Uira’a & pāhonora’a
« ’Ua parau mai te tahi mau ta’ata iā’u ē, e tītauhia iā’u ’ia fa’ahoa i te mau ta’ata e ’ere hō’ē ā tā mātou mau fa’aturera’a, nō te ha’apa’ari i tā’u mau fa’aturera’a. E parau mau ānei te reira ? »
I te hope’ara’a, e tae mai te ha’apūaira’a i tā ’outou mau fa’aturera’a nā roto i te ha’api’ira’a ’e te orara’a i te ’evanelia a Iesu Mesia, ’e e nehenehe te mau hoa e tauturu mai ’e ’aore rā e fa’atāfifi i te ravera’a i te reira. E pūai rahi tō te mau hoa i ni’a ia ’outou—i ni’a i te huru nō tō ’outou ferurira’a, e paraparau ’e e rave i te hō’ē mea ’e tae noa atu i ni’a i te huru ta’ata e riro mai ’outou. Tē ha’api’i nei Nō te pūai o te Feiā ’Āpī ē, « ’A mā’iti i te mau hoa hō’ē ā tā ’outou mau peu, ’ei reira ïa e ti’a ai ia ’outou ’ia ha’apūai ’e ’ia fa’aitoito i te tahi ’e te tahi i te ha’apa’ora’a i te mau fa’aturera’a teitei ». ([2011], 16). E tauturu teie huru hoa ia ’outou ’ia ora i te ’evanelia a Iesu Mesia, ’ia ha’apa’o i te mau fa’aturera’a ’e ’ia riro mai ’ei ta’ata maita’i a’e.
Teie rā, e’ita te mau ta’ata ato’a tā ’outou e haere atu nā muri e pe’e i te hō’ē ā fa’aturera’a mai ia ’outou, ’e ’aore rā e riro mai e melo nō te ’Ēkālesia. E mea faufa’a rahi ’ia vai hoa noa ’e te mau ta’ata ’e ’ia rave ia rātou mai tā te Fa’aora e nā reira—ma te here ’e te maita’i. ’A tāmau noa ai ’outou i te ora i tā ’outou mau fa’aturera’a, e riro mai ’outou ’ei « ha’apa’ora’a … nā tei fa’aro’o ra, i te parau, i te haere’a, i te aroha, te huru o te ’ā’au, i te fa’aro’o, i te vi’ivi’i ’ore » (1 Timoteo 4:12). Nā roto i tō ’outou hi’ora’a, e ’ite mai rātou i tā ’outou mau ha’amaita’ira’a i te orara’a i te mau fa’aturera’a teitei, ’e e nehenehe ato’a tā ’outou ’ia fa’aitoito ia rātou ’ia nā reira ato’a mai.
’A ’imi i te arata’ira’a a te Vārua Maita’i—’e ’ia roa’a te itoito nō te ’ohipa ’ia au i Tāna mau fa’aurura’a—’a mā’iti ai ’outou i te hoa ’e ’a tūtava ai i te ha’apūai i tā ’outou ha’apa’ora’a i te mau fa’aturera’a.
Te mau hoa mau
Tō’u matahiti mātāmua i te tuha’a mātāmua o te ha’api’ira’a tuarua, ’ua taiā ri’i au ē e’ita e ’itehia iā’u te tahi hoa e fa’atura i ta’u mau fa’aturera’a. ’Aita i maoro roa, ’ua riro mai māua te hō’ē tamāroa i roto i te piha ha’api’ira’a ’ei hoa, ’e ’ua parau vau iāna e mōmoni au. ’Ua uiui haere mai ’oia nō ni’a i te reira, nō reira ’ua hōro’a atu vau iāna i te hō’ē buka na’ina’i Nō te pūai o te Feiā ’Āpī. Mai taua mahana ra, ’ua fa’aea ’oia i te tuhi nā mua iā’u. Mai te peu e mau hoa mau tō ’outou mau hoa, e fa’atura mai rātou i tā ’outou mau fa’aotira’a ma te tauturu ia ’outou i te tāpe’ara’a i tā ’outou fa’aturera’a.
Candela M., 13 matahiti, Buenos Aires, Rāparata
Pe’e i te parau a te peropheta
I te tahi taime e mea pa’ari ’ia pāto’i i te fa’ahemara’a mai te mea e haere tātou nā muri i te mau hoa e mau mā’itira’a hape tā rātou ’e ’aore rā e tāmata rātou i te fa’arave ia tātou i te mau mā’itira’a hape. ’Ua parau te mau peropheta ia tātou i roto i te buka na’ina’i Nō te pūai o te Feiā ’Āpī ē, « E fa’auru [te mau hoa] i tō ’outou ferurira’a ’e tā ’outou ’ohipa e rave, ’e e tauturu ato’a rātou ’ia fa’aoti e aha te huru ta’ata e riro atu ’outou » ([2011], 16). I tō’u mana’o e mea ti’a ’ia roa’a te mau hoa tei hina’aro i te fa’atura i tā tātou mau fa’aturera’a ’e tae noa atu e fa’a’ite mai rātou i tō rātou hina’aro ’ia ha’apa’o rātou i tā tātou mau fa’aturera’a.
Calvin W., 16 matahiti, Arizona, Marite
’A ha’amana’o i tā ’outou mau fa’aturera’a
E nehenehe te mau hoa ’aita e tū’ati ra i tā ’outou mau fa’aturera’a e ha’aparuparu ’e e ha’aparuparu i te reira. I te taime mātāmua ’a tae ai au i ta’u fare ha’api’ira’a ’āpī, ’ua tāmatamata vau i te parau i te mau parau ’ua hina’aro te ta’ata ’ia parau vau, ’ia fāri’ihia mai au. Fātata roa vau i te ha’amo’e i te tahi mau fa’aturera’a ’a tāmata ai au i te riro mai ia rātou ra. ’Ua ’ite au i teienei ē, nō te pa’ari i roto i te fa’aturera’a, tītauhia te mau hoa e turu ’e e pe’e i te mau fa’aturera’a mai ia ’outou. ’Ua māuruuru vau ’ua ’ite mai au i muri iho i te mau hoa mai te reira te huru nō te mea e fa’aha’amana’o mai rātou iā’u i tā’u mau fa’aturera’a.
Logan J., 15 matahiti, Utah, Marite
Fa’ateitei noa i tā ’outou mau fa’aturera’a
E’ita paha te mau hoa e fa’aturera’a ta’a ’ē tā rātou e ha’apūai i tā ’outou, ’ia riro rā ’outou ’ei hoa nō rātou, e ti’a ia ’outou ’ia fa’a’ite i te hi’ora’a maita’i nō te pe’e. E hoa ana’e tō ’outou ’aita e tū’ati i ni’a i tō ’outou ti’aturira’a, e nehenehe te reira e fa’aitoito ia ’outou ’ia fa’ateitei noa i tā ’outou mau fa’aturera’a ma te tauturu ia ’outou ’ia ti’a nō te ’ohipa ti’a.
Warren S., 14 matahiti, Oregon, Marite
E ha’amaita’ira’a te mau hoa maita’i
Mai te mea ’aita te mau fa’aturera’a a te mau hoa mai tā ’outou, e nehenehe e fifi roa nō te ha’apūai i tā ’outou iho. ’Ua tauturu noa mai te tai’ora’a i te Nō te pūai o te Feiā ’Āpī iā’u ’ia mā’iti i te mau hoa maita’i e fa’atura iā’u. I teienei tē fa’aineine ra vau nō te tāvini i te hō’ē misiōni, ’e ’ua ’ite au ē, ’ua tauturu te ti’ara’a i rotopū i te mau ta’ata hō’ē ā fa’aturera’a ’ia vai ha’apa’o maita’i noa i roto i te ’evanelia.
Nair M., 19 matahiti, Buenos Aires, Rāparata
’A mau te rima i ni’a i te ’auri
Te mau hoa e fa’aturera’a maita’i, ’o te mea roa ïa tā ’oe e hina’aro. E hina’aro ’oe ’ia fa’a’ati mai te mau hoa e riro i te tauturu ia ’oe ’ia ha’apa’o i te mau fa’auera’a ’e ’ia fa’aitoito ia ’outou ’ia ora parau ti’a. ’A tāpe’a pūai i te rima i ni’a i te ’auri, ’o te arata’i i te rā’au o te ora, ’eiaha i te fare rahi ’e te ’ā’ano. ’Ia fa’a’ati ’oe ’ia ’oe iho i te parau ti’a ’ore, e fa’ahemara’a ïa i te hope’a. ’A tītau i te mau hoa maita’i e fa’auru ia ’oe ’ia ora i te ’evanelia.
Annie P., 13 matahiti, Utaha, Marite
’A pure ’ia ’itehia mai te tahi mau hoa
I te fa’anu’ura’a mātou tō’u ’utuāfare i te tuha’a fenua ’āpī, ’ua pure tāmau noa vau ’ia ’itehia mai te mau hoa e nehenehe tā’u e paraparau i te ’evanelia. ’A pure ai au ’ua tae mai te tāmāhanahanara’a ē ma’a ’āva’e i muri iho, e mau hoa fa’ahiahia tā’u i ’ite. E nehenehe tā’u e ti’aturi e turu mai rātou, ’e ’ua tauturu mai rātou iā’u ’ia fa’atupu i te here rahi a’e nō te ’evanelia. ’Ua ’ite au ē, e mea faufa’a rahi te mau hoa ’e e nehenehe tā rātou e fa’a’ōhie nō tātou te orara’a i te ’evanelia.
Sarah P., 16 matahiti, Rio de Janeiro, Beresiria