Sauniuniga o le Olaga
A o Le’i Valaauina Oe e Auauna Atu
E faapei le auauna atu i se misiona?
Pe ua e mafaufau ea e auauna atu i se misiona? Afai o lea, masalo o loo e mafaufau pe faapefea. O lou avanoa lenei e fesili ai i nisi o faifeautalai faamisiona (e le o ni faifeautalai faamisiona moni, ae o nei tali e talafeagai):
Oe: “Talofa, elders. O le a ni foliga o se aso masani?”
Faifeautalai faamisiona: “Matou te vave ala—i le 6:30 i le taeao. Mo le lua itula e sosoo ai, matou te suesue ai le talalelei ma le gagana o la matou misiona. Matou te iloilo o matou faamoemoega mo le vaiaso ma fuafua lo matou aso. Matou te mafaufau foi i ni fuafuaga faaleoleo pe afai e le avanoa tagata mo a latou faatalanoaga. Ona matou o ese atu lea mai le faitotoa, ma galulue i le aso atoa, e saili tagata e aoao, fetuunai ia le galuega ma tagata o le uarota, ma faataunuu ia faatalanoaga e aoao atu ai.”
Oe: “Pe ua e maua ea i le mai manatu i le aiga?”
Faifeautalai faamisiona: “Ioe, aemaise lava i le amataga o la matou misiona. Ae e mafai ona matou imeli atu i o matou aiga ma faitau imeli mai ia i latou faatasi i le vaiaso. Ua matou maua o le auala e sili e tea ai le manatu i le aiga o le taulai atu lea i la matou galuega.”
Oe: “O le a sou lagona e uiga i le talanoa atu i tagata e te le masani ai?”
Faifeautalai faamisiona: “Sa matou popole lava i lena mea ina ua faatoa matou taunuu mai iinei, ae iu lava ina e masani ai aua e te faia i aso uma. Matou te iloa e le o tagata uma lava e feiloai i ai o le a mananao e faalogo i la matou savali, ae o nisi e fiafia, o lea e tatau ai ona matou naunau e talanoa i soo lava se taimi. O se mea fiafia le feiloai i tagata ma faamasani i ai.”
Oe: “E faigata ona aoao atu le talalelei? “
Faifeautalai faamisiona: “Ioe, o le faia i le atoatoa e manaomia ai le faataitai, ae sa lelei lo matou aoaoga i le laumua tutotonu e aoao ai faifeautalai. Matou te taumafai e aoao lesona i se auala e talafeagai ma manaoga o tagata ma tali ai fesili a i latou o loo matou aoaoina. Matou te suesue i le talalelei i aso uma ina ia matou aoao atu ai ma le atoatoa. O le mea e silisili ona taua, o lo matou lagona o le taitaiga a le Agaga. O le faamanuiaina o se faifeautalai e fesoasoani lea.”
Oe: “E faigata le galuega faafaifeautalai?”
Faifeautalai faamisiona: “Ioe, matou te galulue mo le 70 itula i le vaiaso, ae matua faamalieina lava. Ioe matou te lagona le faanoanoa pe a le alualu i luma tagata e pei ona matou mananao i ai, ae i lona aotelega, o se faamanuiaga le avea o ni meafaigaluega i aao o le Alii e fesoasoani i tagata ina ia alualu i luma faaleagaga. Matou te taumafai e aoao atu i le mana o le Agaga Paia aua ua matou iloa e na o le Agaga lava e mafai ona fesoasoani i tagata e maua ai a latou molimau ma liua ai.”
Oe: “Ae faapefea pe afai ou te le iloa e i ai sau molimau?”
Faifeautalai faamisiona: “E le afaina lena—tatalo pea ma faitau tusitusiga paia! Alu i le lotu ma le seminare. Alu i le malumalu pe a e mafai ai. Faalagolago i le Alii ma Ona aoaoga. O le tele o avanoa e te maua e lagonaina ai le Agaga, o le malosi foi lena o le a iai lau molimau. Faataitai le fefaasoaaiga o ou talitonuga i afiafi faaleaiga. Faitau i le Tusi a Mamona. O le a fesoasoani lea ia te oe e mafai ai ona e aoao atu le talalelei.”
Oe: “E faapefea ona e saunia mo lau misiona?”
Faifeautalai faamisiona: Sa matou suesue i tusitusiga paia, aemaise lava i le Tusi a Mamona. Sa maua a matou galuega ma faasaoina a matou tupe. Ae maimau pe ana matou faitau i le Aoao Atu Lau Talalelei ma auai soo i vasega e sauniuni ai mo le misiona. Sa matou faapea maimau pe ana matou aoao le kuka!”
Oe: “E te manatu faamata e mafai ea ona avea au o se faifeautalai?”
Faifeautalai faamisiona: “E mafai! E tusa ma le 70,000 faifeautalai i le lalolagi atoa. Ae amata lava i le manao: ‘Afai ua ia te outou le manao e auauna atu i le Atua ua valaaulia outou i le galuega’ (MF&F 4:3). Ae e manaomia foi le i ai o se sauniuniga—e tatau ona e sauni e le na o le faaleagaga ae faapea foi i mea tau tupe, faaletino, ma le faaagafesootai.”
Oe: “O a nisi mea o le a fesoasoani ou te saunia ai?”
Faifeautalai faamisiona: “Fai ma lui le ola i le talalelei ma usiusitai i poloaiga i le sili e te mafai ai. O le a faamalosia ai e lenei mea lau molimau ma fesoasoani e te agavaa ai i le Agaga. A o avea oe ma se faifeautalai, o le a e manao e molimau atu i tagata mai aafiaga patino e moni le talalelei. O lea faaaoga le taimi lenei e aoao atili ai i mataupu faavae o le talalelei ma ola ai i na mataupu faavae i lou lava olaga.”
Faifeautalai faamisiona: “Matou te fautua atu foi e te faitau fesili o loo i itulau o mulimuli mai. O fesili na o le a fesiligia ai oe e lau epikopo po o le peresitene o le paranesi a o e faatumu au pepa o le misiona. O le iloaina o nei fesili o le a fesoasoani e te saunia ai. Faatalatalanoa nei fesili ma ou matua ma taitai o le Ekalesia. E tele naua fesili, ae aua e te popole—e le faapea o le a e lipoti i le laumua ogatotonu e aoao ai faifeautalai taeao! Faaalu le taimi e te manaomia e sauni ai ina ia oo mai lou aso muamua i le misiona, o le a e agavaa, fiafia, ma sauni e auauna atu.”