Kuktok Ippān Doon ilo Juon wot Kōn Men Otemjej ilo Kraist
Jān Elder David A. Bednar
Jān Doulul eo an Jon̄oulruo Rijilōk ro
Kajoor eo an gospel eo an Rilo̧mo̧o̧r eo n̄an ukōt im kōjeraam̧m̧an kōj ej ibebtok jān kile im kōjerbale jem̧jerā eo eoktak an katak ko, pedped in katak ko, im imminene ko.
Juon to ej juon kein jerbal eaorōk eo me kōj aolep jej jeļā kake. To ko rej kōm̧m̧an jān iden m̧ōttan an tōreej ko, mennin eddōk ko, wea, ak men ko jet me er kajjojo em̧ōj nikuwiji jan̄it ko ippān doon ak birōki. Ekaitok limo, bwe men kein rejjab maron̄ oktak maron̄ ekkejel ippān doon im erom̧ juon men emaron̄ oktak im kajoor. Kōn tōprak in, ekkejeltok eo ewājabdik im likwōj men ko rejjab maron̄ oktak emaron̄ ejaake juon kein jerbal ekajoor.
Āinwōt juon to ej bōk kajoor eo an jān elōn̄ iden tōreej ko rej po̧po ippān doon, barāinwōt gospel eo an Jisōs Kraist ej letok loļo̧kjeņ eo eļap kōn m̧ool eo im letok kōjeraam̧m̧an ko reļļap āinwōt ad eo̧ron̄ naan in rōjan̄ eo an Paul n̄an “En kobaik men otemjej ilo Kraist, men ko i lan̄, im men ko i laļ.”1 Aorōktata eo, kuktok ippān doon in eaorōk kōn m̧ool ej ioļapļap in im ej pedped wōt ioon Irooj Jisōs kōnke E ej “N̄a iaļ, im m̧ool, im mour.”2
Ij jar bwe Jetōb Kwojarjar eo enaaj kōmeramļo̧k kōj kajjojo ilo ad kōļmenļo̧kjeņ kōn wāween an pedped in katak eo kōn Kuktok Ippān Doon ilo Juon wot Kōn Men Otemjej ilo Kraist jerbal ilo wāween ko rewājabdik n̄an ekkatak im mour kōn jepļaaktok in gospel eo An ilo mour ko ad aolep raan.
Juon Tōre in Bōk Eļap Revelesōn
Jej mour ilo juon tōre ekabwilōn̄lōn̄ im bōk eļap revelesōn an jepļaaktok in Kabun̄ eo an Jisōs Kraist. Oktak ko rebun̄bun̄ kar kōjjeļļā kaki rainin ewōr wōt juon aer jibadbad emenin aikuj: n̄an kōkajoorļo̧k tōmak ilo Jemedwōj Ilan̄ im karōk eo An im ilo Nejin Jisōs Kraist, im Pinmuur eo An. Jikejuuļ in kweilo̧k ko an raan in Jabōt rekar jab baj kaduļo̧k wōt. Ijjelo̧kin, kōj kiiō jekar kōļapļo̧k iien ko rem̧m̧an im eddo ko āinwōt kajjojo armej im baam̧le ko n̄an kōjerbal iien eo ad n̄an kōkōm̧anm̧anļo̧k raan in Jabōt āinwōt juon raan elan̄lōn̄ ilo m̧weo im ilo imōnjar eo.
Eprōļ eo ļo̧k, karōkan ra eo an doulul ko an priesthood rekar lukkuun oktak. Ijjelo̧kin, aorōk eo im kajoor eo kar leļo̧k n̄an juon wāween eo eutiejļo̧k im kwojarjarļo̧k ilo jerbal in karejar n̄an ro jeid im jatū.
Eļap im āinwōt iden pirōkrōk in juon to ej kwaļo̧k e juon kein jerbal ekajoor im epen, aolepān m̧akūtkūt kein rej m̧ōttan wōt juon kijejeto in jerbal ippān n̄an kajjejjet jibadbad eo, jipan̄ ko, im jerbal eo an Kabun̄ eo an Rilo̧mo̧o̧r eo em̧ōj an jepļaaktok ippān mijen eo an eaorōk: n̄an jipan̄ Anij ilo jerbal eo An n̄an bōktok lo̧mo̧o̧r im ijo eutiejtata an ajri ro Nejin. Jouj im jab pedped wōt ioon inepata ko kōn wāween bōktok ilo kanniōk ta eo kar kōjjeļļā kake. Jej aikuj jab kōtļo̧k an meļeļe ko ilo wāween jerbali bōbrae unin jibadbad ko remenin aikuj ilo oktak kein kiiō rej kōm̧m̧an.
Ikdeelel eo ad ej bwe tōmak ilo karōk eo an Jemed im ilo jerbal in pinmuur eo an Rilo̧mo̧o̧r eo emaron̄ ļapļo̧k ilo laļ in im bwe bujen eo āliktata im ejjeļo̧k jem̧ļo̧k maron̄ in ejaak.3 Jibadbad ko wōt ad rej n̄an kōjekiiki oktaktok eo ej wōnm̧aanļo̧k n̄an Irooj im n̄an iakwe eļapļo̧k im jerbal ewājabdikļo̧k n̄an ro jeid im jatid.
Kalikkar Kūrub ko Rejjejet im Kōjnolo̧k Er
Jet iien āinwōt ro uwaan Kabun̄ eo, jej karōk, kōjonolo̧k, im kōjerbal gospel eo ilo mour ko ad ilo ad kōm̧m̧an laajrak ko in men ko raitok kōn unin kōnono ko an kajjojo armej im n̄an katak im jerbal ko n̄an kōttōbraki. Bōtaab kain kepaak rot in emaron̄ letok jon̄an ad meļeļe im visōn. Jej aikuj in tiljek kōnke jibadbad eo an Riparisi ro ekar pedped wōt ioon men ko n̄an etali remaron̄ kattoļo̧k kōj im jab kepaakļo̧k n̄an Irooj.
Jibadbad eo im karreo, lem̧ōņōņō im lan̄lōn̄, im wōnm̧aanļo̧k ilo oktaktok im kōjparok eo ej itok jān “kōtļo̧k [būruwōd] n̄an Anij”4 im “[bōk] nememein ilo [paotok eo] ad”5 rejjab maron̄ būki jān kōm̧m̧ani im kōkkaļļeiki aolep men ko an jetōb jekar aikuj in kōm̧m̧ani. Ijjelo̧kin, kajoor eo an gospel eo an Rilo̧mo̧o̧r eo n̄an ukōt im kōjeraam̧m̧an kōj ej ibebtok jān kile im kōjerbale jem̧jerā eo eoktak an katak ko, pedped in katak ko, im imminene ko. Ilo wōt n̄e jej kuktok ippān ilo juon wōt kōn men otemjej ilo Kraist, kōn jibadbad edim ilo E, maron̄ ko an m̧ool ko an gospel eo remaron̄ jerbal ippān doon n̄an kōmaron̄ ad erom̧ ta eo Anij ekōņaan bwe jen erom̧6 im niknik im peran n̄an jem̧ļo̧kin.7
Ekkatak im Kōkejeli Mool ko an Gospel
Gospel eo an Jisōs Kraist ej juon nuknuk eainōknōk “ekoņ ilo nien pija eo an”8 im pirōkrōke ippān doon. Ilo ad ekkatak im ekkejel ippān doon ej kwaļo̧k m̧ool ko an gospel eo, jej jeraam̧m̧an jān ad būki jibadbad ko raiboojoj im kōļapļo̧k maron̄ in jetōb ilo māj ko me remaron̄ loe kajoor eo an Irooj ilo mour ko im lo̧jiln̄i ko me remaron̄ in ron̄jake Ainikien.9 Im pedped in katak eo an kuktok ippān doon ilo juon wōt—aaet ilo E emaron̄ jipan̄ kōj ukōt laajrak in imminene ko ad n̄an juon eo eippān doon, ejem̧ļo̧k an jenolo̧k, im elikio. In lewaj jim̧or juon katak im juon waanjon̄ak an Kabun̄ kōn ta in ij kōnono kake.
Waanjon̄ak 1. Laajrak in tōmak emān ej juon iaan kōmeļeļe ko rem̧m̧antata kōn kuktok ippān doon ilo juon wōt ilo men otemjej ilo Kraist: “Kōmij tōmak bwe pedped ko im kain̄i ko m̧oktata an Gospel eo rej: kein kajuon, Tōmak ilo Irooj Jisōs Kraist; kein karuo, Ukeļo̧k; kein kajilu, Peptaij jān tulo̧k n̄an jeorļo̧k jero̧wiwi ko; kein kāāmen, Likūt pā ko ioon n̄an bōk mennin letok eo an Jetōb Kwōjarjar.”10
Tōmak eo em̧ool ej pedped wōt ilo im ioon Irooj Jisōs Kraist—ilo E āinwōt eo ekwojarjar im Nejin Emake Wōt im Jitōn Bōro Nejin Jemān im ilo E im jerbal in pinmuur eo Ekar kakūrm̧ool. “Bwe Eaar uwaake jem̧ļo̧k ko an kien eo, im Eaar bōk aolep ro raar tōmak ilo E; im ro eaar wōr aer tōmak ilo E renaaj eddāp n̄an men otemjej em̧m̧an; kōn menin E ej errā ilo jibadbad eo kōn ro nejin armej.”11 Kōjerbal tōmak ilo Kraist ej lōke im likūt ad lōke ilo E āinwōt ad Rilo̧mo̧o̧r, ilo Etan, im ilo kallim̧ur ko An.
Kein kajuon eo m̧oktata im waļo̧k rej itok tōprak ej make waļo̧kjān ejjeļo̧k kōtmāne kaki kōn lōke ilo Rilo̧mo̧o̧r eo ej ukweļo̧k im oktakļo̧k jān men eo enana. Ilo ad kōjerbal tōmak ilo im ioon Irooj, jej make oktakļo̧k ilo kar ejjeļo̧k kōtmāne, itok n̄an, im pedped wōt ilo E. Wāween in, ukweļo̧k ej lōke ilo im atartar ioon wōt ioon Rilo̧mo̧o̧r eo bwe en kōm̧m̧ane n̄an kōj ta eo jejjab maron̄ kōm̧m̧ane n̄an kōj make. Kōj kajjojo rej aikuj “[atartar] wōt ioon tōllo̧ke ko an Eo ekajoor n̄an lo̧mo̧o̧ren”12 kōnke wōt “kōn tōllo̧ke, im tūriam̧okake, im jouj an Messaia Ekwōjarjar”13 jemaron̄ erom̧ men in kōm̧anm̧an ko rekāāl ilo Kraist14 im eļaptata jepļaakļo̧k n̄an im deļo̧n̄ ilo im̧aan mejān Anij.
Kain̄i eo an peptaij jāņ tulo̧k kōn jeorļo̧k in jerawiwi ko ad n̄an lōke ilo E, atartar ioon E, im ļoor E. Nipai ekar kwaļo̧k, “Ijeļā bwe n̄e kom̧ naaj ļoor Nejin, kōn aolepān m̧wilaļ in buruō, kōn ejjeļo̧k etao im ejjeļo̧k m̧oņ im̧aan Anij, ak kōn bōro em̧ool, ukeļo̧k jān jero̧wiwi ko ami, im kam̧ool n̄an Jemān bwe kom̧ij m̧ōņōņō in bok ioomi etan Kraist, kōn peptaij—aaet, jān ļoor ami Irooj im ami Rilo̧mo̧o̧r laļļo̧k n̄an dān eo, ekkar n̄an An innaan, lo, innām kom̧ naaj bōk Jetōb Kwōjarjar.”15
Kain̄i eo kōn likūt pā ko n̄an menin letok eo an Jetōb Kwojarjar eo ej aikuji ad lōke ilo E, atartar ioon E, ļoor E, im bun̄ m̧aanļo̧k ilo E kōn jipan̄ eo an Jetōb Kwojarjar eo An. Āinwōt an Nipai kar ba, “Im kiiō … ijeļā jān men in bwe eļan̄n̄e juon armej ej jamin niknik n̄an jem̧ļo̧kin, ilo ļoor waanjon̄ok eo an Nejin Anij emour, e jamin bōk lo̧mo̧o̧r.”16
Laajrak in tōmak emān kōn tōmak ejjab baj kalikkar pedped in katak ko raorōk im kain̄i ko an jepļaaktok eo an gospel eo. Ijjelo̧kin, naan in eim̧we kōn tōmak ko an ro rej kuktok ippān doon ilo juon wōt ilo men otemjej ilo Kraist: lōke ilo im ioon E, atartar ioon E, ļoor E, im bun̄ m̧aanļo̧k Ippān—aaet ilo E.
Waanjon̄ak 2. Kiiō ikōņaan kōmeļeļeiki wāween an aolep būrookraam̧ ko an Kabun̄ in im ijjino ko kuktok ippān ilo juon wōt ilo Kraist. Elōn̄ kōmeļeļe ko jet maron̄ kwaļo̧ki; inaaj kōjerbali jejjo wōt iaer.
Ilo 1978 eo, Būreejtōn Spencer W. Kimball ekar kōmeļeļeik ro uwaan Kabun̄ in n̄an kōkajoorļo̧k Zaion ilo aolepān laļ in. Ekar kōkapilōklōk Armej ro Rekwojarjar bwe ren pād wōt ilo ļām̧oren ko aer im kalōk stake ko rekajoor ilo aer aiintok baam̧le eo an Anij im katakin er wāween ko an Irooj. Ekar wōnm̧aanļo̧k wōt im kwaļo̧k bwe elōn̄ļo̧k tampeļ ko renaaj ekkal im kar kallim̧ur kōn elōn̄ļo̧k kōjeraam̧m̧an ko n̄an Armej ro rekwojarjar ijoko jabdewōt rej mour ilo laļ in.17
Ilo an lōn̄ļo̧k oran stake ko rej eddōkļo̧k, aikuj eo ekar ļapļo̧k n̄an mōko im̧ōn member ro bwe ren “erom̧ [jikin ko] ijoko ro uwaan baam̧le eo ren iakwe] emaron̄ n̄an pād ie, ijo er [remaron̄] kōm̧anm̧anļo̧k mour ko aer im pukot iiaio in iakwe, rie, kautiej, im kōketak.”18 Āinwōt juon tōprak, ilo 1980 eo kweilo̧k ko ilo Jabōt rekar kobaik n̄an juon wōt iien ium̧win jilu awa ko n̄an “bar kakeememej eddo ko an kajjojo armej im baam̧le ko ilo ekkatak, mour, im katakin gospel eo.”19 Kakeememej in ioon baam̧le eo im m̧weo ekar bar juon alen kapene ilo “Baam̧le Eo: Juon Naan in Kean̄ n̄an Laļ in” kar kwaļo̧k kadkadin jān Būreejtōn Gordon B. Hinckley ilo 1995.20
Ilo Eprōļ in 1998 eo, Būreejtōn Hinckley ekar kōjjeļļā kōn ekkal eo an elōn̄ļo̧k tampeļ jiddik ko, ko me renej bōktok kain̄i ko rekwojarjar an m̧weo Im̧ōn Irooj epaakeļo̧k kajjojo Armej ro Rekwojarjar im baam̧le ko aolepān laļ in.21 Im iien kōkajoorļo̧k kein rem̧m̧an n̄an eddōkļo̧k eo an jetōb im kōkōm̧anm̧anļo̧k rekar jipan̄ ejelet ļapļo̧k eo an un̄n̄are peid make ilo kadkad eo an Perpetual Education Fund eo ilo 2001.22
Ilo iien eo ekar kabwijer opiij, Būreejtōn Thomas S. Monson ekar bar kōketak Armej ro Rekwojarjar bwe ren ilo̧k n̄an lo̧mo̧o̧ren” im kōmejajaiki kea kake rijjeramōļ ro im riaikuj ro āinwōt juon iaan eddo ko rekwojarjar an Kabun̄ in. Wōnm̧aanļo̧k wōt im kōmejajaiki m̧aanjabpopo ilo kanniōk, Jerbal in Un̄n̄are Peid Make ko kar jino kōjerbali ilo 2012 eo.
Ium̧win elōn̄ iiō ko remootļo̧k, pedped in katak ko raorōk kōn kōm̧m̧an bwe raan in Jabōt en juon raan elem̧ōņōņō ilo m̧weo im ilo kabun̄ eo em̧ōj kar kōmejajaiki im kapene, ilo wāween in kōpooje kōj n̄an jikejuuļ in kweilo̧k ko an Jabōt kar kōjjeļļā kaki ilo m̧wen̄an in an kweilo̧k eo eļap.23 ilo wāween in kōpooje kōj n̄an jikejuuļ in kweilo̧k ko ukōti an Jabōt kar kōjjeļļā kaki ilo m̧wen̄an in an kweilo̧k eo eļap
Im jiljino allōn̄ ko remootļo̧k, doulul ko an Melkisedek Priesthood kar kōkajoorļo̧k im kajjejjeti bwe ren wājabdikļo̧k ippān radik ko n̄an kōttōbrak juon jerbal in karejar eutiejļo̧k im ekwojarjarļo̧k.
Ij tōmak bwe karkan in im iien eo an m̧akūtkūt kein ium̧win elōn̄ n̄oul iiō ko remaron̄ jipan̄ kōj loe juon ippān doon im jerbal eo emenin aikuj im jab bar juon lelkan ijjino ko rejenolo̧k im makeļo̧k. “Anij eaar kwaļo̧k juon jon̄ak an eddōkļo̧k ilo jetōb n̄an kajjojo armej ro im baam̧le ko kōn kain̄i ko, katakin, būrookraam̧ ko, im m̧akūtkūt ko me rej jikin kabun̄jar ilo m̧weo im ej bōk jipan̄ jan Kabun̄ in. Doulul ko an Kabun̄ in im būrookraam̧ ko rej pād n̄an kōjeraam̧m̧an kajjojo armej ro im baam̧le ko im rejjab pād n̄an jipadpad ko aer make.”24
Ij jar bwe jemaron̄ kile jerbal eo an Irooj āinwōt juon jerbal eļap aolepān laļ in me ej erom̧ eļapļo̧k jān kar m̧okta pedped ioon m̧weo im jipan̄ an Kabun̄ in. Ijeļā im ij kam̧ool bwe Irooj ej kwaļo̧k im “enaaj kwaļo̧k elōn̄ men ko reļļap im aorōk ekkar n̄an Aelōn̄ in Kiin̄ eo an Anij.”25
Kallim̧ur im Naan in Kam̧ool
Ikar jino ennaan eo aō ilo aō kar kallikar kajoor eo me ej kōm̧m̧an āinwōt iden mōņakjen ko an kajjojo rej nukwiji kōro̧loli ak pirōki ippān doon ilo juon to. Ilo juon wāween āinwōt in, ij kallim̧ur bwe kōļmenļo̧kjeņ eo ekar ļapļo̧k, kōttōbar eo, im kajoor eo enaaj erom̧ kam̧ool ilo ad ekkatak im mour kōn jepļaaktok in gospel eo an Jisōs Kraist ilo ad kajjieon̄ kuktok ippān doon ilo men otemjej ilo Kraist—aaet ilo E.
Aolep iien ko rem̧m̧an im kōjeraam̧m̧an ko an raorōk an indeeo rej ijjino ilo, pidodo im ewōr jibadbadier kōnke, im niknik ilo Irooj Jisōs Kraist. Āinwōt an Alma kar kam̧ool: “Ejjeļo̧k bar juon iaļ ak wāween eo armej emaron̄ mour, ijello̧kun wōt ilo im kōn Kraist. Lo, E ej mour im meram an laļ.”26
Ij lan̄lōn̄ in kwaļo̧k kam̧ool eo an kwojarjar im mour em̧ool an Jemād Indeeo im Nejin Jetōn Bōro, Jisōs Kraist. Ilo Rilo̧mo̧o̧r eo ad jej lo lan̄lōn̄. Im ilo E jej lo kam̧ool eo an “aenōm̧m̧an ilo laļ in, im mour indeeo ilo laļ eo ej itok.”27 Ij kōm̧m̧ane āindein ilo et eo ekwojarjar etan Irooj Jisōs Kraist, amen.