2018
Visōn eo kōn Lo̧mo̧o̧r eo an ro Remej
Oktoba 2018


Visōn eo kōn Lo̧mo̧o̧r eo an ro Remej

Ij kam̧ool bwe visōn eo an Būreejtōn Joseph F. Smith ekar loe em̧ool. Ij kam̧ool bwe aolep armej remaron̄ jeļā bwe em̧ool.

Ro jeiū im jatū, ekōnono in aō kar kōpooje e jet iien m̧oktaļo̧k jān iien mej eo an kōrā eo pāleeō, Barbara. Baam̧le eo aō im n̄a kōm ej kam̧m̧oolol kom̧ kōn ami iakwe im ami jouj n̄an kōm. Ij jar bwe Irooj en kōjeram̧m̧an n̄a ilo aō kōnono n̄an kom̧ ilo jibbon̄ōnin.

Ilo Oktoba 1918, 100 iiō remootļo̧k, Būreejtōn Joseph F. Smith ekar lo juon visōn eaibojooj. Ālkin enan̄in 65 iiō in aer kar wūjlepļo̧k ilo jerbal in an Irooj ilo Kabun̄ eo an Jisōs Kraist im Armej Ro Rekwojarjar ilo Raan-Ko Āliktata, im jejjo raan m̧okta jān mej eo an ilo Nobōm̧ba 19, 1918, ekar jijjet ilo ruum̧ eo an im kejōkļo̧kjeņ kake katok in pinmuur eo an Kraist im riiti kōmeļeļe ko an Rijilōk Piter kōn jerbal in karejar eo an Rilo̧mo̧o̧r ilo laļ eo an Jetōb ālkin mej eo An ioon debwāāl.

Ekar je: “Ke ikar riiti ikar lukkuun bwilōn̄. … Ke iaar kōļmānļo̧kijeņ kaki men kein … , mejān aō meļeļe rekar peļļo̧k, im Jetōb eo an Irooj eaar pād ioō, im iaar lo inelep ko an ro remej.”1 Aolep naan ko ilo visōn eo kar je ilo Katak im Bujen Ko jekjōņ 138.

Ikōņaan kwaļo̧k jet background bwe en ļapļo̧k ad kam̧m̧oolol kōn mour eo an Joseph F. kōn an kar kōpopo n̄an bōk revelesōn in ekabwilōn̄lōn̄.

Pija
Joseph im Hyrum Smith rej iuwe ioon kidia ko

Ke ekar juon Būreejtōn an Kabun̄ in, ekar loļo̧k Nauvoo ilo 1906 im kar reilikļo̧k n̄an juon ememļo̧kjeņ ke ekar ļalem wōt an iiō. Ekar ba: “En̄in ej jikin eo ejejjet ijo ikar jutak ie ke [Josep, wūllepa, im jema, Hyrum] rekar iuwe ioon kidia ko n̄an jipadekļo̧k Carthage. Ijjeļo̧kin an jema to jān kidia eo jema ekar m̧al maantak im kotak eō jān laļ. Ekar mejenmāiki eō iakweiki eō im bar likūt eō laļļo̧k im ikar lo an m̧ootļo̧k.”2

Iien eo tok juon Joseph F. ekar lo er, jinen, Mary Fielding Smith, ekar kotak e bwe en lale an Joseph Smith im Hyrum Smith ro me raar pojak in m̧an er, rekar babu turin doon ālkin aer kar kōmetak erro ilo jikin Kalbuuj Carthage ilo Juun 27, 1844.

Ruo iiō tokālik, Joseph F., ippānļo̧k baam̧le eo an im jinen eo etiljek, Mary Fielding Smith, kar em̧akūt jān m̧weo imōer ilo Nauvoo n̄an Winter Quarters. Men̄e ejjan̄in kar rualitōk an iiō, Joseph F. ekar aikuj bwe en tōl juon iaan kurup in armej ro me rej em̧akūt kōn kau ko jān Montrose, Iowa, n̄an Winter Quarters innām tokālik n̄an Salt Lake Valley, rekar itaakļo̧k ijeņ ke epaake an 10 an iiō. Ij kōjatdikdik bwe kom̧ ļaddik raņ im likao raņ rej ron̄jake im naaj kile eddo ko im kōjatdikdik ko kar likūt ņa ioon Joseph F. ke ekar juon ļaddik jidikdik.

Emān iiō tokālik, ilo 1852, ke ekar 13 an iiō, jinen eo ejitōn bōro ekar mej—ekar likūt Joseph im ajri jiddik ro jatin.3

Joseph F. kar kūr n̄an jerbale juon mijen ilo aelōn̄ ko ilo Hawaii ilo 1854 ke ekar 15 an iiō. Mijen in, eo ekar jem̧ļo̧k elōn̄ļo̧k jān 3 iiō, kar jinoin an kōm̧m̧ane jerbal in jipan̄ ilo kabun̄ in.

Jepļaak eo an n̄an Utah, Joseph F. ekar m̧are ilo 1859.4 Ilowaan jejjo iiō tokālik, mour eo an ekar obrak kōn jerbal, eddo ko an baam̧le, im kobain mijen ko ruo. Ilo Juļae 1, 1866, ke ej 27 an iiō, mour eo an Joseph F. ekar oktak ke ekar ekkapit āinwōt juon Rijilōk jān Brigham Young. Ilo Oktoba ilo iiō eo tokālik, ekar bōk jerbal in ilo Ko̧o̧njel eo an Jon̄oulruo.5 Ekar jerbal āinwōt juon rikakpilōklōk n̄an Brigham Young, John Taylor, Wilford Woodruff, Lorenzo Snow m̧okta jān an kar erom̧ Būreejtōn ilo 1901.6

Joseph F. im kōrā eo pāleen rekar m̧ōņōņō kōn ļōtak tok eo an m̧aanje eo nejierro, Mercy Josephine, n̄an baam̧le eo.7 Ekar ruo jimatten wōt an iiō ke ekar mej. Ejjab to tokālik, Joseph F. ekar je: “Ejejet juon allōn̄ inne jān iien eo … jitōnbōro eo aō ekar jako. O! menin imaron̄ kar lo̧mo̧o̧ren e bwe en erom̧ juon jiron̄. Ij o̧o̧n̄ kake aolep raan im ij ajimakeke. … Anij jeorļo̧k aō bōd eļan̄n̄e ebōd bwe in iakwe ajri jiddik rein nejū āinwōt aō iakwe er.”8

Ilo aolepān mour eo an, Būreejtōn Smith ekar luuji jemān, jinen, ļaddik eo jein im jejtōr ro ruo an, kōrā ro ruo pāleen, im ajri ro jon̄oul jilu nejin. Ekar obrak kōn būromōj im mejļo̧k ro rejitōn bōro ippān.

Ke ļaddik eo nejin Albert Jesse ekar mej, Joseph F. ekar jeje n̄an jejtōr eo an Martha Ann im kwaļo̧k ke ekar akweļap n̄an Irooj bwe en lo̧mo̧o̧ren e im ekar kajjitōkin, “Etke āindein? O. Anij etke ekar aikuj bwe en āindein?”9

Jekdo̧o̧n jar ko an ilo iien eo, Joseph F. ekar jab bōk uwaak kōn jōkjōk eo.10 Ekar ba n̄an Martha Ann bwe “lan̄ ko [ilo kalimjōkļo̧k] eban bōk uwaak ko jān Irooj” kōn menin mej im laļ eo an Jetōb. Ijoke, tōmak eo an ilo kallim̧ur ko an Irooj n̄an indeeo rekar dim im pen.

Ilo iien ko rejejjet an Irooj, kobain uwaak ko, aenōm̧m̧an, im meļeļe kōn laļ eo an Jetōb ko me rej kappukōt rekar itok n̄an Būreejtōn Smith āinwōt juon visōn ekwabwilōn̄lōn̄ eo ekar lo ilo Oktoba 1918.

Iiō ņe ekar lukkuun kōmetak n̄an e. Ekar būromōj kōn jon̄an armej ro raar mej ilo pata eo an laļ in kein kajuon me ekar wōnm̧aanļo̧k wōt im ļapļo̧k n̄an ilōn̄ļo̧k 20 milien armej rekar mej. Kobain ļo̧k menin, juon nan̄inmej in flu ekar ajedeed ipeļaakin laļ in, im bōk mour an elōn̄ tarin 100 milien armej.

Pija
Elder Hyrum Mack Smith

Ilo iiō ņe, ekar bar mej jilu iaan baam̧le eo an Būreejtōn Smith. Elder Hyrum Mack Smith jān Doulul eo an Jon̄oulruo Rijilōk, ļaddik m̧aanje eo nejin im jim̧m̧aan, rekar mej kōn jidimkij in an rūb m̧ōjn̄al.

Būreejtōn Smith ekar je: “Ejjeļo̧k aō naan—[obrak] kōn buromōj! … Ekar lukkuun rūb buruō; im ejjeļo̧k kōjatdikdik kōn mour! … O! Ij iakwe e! … Inaaj iakwe e n̄an indeeo. Im āindein im naaj indeeo pād ippān ļaddik im leddik ro nejū ak ej m̧aanje eo nejū ilo ļaddik, eo me ekar m̧oktata bōktok n̄an eō lan̄lōn̄ im kōjatdikdik eo me ejjeļo̧k jem̧ļo̧kin, etan eo eutiej ilubwiljin armej. … Jān tum̧ūlaļ in būruō ij kam̧m̧oolol Anij kōn e! Ak … O! Ikar lukkuun aikuj e! Jekar aolep aikuj e! Ekar ļap tokjān ilo Kabun̄ in. … Im kiiō, … O! ta eo imaron̄ kōm̧m̧ane! … O! Anij jipan̄ eō!”11

Allōn̄ eo tokālik, ļaddik eo pāleen nejin Būreejtōn Smith, Alonzo Kesler, ekar mej kōn juon jorāān ekabūromōjmōj.12 Būreejtōn ekar je ilo jōōnōļ eo an, “Jorrāān in eļap an nana im kaburomōjmōj, ekar bar juon alen kabūromōj aolep baam̧le eo aō.”13

Jiljilimjuon allōn̄ tokālik, ilo Jeptōm̧ba 1918, leddik eo pāleen nejin Būreejtōn Smith im lillap eo jibū, Ida Bowman Smith, ekar mej ālkin an kar kōmmour n̄an ajri eo kein kaļalem, unlepa Hyrum.14

Im ekar barāinwōt ilo Oktoba 3, 1918, kar en̄jake būromōj eļap kōn milien armej ro rekar mej ilo laļ in kōn pata eo im kōn nan̄inmej barāinwōt mej an baam̧le eo an, Būreejtōn Smith ekar bōk juon revelesōn jān lan̄ ņa etan “visōn eo kōn lo̧mo̧o̧r eo an ro remej.”

Pija
Būreejtōn Joseph F. Smith

Ekar kwaļo̧k kōn revelesōn eo raan eo tokālik ilo iien kōpelļo̧k in mwen̄an eo an Oktoba kweilo̧k eo eļap. Būreejtōn Smith ekar jino nan̄inmej, jekdo̧o̧n ekar kōnono jidik: “Ijamin, ijamin teej eō, kajjieon̄ n̄an kōnnaan kōn elōn̄ men ko me rej jiktok ilo kōļmenļo̧kjeņ eo aō jibbon̄in, im naaj karūm̧ūjļo̧k m̧ae jet iien ilju im jekļaj, Irooj ekōņaan, kajjieon̄ in aō n̄an ba n̄an kom̧ bwe jet iaan men ko ilo kōļmenļo̧kjeņ eo aō, im bwe repād ilo būruō. Ijjan̄in kar mour ajimakeke ilo allōn̄ kein ļalem [remootļo̧k]. Em̧ōj aō pād ilo jetōb in jar, kōn jipan̄ im kōn ļōmļōm; im em̧ōj aō bōk elōn̄ iaļan ekōnono ippān jetōb an Irooj me ej wōnm̧aanļo̧k wōt.”15

Revelesōn eo ekar bōke ilo Oktoba 3 ekar kaenōm̧m̧an būruōn im leļo̧k uwaak n̄an elōn̄ iaan kajjitōk ko an. Kōj barāinwōt jemaron̄ bōk kaenōm̧m̧an im ekkatak eļapļo̧k kōn ilju im jekļaj eo ad n̄e kōj im ro jej iakwe er remej im etal n̄an laļ eo an jetōb ilo ad ekkatak kōn revelesōn in im kejōkļo̧kjeņ kake aorōkin ilo wāween ad mour kajjojo raan.

Juon iaan men ko rellōn̄ Būreejtōn Smith ekar lo ej loļo̧k eo an Rilo̧mo̧o̧r n̄an armej ro retiljek ilo laļ eo an jetōb ālkin mej eo An ioon debwāāl. Jān visōn in Ij kout:

“A lo, jān ilubwiljin ro rejim̧we, Eaar karōke jarin jerbal ko An im jitōn̄ ribōkļo̧k naan ro, ņa ballier kōn kajoor im maron̄, im kappe er n̄an ilo̧k im bōkļo̧k meram in gospel eo n̄an er ro im rekar pād ilo marok, em̧ool n̄an aolep jetōb ko an m̧aan [im kōrā ro];16 im āindein gospel eo kar kwaļo̧k e n̄an ro remej. …

“Rein kar katakin er tōmak ilo Anij, ukeļo̧k jān jero̧wiwi, peptaij ilo etan ro jet n̄an jeorļo̧k jero̧wiwi ko, mennin letok eo an Jetōb Kwōjarjar jān likūt pā ko ioon,

Im aolep pedped ko an gospel eo ko rekar aikuji n̄an aer jeļā bwe ren maron̄ kōm̧m̧an bwe ren tōllo̧ke bwe ren maron̄ ekajet ekkar n̄an armej raņ ilo kanniōk, a mour ekkar n̄an Anij ilo jetōb. …

Bwe ro remej rekar watōke jon̄an aetokan jako eo an jetōb ko aer jān ānbwinnier āinwōt juon lokjak.

“Rein Irooj eaar katakin er, im leļo̧k n̄an er kajoor n̄an jerkak, ālikin jerkakpeje eo An jān ro remej, n̄an deļo̧n̄ļo̧k ilo aelōn̄ eo an Jemān, ijo n̄an pālpel kōn mour ejjeļo̧k jem̧ļo̧kin im mour indeeo,

“Im wōnm̧aanļo̧k wōt jān iien en m̧aanļo̧k aer jerbal āinwōt kar kallim̧ur jān Irooj, im ribōk ilo aolep kōjeraam̧m̧an ko me rekar dāpij ilo jabwi n̄an er ro rej iakwe E.”17

Pija
Annan̄ in Joseph im Hyrum Smith

Ilo visōn eo, Būreejtōn Smith ekar lo jemān, Hyrum, im Rikanaan Josep Smith. Em̧ōj an m̧ootļo̧k 74 iiō jān iien eo ekar lo er ke ekar juon ļaddik jidikdik ilo Nauvoo. Jemaron̄ pijaikļo̧k wōt jon̄an lan̄lōn̄ eo an ke ej lo ro rejitōnbōro jemān im unlepān. Jon̄an ņe em̧ōj im̧we e im kaenōm̧m̧an e n̄an jeļā ke aolep jetōb rej āinwōt ilo lale ānbwinid ilo mour in im rej kijōrjōr in kōttar raan eo em̧ōj kallim̧ur er kōn jerkakpeje eo. Visōn eo ekar kwaļo̧k dipio in meļeļein karōk eo an Jemedwōj Ilan̄ n̄an ro Nejin im kōn Pinmuur in iakwe eo an Kraist im kajoor in pinmuur eo An me jab maron̄ keidi.18

Ilo raan in ejeņoļo̧k 100 in kakemeemej, ij kūr kom̧ n̄an lukkuun riiti im kejokļo̧kjeņ kake revelesōn in. Ilo am̧ kōm̧m̧ane āindein, Irooj en kōjeraam̧m̧an eok kōn eļapļo̧k meļeļe im kam̧m̧oolol kōn iakwe eo an Anij im karōk in lo̧mo̧o̧r im m̧ōņōņō eo n̄an ro Nejin.

Ij kam̧ool bwe visōn eo an Būreejtōn Joseph F. Smith ekar loe em̧ool. Ij kam̧ool bwe aolep armej remaron̄ riiti im jeļā bwe em̧ool. Ro rejjan̄in bōk jeļāļo̧kjeņ in ilo mour in renaaj juon raan jeļā m̧ool ko an n̄e aolep renaaj tōparļo̧k ilo laļ eo an Jetōb. Ijeņ, aolep naaj iakwe im nōbar Anij im Irooj Jisōs Kraist kōn karōk in lo̧mo̧o̧r eo em̧m̧an im kōjeram̧m̧an ko an Jerkakpeje eo em̧ōj kar kallim̧ur kake n̄e ānbwin im jetōb renaaj bar juon alen koba ippān doon, im jamin bar jepel jān doon.19

Pija
Sister Barbara Ballard

Eļap aō kam̧m̧oolol kōn aō jeļā ia eo Barbara eo ejitōnbōro ippa epād ie im bwe jenaaj bar mour ippān doon juon alen, ippān baam̧le eo am, n̄an indeeo. Aenōm̧m̧an an Irooj en rejtake kōj kiiō im n̄an indeeo ej jar eo aō in ettā ilo etan Jisōs Kraist, amen.

Kakeememej ko

  1. Katak im Bujen Ko 138:6, 11.

  2. Joseph F. Smith, in Preston Nibley, The Presidents of the Church (1959), 228.

  3. Lale Joseph Fielding Smith, Life of Joseph F. Smith (1938), 13.

  4. Ekar mareiki Levira Clark ilo 1859, Julin Lambson ilo 1866, Sarah Richards ilo 1868, Edna Lambson ilo 1871, Alice Kimball ilo 1883, im Mary Schwartz ilo 1884.

  5. Joseph F. Smith kar kūr āinwōt juon iaan rikakpilōklōk ro ilo Būreejtōnji eo Kein Kajuon (Brigham Young, Heber C. Kimball im Daniel H. Wells). Im ekar jerbal āinwōt Rikakpilōklōk eo Kein karuo ilo Būreejtōnji eo Kein Kajuon n̄an jilu Būreejtōn an Kabun̄ in Būreejtōn John Taylor, Wilford Woodruff, im Lorenzo Snow.

  6. Joseph F. Smith ekar jerbal āinwōt juon rikakpilōklōk n̄an Būreejtōnji eo Kein Kajuon ilo iien eo Brigham Young ekar tōl im jerbal āinwōt Rikakpilōklōk eo Kein karuo ilo Būreejtōnji eo Kein Kajuon ilo iien tōl eo an John Taylor, Wilford Woodruff, im Lorenzo Snow. Ekar Būreejtōn eo jinointata an Kabun̄ in n̄an jerbal ilo Būreejtōnji eo Kein Kajuon m̧okta jān kar kūr e āinwōt juon Būreejtōn.

  7. Mercy Josephine, Maanje eo Nejin Joseph F, ekar ļotak ilo Okwōj 14, 1867, im ekar mej ilo Juun 6, 1870.

  8. Joseph F. Smith, journal, Juļae 7, 1870, Church History Library, Kabun̄ eo an Jisōs Kraist im Armej ro Rekwojarjar ilo Raan-ko Āliktata, Salt Lake City, Utah.

  9. Joseph F. Smith to Martha Ann Smith Harris, Aug. 26, 1883, Church History Library; lale Richard Neitzel Holzapfel and David M. Whitchurch, My Dear Sister: The Letters between Joseph F. Smith and His Sister Martha Ann (2018), 290–91.

  10. Ilo elōn̄ waanjon̄ak ko, Irooj ekar tōl Joseph F. Smith ilo mour eo an make im ilo iien jerbal in karejar eo an āinwōt juon Rijilōk im Būreejtōn an Kabun̄ in kōn ettōņak ko an reim̧we, revelesōn ko, im visōn ko. Ekkā an mennin letok kein reaorōk jān Irooj rekar je ilo jōōnaļ eo an, kwaļo̧k ko an, ememļo̧kjeņ ko an, im rekoot ko em̧ōj kōmālimi ilo Kabun̄ in.

  11. Joseph F. Smith, journal, Jan. 23, 1918, Church History Library; spelling and capitalization modernized; lale Joseph Fielding Smith, Life of Joseph F. Smith, 473–74.

  12. Lale “A. [P.] Kesler Is Killed in Fall from a Building,” Ogden Standard, Feb. 5, 1918, 5.

  13. Joseph F. Smith, journal, Feb. 4, 1918, Church History Library.

  14. Lale “Ida Bowman Smith,” Salt Lake Herald-Republican, Sept. 26, 1918, 4.

  15. Joseph F. Smith, ilo Conference Report, Oct. 1918, 2.

  16. Lale eoon in jipan̄ in n̄an “eo eaiboojoj Jined Iv, im “kōrā ro nejin retiljek … kar kabun̄-jar n̄an Anij eo em̧ool im emour” (Katak im Bujen Ko 138:39).

  17. Katak im Bujen Ko 138:30, 33–34, 50–52.

  18. Jeje ko an visōn eo ekar jino waļo̧k ilo Nobōmba 30, 1918, kape in Deseret News, 11 raan ālkin jako eo an Būreejtōn Smith, ilo Nobōmba 19. Kar Būriini ilo Tijōm̧ba Improvement Era im ilo Jānode 1919 kape inMāākijiin ko an Kōrā ro,Utah Genealogical im Historical Magazine, Young Women’s Journal, im Millennial Star

  19. Men̄e m̧aan ro nejin rijum̧ae eo renaaj jerkakpeje, remaron̄ jab kwaļo̧k iakwe im nōbar n̄an Jemedwōj Ilan̄ im Jisōs Kraist āinwōt an naaj ro rej bōk juon aibojooj an aelōn̄ in kiin̄ eo. Lale Alma 11:41; Katak im Bujen Ko 88:32–35.