Tāvinira’a i roto i te ’Ēkālesia
Ta’u mau sābati tei ’ī i te tāvinira’a
Tē ora nei te ta’ata pāpa’i i California, i Marite.
Ua ’ī ta’u mau sābati, ’ua māuruuru rā vau i te mea ē, e ti’a iā’u ’ia tāvini ma te tāfifi ’ore i te mau ’ati tā te mau feiā fa’atere mātāmua i fa’aruru, mai ia Elder Parley P. Pratt.
Fa’ahōho’ara’a nā Chidy Wayne
E sābati po’ipo’i. I mua iā’u e 12 hora tei tārenahia nō te mau ’āpo’ora’a, te mau uiuira’a, te mau ha’amaura’a ’e te mau fa’atōro’ara’a. E ha’amata i te hō’ē fare pū o te titi ’e fa’aoti i te tahi atu fare purera’a i te tahi pae o te ’oire—e mahana ve’ave’a ho’i teie.
Tē tīa’i maoro nei au i te ’āpo’ora’a tāta’itahi, te uiuira’a, te ha’amaura’a ’e te fa’atōro’ara’a. Inanahi ra, ’a feruri ai au i teie ’ohipa rahi, ’ua huru amuamu ri’i au i teie vaira’a—ē rave mai nei au i te Parau tuatāpapa nō ni’a ia Parley P. Pratt tāna iho i pāpa’i ’e ha’amata a’era i te tai’o fa’ahou ā. ’Ua mau Elder Pratt i te ’auri nā muri ia Iosepha Semita ’e Hairamu ’e te tahi fa’ahou mau ta’ata i terā mau mahana ’ati rahi ra i Missouri. I te ’āfa’ira’ahia rātou i Independence, ’ua tāpe’ahia rātou i roto i te hō’ē fare tīpaera’a ’e ’ua ta’oto noa rātou i ni’a i te tahua ’e te tahi tāpū rā’au ’ei tūru’a.
I te hō’ē po’ipo’i to’eto’e ’e te hiona, ’ua ti’a mai Elder Pratt ’e, ma te tāpuni, ’ua matara mai i rāpae i te fare. ’Ua haere a’era i te pae hiti’a o te rā nā terā ’oire ’e nā roto i te mau fa’a’apu tāpiri. I te āteara’a ’oia hō’ē maile (1,6 km), ’ua tomo a’era Elder Pratt i roto i te hō’ē uru rā’au, tē tāpo’i ra te hiona i tōna tere nā reira ato’a te mau tumu rā’au.
’Ua feruri ’oia i teie vaira’a atāta nōna. ’Ia tāmau ā ’oia i te pae hiti’a o te rā, e horo ïa ’oia i roto i te tahi atu tuha’a fenua, i reira tōna ’utuāfare e nehenehe ai e haere mai. ’Ia ho’i ’oia i te fare tīpaera’a, ’ua mau ïa ’oia i te ’auri ’e e fa’ahapahia i te tahi mau hara rahi. ’Ua tae mai te mana’o e horo roa, ’ua feruri rā Elder Pratt i te « vero fifi ’aore rā te pohe » e topa mai i ni’a i te tahi mau mau ’auri tei vai noa i’ō.
I roto i teie tāfifira’a mana’o, ’ua puta mai i roto iāna te hō’ē ’īrava : « ’O tei hina’aro ho’i i te tāpe’a i tōna ora, e ’ere ïa i te ora ; ’e ’o tei ti’a iāna i te tu’u i tōna ora iā’u ’e te ’evanelia nei, e ora ïa tōna » (hi’o Mareko 8:35 ; PH&PF 98:13).
’Ua ho’i Elder Pratt i te fare tīpaera’a. Tau ’āva’e mau ’auri teimaha roa tei rāterehia—’aita e ’utuāfare, ’aita te hoara’a o te feiā mo’a ’e ’aore rā te ti’ara’a nō te tāvini i roto i tōna pi’ira’a ’āpōsetolo.1
’Ua tāpiri au i te buka ’e ’ua feruri atu ra i te ha’avīra’a tei fa’aruruhia e te feiā mo’a mātāmua—tē vai ra e mau tupuna nō’u. Nō tō rātou ’itera’a pāpū nō te ’evanelia ’e tō rātou fa’aro’o ia Iesu Mesia, ’ua fa’a’oroma’i rātou i te ’ohipa ’ino mau ’e te hāmani-’ino-ra’a. Nō tō rātou fa’a’oroma’ira’a, i teie mahana e nehenehe ai au e tāvini ’e e ha’amori ma te ti’amā, tā’amuhia ia rātou i roto i te fa’aro’o ’e te ’itera’a pāpū.
’A fa’aineine ai au nō teie mahana sābati, teie tō’u ’utuāfare ’aita e atātara’a i ni’a ia rātou, tē tīa’i ra i te mahana ha’amori i roto i te hō’ē fare au maita’i. E riro te fa’ahoara’a ’e te feiā mo’a i te fa’a’ana’ana i tō mātou mahana. E ’oa’oa mātou ’e ’o rātou i te mau ha’amaura’a ’e te mau fa’atōro’ara’a e ravehia, ma te hōpoi’a tei ’amohia ’e te fa’aro’o tei ha’apūaihia. E rave mātou i te ’ōro’a mo’a ma te ha’amana’o i tō tātou Fa’aora ’e Tāna tusia tāra’ehara. ’E i teie pō, e putuputu mātou i roto i tō mātou fare nō te tai’o i te Buka a Moromona ’e nō te pure ’āmui hou ’a tārava ai i ni’a i te ro’i marū ’e te tūru’a marū ato’a i raro a’e i te upo’o.
E mea ’ī ta’u mau sābati. ’Ua māuruuru roa vau nō te reira ’e ’ua ha’amaita’ihia.