Kiiō Etōreen
Elder Jack N. Gerard
Jān Jiljilimjounn̄oul eo
Ewōr ke jabdewōt men ilo mour eo am̧ kwoj aikuj in ukōte, kiiō etōreen.
Jet iiō remootļo̧k, ilo ao kōpopo n̄an juon peejnej tūreep, ikar jino en̄jake an metak ubō. Kōn ekōlkōl, kōrā eo paleeō ekar itok ippa tok. Ilo baļuun eo waam̧ro jinoin tata, metak eo ekar lapļo̧k jon̄an ekar lukkuun pen n̄an aō em̧enono. Ke kōm̧ ekar jok, kom̧ro kar etal jān erboot eo im etal n̄an aujipitōļ eo, ijo, ālikin jet teej ko, takto eo ekar ba bwe em̧m̧an kom̧ro en wanmanļo̧k wōt kōn tūreep eo.
Kom̧ro kar rool n̄an erboot im uwe ilo baļuun eo n̄an ijo kom̧ro ej jibadōkļo̧k. Ilo iien eo jekar jino ad kelo̧k, baiļat eo ekar kōnono im kajjitok bwe in kwaļo̧k wōn n̄a. Rijiban̄ eo ilo baļuun eo ekar itok n̄an ijo ij jijjōt ie, ej ba bwe rekar bōk juon kōjjeļļā, im ba n̄an eō bwe juon eo waan aujipitōļ ej kōttar n̄an bōk n̄a n̄an aujipitōļ.
Kom̧ro kar uwe ilo waan aujipitōļ im kar mōkajļo̧k n̄an juon ruum in kōm̧adm̧ōd. Ijo, kom̧ro kar ioone ruo taktō ro rekar kōmeļeļe bwe ekar bōd aer jāāke eō im bwe ewōr juon nan̄inmej eļap, ak bōtōktōk mekak, ilo ārrū, eo ej aikuj in lale ilo iien eo emōkajtata. Taktō ro rekar kōjjeļāik kom̧ro bwe elōn̄ ro rej jab mour jān nan̄inmej in. Ilo am̧ro jeļā bwe kom̧ro ekar ettoļo̧k jān kapijukunen im kom̧ro ejjab jeļā eļan̄n̄e kom̧ro ekar pojak n̄an juon iien rōt in, taktō eo ekar ba bwe eļan̄n̄e ewōr jabdewōt men kom̧ro aikuj loloorjake, kiiō etōreen.
Ij keememej jon̄an iur eo ilo kar iien eo ilo mour eo aō wāween aō kalimjōk, aolep men rekar oktak. Ta eo ekar aorōk ilo jet iien ko remootļo̧k ekar kaju ejjeļo̧k aō itok limo ie. Kōļmenļo̧kijen eo ekar etal jān aenōm̧m̧an im kea kōn mour in n̄an juon kōļmenļo̧kjeņ kōn mour indeeo—kōļmenļo̧kjeņ kōn baam̧le, ajri ro, lio paleeō, im barāinwōt ta eo enij waļo̧k ilo mour eo aō.
Ejet am̧ro jerbal āinwōt juon baam̧le im kajjojo armej? Kom̧ro kar mour ekar n̄an bujen ko kom̧ro ekar kōm̧m̧ani im ta ko Irooj ekōnaan, ak bōlen kom̧ro kar kōtļo̧k an men ko an laļ in kōm̧ad kom̧ro jān ta ko elapļo̧k aer aorōk ke?
Ikōnaan karuwainene eok bwe kwon bōk juon katak jān waanjon̄ak in: n̄an bāāk likļo̧k jān men ko an laļ in im lale jon̄an aorōk in mour eo am̧. Ak ilo naan ko an taktō eo, eļan̄n̄e ewōr jabdewōt men ilo mour eo am̧ kwoj aikuj in ukōte, kiiō etōreen.
Lale Jon̄an Aorōk in Mour ko Ad
Jej jokwe ilo juon laļ eo eobrak kōn elōn̄ kain melele ko, kōn kareleel ko rej lapļo̧k im kōm̧m̧an bwe en pen ļo̧k ad kōjonolo̧k kōj jān men ko an laļ in im mije wōt men ko ewōr tokjāer an mour indeeo. Kajjojo iien ilo mour ko ad ej obrak kōn nuuj ko rej kōm̧ad kōj, kobaļo̧k ippān kein jerbal ko raan kein ko me rej oktak iien otemjej.
Mae iien jej bōk ad iien n̄an kōļmenļo̧kjeņ, jemaron̄ jab jeļā ta ko rej jelet mour ko ad kōn iktōltōl ko an mour in aolep raan im kālet ko jej kōm̧m̧ani. Jemaron̄ loe bwe mour ko ad rej amān melele ko ikijeen kōm̧m̧an kōjak ko, bitio ko, im nuuj ko rekairujruj. Mekarta elimo im kam̧ōņōņō, elōn̄ iaan men kein edik tokjāer ilo mour in jetōb ko ad n̄an indeeo, bōtaab rej ļame wāween ad kalimjōk en̄jake ko ad ilo mour.
Kabo kein an laļ in ej āinwōt ta ko rekar waļo̧k ilo etōņak eo an Liai. Ilo ad jerbal wōt ioon ial in bujen eo ilo ad likūti wōt pā ko peid ilo aen in dāpdep in, jej ron̄ im loe ro rej “kajjirere im jitōn̄ļo̧k kōn peier” jān em ekilep im ļap. (I Nipai 8:27) Jemaron̄ jab iruj n̄an kōm̧m̧ani, bōtaab jet iien jej aikuj bōjrak im lale ta ko rej waļo̧k. Jet iaad jemaron̄ kōtōļo̧k aen in dāpdep eo im em̧m̧akūt bwe en em̧m̧anļo̧k jidik ad loe. Jet remaron̄ kaju wōtļo̧k “kōnke ro raar kajjirere kake er” (1 Nipai 8:28).
Rilo̧mo̧o̧r eo ekar kakōl koj n̄an “kōjbarok … n̄e ab obrak būruemi kōn … inepata ko an laļ in” (Luk 21:34). Revelesōn ko rainin rej kakeememej kōj bwe elōn̄ kūri er, a jet wōt kāālete er. Rej jab kāālete er “kōnke burueer rej kanooj likūt … ioon men ko an laļ in, im jibadek uteij ko an armej” (Katak im Bujen Ko 121:35; lale barāinwōt verse 34) Lale jon̄an aorōk in mour ko ad ej letok n̄an kōj juon iien em̧m̧an n̄an pāāk likļo̧k jān laļ in, kōļmenļo̧kjeņ kōn ia eo jej jutak ie ilo iaļ in bujen eo, im, n̄e emaron̄, lale ta ko jej aikuj in kapene im reim̧aanļo̧k wōt.
Ejjab to, ilo kar devotional eo an jodikdik ipeļaakin laļ in, Būreejtōn Russell M. Nelson ekar karuwainene jodikdik ro n̄an pāāk jidik jān laļ in, jenoļo̧k jān social media ilo aer jitļo̧k jāni ilo ium̧win jiljilimjuon raan ko. Im kar inne jota, ekar barāinwōt kōm̧m̧ane juon karwainene n̄an sister ro ilo kar baat eo ilo kweiļo̧k eo an kōrā. Innām ekar kajjitōk ippen jodikdik ro eļan̄n̄e kar oktak ilo wāween aer en̄jake, ta ko rej ļōmņaki, ak emaron̄ ta ko rej kōļmenļo̧kjeņ kaki. Innām ekar karuwainene er “bwe ren kōm̧m̧ane aorōk in mour ko aer ippān Irooj … n̄an lukkuun jeļā bwe ne ko neer rej pen ilo iaļ in bujen eo.” Ekar rōjan er bwe eļan̄n̄e elōn̄ men ko ilo mour ko aer rej aikuj ukōte, “kiio etōreen im em̧m̧an tata n̄an oktak.”1
Ilo ad etali ta ko ilo mour ko ad me rej aikuj oktak, jemaron̄ kajjitōk ippād juon kajjitōk: Elmen ad ellā ioon kapo ko an laļ in im pād wōt ilo mije wōt visōn in mour indeeo eo ej pād im̧aan?
Ilo juon ennaan ilo kweilo̧k eo ilo 2007 ņae etan “Em̧m̧an, Em̧m̧anļo̧k, Em̧m̧antata,” Būreejtōn Dallin H. Oaks ekar katakin elmen ad kaorōk kālet ko ad rem̧m̧an jān pok ko an laļ in. Ekar katakin, “Jej aikuj joļo̧k jet men ko rem̧m̧an n̄an kālet ko jet me rem̧m̧anļo̧k ak rem̧m̧antata kōnke rej kōļapļo̧k tōmak ilo Irooj Jisōs Kraist im kōkajoorļo̧k baam̧le ko ad.”2
Imaron̄ ke ba waj ke men ko rem̧m̧an rej pedped ioļapān mour eo an Jisōs Kraist im meļeļe kōn m̧ool eo n̄an indeeo kōn wōn e im wōn kōj ilo jem̧jerā eo Ippān.
Pukot Mool
Ilo ad pukote n̄an jelā wōn Riļomo̧o̧r eo, jej jab aikuj pere pedped in m̧ool eo kōn wōn kōj im etke jej pād ijin. Amulek ej kakeememej kōj bwe “mour in ej iien eo … n̄an m̧aanjāppopo n̄an ioon Anij,” iien eo “kar letok n̄an m̧aanjāppopo n̄an indeeo” (Alma 34:32–33). Āinwōt an katak eo jejeļā kake kakeememej kōj, “Ejjab kōj armej ro rej en̄jake mour in jetōb. Jej jetōb ro jej en̄jake mour in armej.”3
Meļeļe kōn mour eo m̧okta me ekwojarjar eļap an aorōk n̄an ad eddōkļo̧k n̄an mour indeeo im jemaron̄ anjo̧ jān kapo ko an laļ in. Rilo̧mo̧o̧r eo eaar katakin:
“Eļan̄n̄e kom̧ij pād wōt ilo aō in naan, in̄n̄am kom rū kaļora re m̧ool.
“Im kom̧ naaj jelā m̧ool, im m̧ool enaaj kōm̧anm̧an anemkwōjami” (Jon 8:31–32).
Būreejtōn Joseph F. Smith ekar kwaļo̧k, “Juon tōprak armej remaron̄ kōm̧m̧ane ilo laļ in n̄an jiniet n̄an er make kōn m̧ool eo eļap, lukkuun lōt, lukkuun wāppen, bwe waanjon̄ak ak tōl ko me ejjeļo̧k juon armej ilo laļ in emaron̄ ukōt er jān jeļāļo̧kjeņ eo em̧ōj aer bōke.”4
Ilo laļ in rainin, akweel eo kōn m̧ool eo emōj an pedjaake aolep jikin, jān aolep armej ro rej kabwijer m̧ool āinwōt n̄e kajjojo armej remaron̄ make jutak kon m̧ool ko aer make. Ļaddik eo edik Josep Smith ekar loe bwe “a jon̄an ļap in kar pok im akwāālel” ilo mour eo an “jon̄an ekar jab maron̄ … n̄an itok n̄an juon jemļo̧k kōn wōn ekar jim̧we im wōn ekar bōd. (Josep Smith—Bwebwenato 1:8). Ilo kar “ioļapļap in tariņae in naan ko im lim̧otak in ļōmņak” bwe ej pukote tōl n̄an pukote m̧ool eo eļap (Josep Smith—Bwebwenato 1:10).
Ilo kweilo̧k eo eļap ilo Eprōl eo, Būreejtōn Nelson ekar katakin, “Eļan̄n̄e jekōņaan bwe en wōr ippād jabdewōt kōjatdikdik jej etale juon men n̄an lale aorōk in elōn̄ meļeļe ko im katak ko an armej ro rej jum̧aeik m̧ool eo, jej aikuj in ekkatak n̄an bōk revelesōn.”5 Jej aikuj ekkatak pedped ioon Jetōb in Mool, eo “laļ eban bōk, bwe ejab lo e, im ejab jeļā e” (Jon 14:17).
Ilo an laļ in ro̧o̧l kōn lukkuun mour in, jej aikuj in keememej naan ko an Jekab bwe “Jetōb ej kōnono m̧ool eo im jab riab. Kōn menin, e ej kōnono kōn men ko āinwōt aer lukkuun waļo̧k, im kōn men ko āinwōt aer naaj waļo̧k; kōn menin, men kein rej kwaļo̧k naan kōn ilo alikkar, n̄an lo̧mo̧o̧ren armej.” (Jekab 4:13).
Ilo ad pāāk likļo̧k jān laļ in im etale mour ko ad, kiiō etōreen eo n̄an lale kōn ta ko rej aikuj oktak. Jemaron̄ bōk juon kōjatdikdik eļap ilo ad jeļā bwe ad Waanjon̄ak Jisōs Kraist emōj an bar juon alen tōl iaļ eo. Kobaļo̧k mej eo An im Jerkakpeje, ilo An kar jerbal n̄an jipan̄ ro Ipeļaakin meļeļe kōn jerbal eo An eļap, ekar kakeememej er “bwe ilo n̄a kom̧win anenōm̧m̧an. Ilo laļ kom̧ij en̄taan: a kom̧win m̧ōņōņō; N̄a Iar bōk anjo̧ ioon laļ” (Jon 16:33). Kōn E ij kam̧ool ilo etan Jisōs Kraist, amen.