Tapuaiga i se Lalolagi o Tekinolosi
Mafaufau i mataupu faavae e tolu mo le faaaogaina talafeagai o masini i totonu o le falesa.
I se tasi o Aso Sa, a o tufaina atu le faamanatuga, sa sei ane i fafo e se peresitene o le Aualofa ou te iloa ia lana telefoni poto e faitau ai le “O Le Keriso Soifua: O Le Molimau a le Au Aposetolo.” O le musuia ai e ala i lenei molimau faaaposetolo o le Faaola, sa ia lagonaina ai le faafouina i lana tautinoga e manatua pea o Ia.
Ae peitai, sa liusuavai ona lagona lelei i ni nai aso mulimuli ane, ina ua ia mauaina se tusi i totonu o le meli, e leai se igoa na sainia ai mai se tagata o le uarota. Sa faitioina e le tusitala o ia mo le faia o se faataitaiga leaga e ala i le faaaoga o lana telefoni poto i le sauniga faamanatuga. Na matuai olopalaina o ia.
E moni, sa lei fuafua o ia e faatiga i se tasi e ala i le faaaogaina o lana masini feaveai. Sa seasea ona ia faaaogaina i totonu o le falelotu, ae sa nao le taimi lea ina ua ia lagonaina sa talafeagai ai. Ae ina ua maua atu le tusi, sa amata ona ia masalomia o ia lava.
O Se Luitau Fou
E tofu augatupulaga uma ma o latou lava luitau. Ua lipotia mai i se tasi o suesuega e faapea, e oo atu i le 2020 o le a toatele atu tagata e i ai telefoni feaveai (5.4 piliona) nai lo o ni vai paipa (3.5 piliona).1 Faaopoopo atu i ai tamai komepiuta feaveai “phablets [tapeleti],” ma isi masini sulu, ona e maua ai lea o se lalolagi ua tauivi ma le fesili: O a auala talafeagai o faaaogaaga talafeagai o “masini tekinolosi”?
A o tauivi matua, taitai, ma faiaoga e filifili mea e talafeagai mo le faaaogaaga talafeagai o masini tekinolosi i potopotoga a le Ekalesia, o filifiliga eseese ua taitai atu ai i nisi taimi i ni auala feteenai e taulima ai masini tekinolosi i sauniga a le Ekalesia.
Ua tuuina mai e taitai o le Ekalesia le fautuaga i faamanuiaga ma tulaga matautia o le faaaogaina o tekinolosi. Ae peitai, e le o taimi uma e tau poloai mai ai e taitai o le Ekalesia mea uma e tatau ona fai ma mea e le tatau ona fai o le ola ai i le talalelei (tagai Mosaea 4:29–30). Ua faamoemoe e suesue e tagata o le au paia le mataupu mo i latou lava ma saili le taitaiga a le Agaga Paia i le faia o faaiuga. O le mea e faanoanoa ai, e pei o le tulaga o lo o i luga, o nisi taimi tatou te faaaogaina ai e le gata i le na o se tulaga ae faapea foi o se uiga faaalia le lelei agai ia i latou e ese se tulaga o i ai.
Musuia e le Atua; Faaaogaina e Satani
Ua tuuina mai e le Atua faamanuiaga o tekinolosi mo lo tatou manuia ma le faaalualuina i luma o Lana galuega.2 O lea la, a o faaaoga ai ma le le talafeagai e nisi o le au paia o a latou masini tekinolosi, na aoao mai Elder David A. Bednar o le Korama a Aposetolo e Toasefulua e faapea, “e le tatau ona tatou faatagaina le fefe i measese e taotaomia ai i tatou mai le mauaina o faamanuiaga maoae e mafai ona tuuina mai e nei meafaigaluega.”3 E manaomia ona tatou aoao e faaaoga tatau i latou ma aoao a tatou fanau e faia foi faapea.
O masini feaveai e fesoasoani i tagata o le Ekalesia i suesuega o le talalelei, galuega o talafaasolopito o aiga ma le malumalu, ma le faasoaina atu o le talalelei. Mo se faataitaiga, e ova atu ma le tolu miliona tagata na faaaogaina le polokalama o le Gospel Library ia Ianuari 2018. O le tuufaatasiga o le taimi o a latou suesuega e tutusa ma le silia i le afe o tausaga.
Faatasi ai ma le matauina o faamanuiaga, ua lapatai mai taitai o le Ekalesia e uiga i tulaga e ono matautia ai, e aofia ai le faamaimauina o le taimi, faaleagaina ai mafutaga, ma le maileia i le agasala.4 I faapotopotoga a le Ekalesia, o le faaaogaina le talafeagai e mafai ona faalavefau ia i tatou ma isi mai le tapuai ma le aoaoina lea e taua i le atinaeina o lo tatou sootaga ma le Atua.
Ae ui i lea, o nei lamatiaga e le tulaga ese i masini tekinolosi. Na aoao mai ai Elder M. Russell Ballard o le Korama a Aposetolo e Toasefululua, “O nisi o nei meafaigaluega—e pei o soo se meafaigaluega i lima e lei faataitai i ai po o le lima e le puleaina—e mafai ona avea ma se mea matautia.” “… Ua le ese lea mai auala e filifili e tagata e faaaoga ai le televise po o ata tifaga pe oo foi i se faletusi. E televave i taimi uma ia Satani e faaaoga le mana le lelei o fatufatuga fou, e faaleaga ma faatoilalo ai, ma taofia ai soo se aafiaga mo le lelei.”5
Masini Feaveai i Sauniga Faamanatuga
O le iloa ai o faamanuiaga faamoemoeina—faapea foi ma faalavefau faamoemoeina—o nei masini tekinolosi, e faapefea la ona filifili e tagata o le au paia le auala e faaaoga ai? Sa fautuaina mai e Iosefa Samita le mana o se mataupu faavae o se faiga faavae ina ua ia fai mai, “Ou te aoao ia i latou mataupu faavae sao, ona latou pulea ai lea o i latou lava.”6
O i, tatou te iloilo ai mataupu faavae ia e ono aoga i le faia o faaiuga e uiga i le faaaogaina o masini feaveai i sauniga faamanatuga. Mo se talanoaga i le faaaogaaga talafeagai o masini tekinolosi i le potuaoga, tagai “Aoaoga i Tekinolosi: Faaaafiaina o le Autalavou i le lalolagi o Masini Faatekonolosi,” saunia e Brother Brian K. Ashton, Fesoasoani Lua i le Au Peresitene Aoao o le Aoga Sa, i le itulau e 30 o lenei lomiga.
Mataupu Faavae 1: O au filifiliga e lagolago i le tapuaiga.
O le sauniga faamanatuga e mo le “[tuuina atu o a tatou] tapuaiga i le Silisili Ese” (MF&F 59:10). Na aoao mai Elder Dallin H. Oaks o le Fesoasoani Muamua o le Au Peresitene Sili, o la tatou taulaiga iina e tatau ona i ai i le faafouina o a tatou feagaiga ma lo tatou faatuatua i le Alii o Iesu Keriso ma Lana Togiola.7 O mea tatou te filifili e fai i le sauniga faamanatuga e tatau ona fesoasoani tatou te faia ai na mea.
O le i ai la o lena taulaiga, pe afai e tulai mai le manaomia, atonu tatou te faaaogaina ma le talafeagai a tatou masini feaveai e:
-
Faaleleia atili ai la tatou tapuaiga. E ono faaaoga e se tagata o le au paia se masini tekinolosi i le taimi o le sauniga faamanatuga e sue ai mau, usu ai viiga, pe tusi ai ni faamaumauga i uunaiga faaleagaga.
-
Auauna atu. Atonu e matauina e le epikopo se tagata fou pe le toaga ua ulufale filemu mai i le pito i tua o le falelotu i le taimi o le sauniga faamanatuga ma, afai e musuia ai, e tesi atu i le taitai misiona e faafeiloai le tagata ma valaaulia i latou i se vasega o Mataupu Faavae o le Talalelei pe a maea le sauniga.
-
Faafaigofie ai fesootaiga taua. E mafai e fomai, tagata e muamua tali atu i se faalavelave faafuasei, ma isi tagata tomai faapitoa e valaau i ai pe a i ai ni mea e tutupu faafuasei, ona auai i sauniga tapuai ona latou te iloa e mafai ona faafesootai i latou pe a manaomia e ala i a latou masini feaveai.
Ao tatou saili e taulai atu i le Faaola, e taua le manatua o a tatou masini e mafai ona faafaigofie ai a tatou suesuega, ae e le mafai ona latou faia la tatou aoaoina. E mafai ona latou tuuina mai se mea tatou te mafaufau loloto i ai, ae e le mafai ona latou mafaufau mo i tatou. E mafai foi ona latou fesoasoani ia tatou manatua e tatalo, ae o le tatalo o se mea e ao lava ona tatou faia mo i tatou lava.
Na aoao mai Elder Bednar o la tatou mafutaga ma le Atua e moni, e le faitino.8 E le mafai ona kiliki faalua i ai pe sii mai.9 O lea la, a o faaaoga e le peresitene o le Aualofa i le amataga o le tusi lenei ia lana telefoni e fesoasoani ai e faatotonugalemu ona mafaufauga ia Keriso, o le feagaiga sa ia faafouina sa lei i ai i le telefoni, sa i ai ia te Ia. O le malaga lea sa fesoasoani lana maisni na te amataina na tatau ona faamaeaina i ona mafaufauga, i ana tatalo, ma ana faatinoga.
Mataupu Faavae 2: Ou te tuuitiitia mea faalavefau.
E tatau ia i tatou uma ona taumafai mo se siosiomaga e faaleleia ai la tatou taulai atu i le tapuaiga ma le aoaoina. E taua le tuuitiitia o mea faalavefau. O le mataupu faavae lenei e faatatau i le tele o tulaga, mai le auala tatou te faia ai ni talanoaga pe taulima ai tamaiti faigata i le auala tatou te faaaoga ai a tatou masini tekinolosi.
E anoanoai auala e faalavelaveina ai e se masini lea sa fuafuaina e fai ai le tele o mea. E mautinoa lava o le matamataina o vitio, faalogologo i musika, po o le taalo i taaloga o le a faigata ai ona taulai atu i sauniga o le faamanatuga. Ae o le a faapena foi i le siakiina o imeli, feau i tesi, faasalalauga faaleagafesootai, ai o taaloga, ma le tele o tiligi, uu, ma aikona eseese lea e toso atu ai i tatou i mea o tutupu, mafutaga, ma talanoaga e tutupu i fafo mai o le sauniga. O nei mea uma ma isi mau mea e mafai ona faalavelave ia i tatou ma isi, e oo lava i isi i nai laina nofoa e ese mai ia i tatou.
Mo i latou o e mananao e aveese atoa le faalavefau o masini tekinolosi, atonu e talafeagai ai le tuu o a latou masini i le fale po o le tape. Mo i latou o e faaaoga a latou masini e lagolago ai a latou tapuaiga ae mananao e aloese mai le faalavelave i isi, atonu e lava lava le tape o le leo o le masini, tuu i le aua le faalavelave, po o le tuu i le faailo o le vaalele.10
Mataupu Faavae 3: Ou te taulai i lau lava tapuai.
O le a i ai lava i taimi uma ni mea faalavefau po o le a lava le ituaiga, ma e le o i latou uma o ni masini tekinolosi. O nei mea e ono aofia ai se tamaitiiti laitiiti faigata, se iniseti e uu solo, po o le pao o taavaleafi i fafo. Ua ia i tatou le tiutetauave muamua mo mea tatou te maua mai la tatou tapuaiga. O lea la, afai e galo i se tagata ona tuu lana telefoni i le faailo o le vaalele, e tatau ona tatou taumafai e tuu i tatou lava i le faailo o le “le amanaia o mea faalavefau”.
Na aoao mai Peresitene Russell M. Nelson, “Ua i ai i tagata taitoatasi o le Ekalesia le tiutetauave mo le faatamaoaigaina o le faaleagaga lea e mafai ona maua mai i se sauniga faamanatuga.”11
Afai tatou te matauina isi tagata e siomia i tatou o faaaoga a latou masini, e tatau ona tatou faaeteete i le masalomia e faapea, o mea o loo latou faia ua le talafeagai ona o loo i luga o se masini tekinolosi. Afai o le tagata o se tamaitiiti po o se tasi ua tofia i tatou e nafa ma le vaaia, atonu e talafeagai le siaki o le latou faaaogaaga e pei ona faatonu mai e le Agaga. Nai lo o lena, ia tatou taumafai e toe foi i la tatou lava tapuaiga.
Aoao Faatasi
I se faamatalaga na aofia ai nei mataupu faavae, na fautuaina ai e Elder Oaks, “I le taimi o le sauniga faamanatuga—ae maise lava i le taimi o le sauniga o le faamanatuga—e tatau ona tatou tulimatai atu e tapuai ma ia aloese mai isi gaoioiga uma, ae maise lava mai amioga e faalavelave ai i isi o loo tapuai.”12
E tele isi mataupu faavae e mafai ona fesoasoani e taiala ai lo tatou faaaogaaga. A o faasolo ina faateleina le avea o masini faafuainumera ma se vaega masani o la tatou aganuu, o le a manaomia ona tatou tauivi faatasi ma fesili e uiga i mea e talafeagai. Talu ai o tulaga uma lava e tulaga ese ma o le a faaauau pea ona sui ia tekinolosi, e manaomia ona faaauau ona tatou iloiloina la tatou lava faaaogaaga, mafaufau i manatu faaalia fou pe ese, ma ia loto e faamagalo i isi ao tatou aoao faatasi.