Pag-eksperimento sa Musika
Ang tagsulat nagpuyo sa Utah, USA.
Kon gusto ko nga makapalambo sa akong pagpamatuod ug mouswag sa espirituhanong paagi, kinahanglan kong mohunong sa paghimo og mga rason sa akong kinaiya.
Kanunay kong naghunahuna nga usa ko sa swerte nga mga eksepsyon sa pipila ka mga sumbanan sa ebanghelyo. Busa akong gibuhat ang akong gustong himoon, nagdesisyon kon unsa nga mga sumbanan ang importante ug unsa ang dili. Usa sa mga sumbanan nga akong nakita nga opsyonal mao ang dili maminaw sa malaw-ay ug bastos nga musika (tan-awa sa Alang sa Kalig-on sa mga Kabatan-onan [2011], 22). Wala ko maghunahuna nga ang musika nga akong gipaminaw nakahimo og kalainan kon unsay akong linihukan ug unsay akong gibati mahitungod sa ebanghelyo. Duna gihapon koy lig-on nga pagpamatuod ni Jesukristo, ug naningkamot ko nga moserbisyo sa uban ug motambong sa akong mga miting sa Simbahan. Miingon ko sa akong kaugalingon nga dili maayo nga kadtong mga musician wala magpuyo og mahiyason nga kinabuhi, apan OK ra nako nga maminaw sa ilang musika—tutal, wala man kini makapugong kanako sa pagpuyo og kinabuhi nga nakasentro sa ebanghelyo.
Samtang nangandam ko sa pagserbisyo og misyon, wala ko maghunahuna kon sa unsang paagi nga ang musika nga akong gipaminaw nakakunhod sa akong espirituhanong pag-uswag.
Hinoon, mga oras pa lang human naablihan ang akong mission call, ang kasulatan nga Alma 32:27 misantup sa akong hunahuna: “Apan tan-awa, kon kamo mopukaw ug modasig sa inyong mga galamhan, bisan ngadto sa pagsulay sa akong mga pulong, ug pagbansay sa usa ka tipik sa hugot nga pagtuo, oo, bisan kamo kutob ra sa pagtinguha sa pagtuo, tugoti kini nga tinguha nga molihok diha kaninyo, gani hangtud kamo motuo sa paagi nga kamo makahatag og luna alang sa usa ka bahin sa akong mga pulong.”
Ug dayon naghunahuna ko nianang usa ka pulong: pagsulay [pag-eksperimento]. Kon gusto ko nga makadawat sa mga panalangin nga wala nako madawat, kinahanglan kong mag-eksperimento. Busa sulod sa tulo ka semana, wala ko maminaw sa akong dili angay nga musika. Lisud sa sinugdanan, ug kadaghan ko nasipyat sa pagpaminaw. Apan human sa pipila ka adlaw, ang malinawon nga mga pagbati nga nasugdan nako pagbaton kada adlaw igo na aron makasuporta nako. Dugang pa niana, isip usa ka estudyante sa kolehiyo, nag-anam ko og kamaayo sa akong mga klase. Mas maka-focus ko, ug mas nahiangay ko sa Espiritu sa panahon sa akong kinabuhi diin ang langitnong giya hilabihan gayud ka importante.
Akong nabantayan nga bisan ang akong mga tinguha nausab. Gusto nako nga mabatunan ang matag panalangin nga gihulat sa Langitnong Amahan nga ihatag kanako. Ang akong kasinatian sa pag-usab sa akong mga gawi kalabut sa musika nakatabang kanako nga makaamgo nga walay opsyonal nga mga sumbanan ug nga ang matag sugo nga gihatag kanato gidesinyo aron mapalambo ang atong relasyon ngadto sa atong Langitnong Amahan ug mohimo kanato nga mas mahisama Kaniya. Ang dili pagsunod sa mga sugo nga dili nato ganahan makapahikaw kanato sa Iyang gisaad nga mga panalangin.
Ang pagsunod sa mga sumbanan sa ebanghelyo ug ang pagtuman sa mga sugo maoy nakapalahi kanato isip tinuod nga mga disipulo ni Kristo. Kon mohimo kita niana nga lakang sa paglakaw gikan sa maayo ngadto sa mas maayo, tinuoray kita nga nakapahimuot sa atong Amahan sa Langit. Dili kita pwedeng magduha-duha kon mosunod ba o dili niini nga ebanghelyo. Mahimo ra kitang moabante o moatras, ug ang ideya nga “Maayo na ang akong gibuhat karon” dili kalikayan nga maoy hinungdan nga moatras kita. Apan kon mosalig kita ni Jesukristo ug sa gahum sa Iyang Pag-ula nga molambo bisan og ginagmay kada adlaw, nan makapuyo kita uban sa Iyang kalinaw ug masayud nga kita nahimong matang sa mga tawo nga nasayud Siya nga kita mahimo.