ta ikitōltōl eo ikōtaan ajri eo im jinen ak jemen ilo naan in al in ej katakin kōj kōn ekkatak gospel eo? Bōlen jet membōr ro renaaj m̧ōņōņō n̄an kwaļo̧k ļōmņak ko aer kōn ekōjkan n̄an kōm̧m̧an bwe ekōnono ko an gospel eo en juon men ej make waļo̧k im m̧ōttan mour an baam̧le aolep iien. Eoon kein remaron̄ letok meļeļe ealikkar: Duteronomi 11:18–20; 1 Piter 3:15; Mosaia 18:9; Moronai 6:4–5, 9; Katak im Bujen ko 88:122. Ekōjkan an ekōnono ko ad ilo m̧weo im ilo m̧ōn jar eo maron̄ kepaakļo̧k kōj n̄an Jemed Ilan̄ im Jisōs Kraist?