N̄an E
Jān Joy D. Jones
Būreejtōn eo Eutiej an Būraimere
Ad jeļā wōn im etke ilo ad jerbal n̄an ro jet ej jipan̄ kōj meļeļe bwe iakwe eo eutiejtata ej wūjlepļo̧k n̄an Anij.
Ilo joteen in eaorōk, ij kwaļo̧k aō iakwe im kam̧m̧oolol n̄an kom̧ kajjojo, kōrā ro jeiū im jatū rejitōnbōro. Jekdoon iiō ta, jikin ko, ak jōkjōk, jej koba ippān doon joteenin ilo bōro kuk, ilo kajoor, ilo jibadbad, im ilo naan in kam̧ool bwe Jemedwōj Ilan̄; im ad Rilo̧mo̧o̧r, Jisōs Kraist; im rikanaan eo ad emour, Būreejtōn Russell M. Nelson rej iakwe kōj im tōl kōj.
Ke kom̧ro kar jet ripālele ro reddik, bisop ekar kūr leo pāleeō im n̄a n̄an loļo̧k im jerbal in karejar n̄an juon baam̧le eo me rejjan̄in bar jar ium̧win elōn̄ iiō ko. Kom̧ro kar lukkuun m̧ōņōņō in eoron̄ ijjitōn̄ in im kar etal n̄an m̧weo m̧weer jejjo raan tokālik. Ekar lukkuun alikkar n̄an kōm ke rekar jab kōņaan riloļo̧k jān Kabun̄ in.
Kōn menin, raan in loļo̧k eo am tok juon, kom̧ro kar bokļo̧k juon pileej in kukiij, kom̧ro kar kōjatdikdik bwe kukiij ko renaaj kōmed buruōer. Rekar jab. Ripālele ro rekar kōnnaan tok n̄an kom̧ro jān kōjem o̧o̧k eo, eļapļo̧k an alikkar bwe kōm kar jab ruwainene. Ak ke kom̧ro kar ro̧o̧ļ n̄an kapijuknen, kom̧ro kar lukkuun jeļā ke enkar em̧m̧anļo̧k n̄e kom̧ro en kar leļo̧k wōt n̄an er Rice Krispies ijjeļo̧kin kukiij ko.
Am̧ro likjab ilo jetōb ekar kōm̧m̧an bwe kom̧ro en kar likjab ilo am̧ro kar kajjieon̄ im ekar nana am̧ro mour. Makoko ejjab juon men em̧m̧an. Ālkin iien eo kom̧ro kar kajjitōkin kom̧ro make, “Etke jej kōm̧m̧ane menin? Ta jibadbad eo ad?”
Elder Carl B. Cook ekar lo menin: “Jerbal ilo Kabun̄ in … emaron̄ naaj mālijjon̄ eļan̄n̄e rej kajjitōkin kōj n̄an kōm̧m̧ane men ko rekaleļn̄on̄ kōj, eļan̄n̄e jej pere jino n̄ate jerbal, ak eļan̄n̄e kūr kōj n̄an kōm̧m̧ane jet men me ilo jinoin jejjab lo an itok limoid kake.”1 Kom̧ro kar en̄jake m̧ool eo ilo naan ko an Elder Cook ke kom̧ro kar kālōt bwe kom̧ro en kappukōt tōl jān juon eo eļapļo̧k an iminene jān jeļā ko am̧ro make.
Kōn menin, ālkin am̧ro kar jar im ekkatak ilo m̧ool, kom̧ro kar bōk juon uwaak n̄an naan in etke jerbal in jipan̄ in ad? Ekar lōn̄ juon oktak ilo kōmenļo̧kjeņ ko am̧ro, ilo m̧ool juon en̄jake in revelesōn.2 Ke kom̧ro kar kappukōt tōl jān jeje ko rekwojarjar, Irooj ekar katakin kom̧ro wāween n̄an kōm̧m̧an bwe jerbal n̄an ro jet en pidodo im ļapļo̧k meļeļein. En̄in ej eoon eo kom̧ro kar riiti me ekar ukōt buruōm im wāween am̧ro kepaakļo̧k armej: “Kwōn iakwe Irooj am Anij kōn aolepān būruōm̧, kōn aolepān am maron̄, ļōmņak, im kajoor; im ilo etan Jisōs Kraist kwōn jerbal n̄an E.”3 Men̄e eoon in elukkuun alikkar, āinwōt ej kōnono n̄an kom̧ro ilo juon wāween eo ekāāl im eaorōk.
Kom̧ro kar kile bwe kom̧ro kar lukkuun m̧ool ilo am̧ro kajjieon̄ jipan̄ baam̧le in im n̄an jipan̄ bisop eo am, ak kom̧ro kar kajjitōkin kom̧ro make eļan̄n̄e kōm kar lukkuun jipan̄ kōn iakwe eo an Irooj. Kiin̄ Benjamin ekar kalikkar oktak in ke ekar kwaļo̧k, “Lo, ij ba n̄an kom̧ bwe kōnke iaar ba n̄an kom̧ bwe iaar juļo̧k raan ko aō ilo jerbal n̄an kom̧, ij jab kōņaan likōmjāje, bwe iaar pād wōt ilo jerbal n̄an Anij.”4
Kōn meniņ, wōn eo me Kiin̄ Benjamin ekar lukkuun jerbal n̄an e? Jemedwōj Ilan̄ im Rilo̧mo̧o̧r. Ad jeļā wōn im etke ilo ad jerbal n̄an ro jet ej jipan̄ kōj meļeļe bwe iakwe eo eutiejtata ej wūjlepļo̧k n̄an Anij.
Ilo an kōttōpar ko ad oktak jidik, āindein bar jar ko ad. Kōm̧ro kar jino reim̧aanļo̧k n̄an loļo̧k ko am̧ro ippān baam̧le in kōn wōt iakwe eo am̧ro n̄an Irooj.5 Kōm̧ro kar kōm̧m̧an menin n̄an E. Ekar kōm̧m̧an bwe apan̄ in en jamin bar apan̄ n̄an jidik. Ālkin elōn̄ allōn̄ ko in am̧ro jutak ilo nabōj in kōjem eo, baam̧le eo ekar jino kadelo̧n̄ kom̧ro. Āliktata, kōm kar jar im kōnono ippān doon kōn gospel eo. Juon jem̧jerā ekar ejaak n̄an indeeo. Kōm̧ro kar kabun̄ jar im iakwe E ilo am̧ro iakwe ro Nejin.
Komaron̄ ke ļōmņak kōn juon iien eo me kwaar loļo̧k ro jet kōn kijejeto em̧ool n̄an jipan̄ juon eo ej aikuj im kar en̄jake ke kijejeto ko am ejjeļo̧k tokjeer ak bolen ejjeļo̧k rej kam̧m̧olol kake ak aikuji? Ilo iien eo, kwaar ke pere aorōkin jerbal eo am̧? Eļan̄n̄e āindein, kōm̧m̧an bwe naan ko an Kiin̄ Benjamin en bōk jikin am̧ pere im barāinwōt am̧ metak: “Kom̧ij jerbal wōt n̄an ami Anij.”6
Ijjeļo̧kin am kōm̧m̧an am inepata, komaron̄ ejaak, jān jerbal in jipan̄, juon jem̧jerā eo em̧m̧antata ippān Jemedwōj Ilan̄. Ad iakwe im wūjlepļo̧k n̄an E ej bōbrae kōj jān ad aikuj n̄an nōbnōbar ak kam̧m̧olool im kōtļo̧k bwe An iakwe en ļapļo̧k ilo kōj.
Jet iien jemaron̄ jino jerbal kōn en̄jake in ke ej juon eddo ak juon jerbal, ak men̄e jerbal in emaron̄ tōl kōj n̄an kōjerbal āinwōt juon men eutiej ilo kōj, eo ej tōl kōj n̄an jerbal ilo “iaļ eo em̧m̧antata”7—āinwōt ilo kūr eo an Būreejtōn Nelson n̄an “wāween kepaak eo ekāāl ļo̧k im ekwojarjar ļo̧k n̄an kea kōn im jerbal in karejar n̄an ro jet.”8
N̄e jej mije aolep men ko em̧ōj an Anij kar kōm̧m̧ane n̄an kōj, jerbal in jipan̄ ko ad rej kajoorļo̧k jān juon buruōn kam̧m̧olool. Ilo ad jab lukkuun inepata kōn wāween an jerbal ko ad kōjeraam̧m̧an kōj, ijjelo̧kin jej kile bwe kōttōpar eo ilo jerbal ko ad naaj likūt Anij m̧oktata.9
Būreejtōn M. Russell Ballard ekar katakin, “Menin wōt n̄e jej iakwe Anij im Kraist kōn aolep buruōd, ad, im ļōmņak me jemaron̄ kwaļo̧k iakwe in ippān ro ritūrir itok jān ad jerbal in jouj im jipan̄.”10
Kien eo m̧oktata ilo Kien ko Jon̄oul ej bar kwaļo̧k mālōtlōt in ekwojarjar: “N̄a Irooj am̧ Anij. … “En ejjeļo̧k bar anij raņ ippam̧ ijello̧kū.”11 Jerbal eo an kien in ej jipan̄ kōj meļeļe bwe eļan̄n̄e jenaaj likūt E āinwōt eo jinoin men otemjej, aolep men renaaj korļo̧k men kein otemjej—barāinwōt jerbal ko ad n̄an ro jet. N̄e Ej bōk eddo eo em̧m̧antata ilo mour ko ad kōn kālet ko ad, innem E ej maron̄ kōjeraam̧m̧an jerbal ko ad n̄an em̧m̧an ko ad im n̄an em̧m̧an ko an ro jet.
Irooj ekar kapilōk, “Reitok n̄an Eō ilo ļōmņak otemjeļo̧k.”12 Im kajjojo wiik jej bujen n̄an kōm̧m̧ane āindein—n̄an “keememej e iien otemjej.”13 Emaron̄ ke juon kōttōpar eo ekwojarjar ej bōk jikin ilo aolep men ko jej kōm̧m̧ani? Emaron̄ ke jerbale barāinwōt juon jerbal ejalimo erom juon iien em̧m̧an n̄an kwaļo̧k iakwe eo ad im ad wūjlepļo̧k n̄an E? Ij tōmak emaron̄ im enaaj.
Jemaron̄ kōm̧m̧an bwe kajjojo jerbal ko ilo laajrak in men ko jej aikuj kōm̧m̧ani ren erom juon wāween n̄an kaibojooj E. Jemaron̄ ke kajjojo lale jerbal ko āinwōt juon eddo im iien em̧m̧an n̄an jerbal n̄an E, men̄e jej pād luko̧ļben an jejet kitien, eddo ko, ak kaļ ko rettoon?
Āinwōt an Ammōn kar ba, “Aaet, ijeļā bwe n̄a jekdo̧o̧n; im kōn aō kajoor im̧ōjņo̧; kōn menin ijjamin naaj kōmmejāje kōn n̄a make, a inaaj kōmmejāje kōn aō Anij, bwe ilo kajoor eo An imaron̄ kōm̧m̧an aolep men kein.”14
N̄e jej jerbal n̄an Anij ej erom juon ad kōttōpar eaorōk ilo mour, jej ajeļo̧k mour eo ad, im āliktata, jej lo mour.15
Rilo̧mo̧o̧r ej katakin katak in ilo alikkar im jejjet: “ Kōn menin en romaak ami meram im̧aan armej rein, bwe ren maron̄ lo jerbal ko rem̧m̧an ami im wūjtak Jemāmi eo ej pād ilo lan̄.”16
Imaron̄ ke kwaļo̧k n̄an kom̧ jet naan in mālōtlōt me rekar loi ilo dipin mōn jokwe an ajri ro ilo Calcutta, India: “Eļan̄n̄e kwoj jouj, armej remaron̄ na ruōm kōn tōr, ak un ko rettino. Kwon jouj wōt jekdoon ta. Ta eo kwaar ejaaki ilowaan iiō ko, juon emaron̄ kajju kakkure ilo iien eo emōkajtata. Ejaake wōt jekdoon ta. Em̧m̧an eo kwoj kōm̧m̧ane rainin, armej ekkā aer meļo̧kļo̧k ilju. Kōm̧m̧an em̧m̧an jekdoon ta. Leļo̧k n̄an laļ in em̧m̧an eo jon̄an am̧ maron̄, im emaron̄ jabwe wōt. Leļo̧k n̄an laļ in em̧m̧an eo jon̄an am̧ maron̄ jekdoon ta. Kwoj lo, ilo āliktata, ej ikōtaam im Anij eo am̧ … jekdoon ta.”17
Sister raņ, aolep iien ej ikōtaad im Irooj. Āinwōt an Būreejtōn James E. Faust kar ba: “Ta eo eļaptata aikuji ilo laļ in?’ … ‘Ejjab juon aikuj eļaptata ilo aolep laļ in n̄an aolep armej n̄an bōk juon jemjerā an juon make, ejjeļo̧k jem̧ļo̧kin, aolep raan, im ej wōnm̧aanļo̧k wōt ippān Rilo̧mo̧o̧r?’ Bōk juon jem̧jerā rōt in emaron̄ kwaļo̧k kwojarjar eo ilo kōj, im ejjeļo̧k emaron̄ kōm̧m̧an juon oktak eļap ilo mour ko ad ilo ad jeļā im meļeļe kōn jemjerā eo ad ippān Jemedwōj Ilan̄.”18
Āindein, Alma ekar kōmeļeļeik ļaddik eo nejin, “Aaet, im kūr n̄an Anij kōn aolep am̧ jipan̄; aaet, kōtļo̧k bwe aolep kōm̧m̧an ko am̧ ren n̄an Irooj, im jabdewōt ijo kwōj etal ie en ilo Irooj; aaet, kōtļo̧k aolep am̧ ļōmņak bwe ren n̄an Irooj; aaet, kōtļo̧k bwe iakwe ko an buruōm̧ ren pād ioon Irooj indeeo.”19
Im Būreejtōn Russell M. Nelson ekar barāinwōt katakin kōj, “N̄e jelukkun meļeļe kōn Pinmuur eo An, jabdewōt en̄jake in wūjlepļo̧k epenjak kōn en̄jake in kam̧m̧oolol ekabwilōn̄lōn̄ kōn kōjeraam̧m̧an in n̄an jerbal n̄an E.”20
Sister raņ, ij kam̧ool bwe ke Jisōs Kraist, kōn kajoor in Pinmuur eo An, ej jerbal kōn kōj im ilo kōj, Ej jino jerbal kōn kōj n̄an kōjeraam̧m̧an ro jet. Jej jerbal n̄an er, ak jej kōm̧m̧an āindein ilo ad iakwe im jerbal n̄an E. Jej erom ta eo eoon eo ej kōmeļeļeiki: “Aolep armej ej kappukot ļapļo̧k eo an [ak eo riturun], im kōm̧m̧an aolep men otemjeļo̧k kōn mejōkļo̧k wōt aiboojoj eo an Anij.”21
Bōlen bisop eo ad ekar jeļā ke katak eo ņe me leo pāleeō im n̄a kom̧ro en kar ekkatak jān e m̧okta im lukkuun meļeļe kake, men̄e jejjab wānōk, kijejeto ko n̄an jerbal in karejar n̄an ļaddik im leddik ro nejin Anij rejitōnbōro. Ij kwaļo̧k aō kam̧ool kōn em̧m̧an im iakwe eo An ej kwaļo̧k n̄an kōj men̄e jej kajjieon̄ n̄an jerbal n̄an E. Ilo āt eo ekwojarjar etan Jisōs Kraist, amen.