’Ua haere e tāi’a
Tē ora nei te ta’ata pāpa’i i Georgia, i Marite.
’Ua tīa’i maoro noa Hayden nō te haere e tāi’a. ’Āhani pa’i ’aita Dan i haere ato’a mai […]
« E ’utuāfare maita’i tō’u i te ao nei ». (Te mau hīmene, 184).
« Mai ’a mau tō ’ā’ira. Haere ana’e e tāi’a ! » ’Ua parau ’o pāpā.
E mata ’ata’ata tō Hayden ’a hi’o haere ai ’oia i teie vāhi. E mea ’ana’ana te mau mea ato’a ’e e mū noa tei fa’aro’ohia. Nō rātou noa teie roto tā’āto’a !
Haere atu ra Hayden ’e tōna pāpā i muri i te pere’o’o ’e ’amo mai nei te ’āfata rahi nō te mau ’āinu. E ’āfata teiaha, ’aita rā e fifi. ’Āhani te teiaha i tāta’ipiti, ’aita ïa e fifi mai te peu nō te haere e tāi’a nā muri ia pāpā.
Tōtētē te mau ’ā’ira ’ia huti mai pāpā i te reira. « ’Ā, ’ua ta’oto paha Dan », ’ua parau ’oia. « ’A haere na e fa’aara iāna ? »
Amuamu ri’i Hayden. « Nā reira ïa ».
Fātata roa i te mo’e iāna ē, ’ua haere ato’a mai tōna teina ’o Dan. Mea horo haere noa ’o Dan ’e te paraparau pūai. E horo pauroa te i’a iāna !
Hi’o a’era ’oia nā roto i te ha’amāramarama. « Dan ’a ti’a ».
Tē ta’oto noa ra ’o Dan.
Feruri a’era o Hayden. Penei a’e e ta’oto noa ’o Dan ē ho’i noa atu mātou.
Ta’ita’i marū noa a’era Hayden i te ’āfata ’āinu i tāhatai tei reira tōna pāpā.
« Teie te mau ’āinu, te mau to’e ’e te mau mea ato’a ».
Rave mai nei pāpā i te ’āfata. « ’Ua oti roa, māuruuru ». Fāriu a’era pāpā. « Tei hea tō ’oe teina ? »
Hi’o ihora Hayden i te pere’o’o. ’Ua mana’o a’era ’oia ē, e aha pa’i tōna mana’o mai te peu e ara mai ’oia ’e ’o ’oia ana’e i teie vāhi ’āpī. E ’ere i te mea maita’i, ’ua mana’o ’o Hayden. Inaha e ri’ari’a mau paha ’oia. Nā ni’a atu e pae noa matahiti tō Dan.
« E haere au e hi’o pāpā. E’ita e maoro ». I te haerera’a rā ’oia e hi’o i roto i te pere’o’o, ’aita fa’ahou ’o Dan !
’Ore roa terā māniania mū o te mau manumanu. Māmū te mau mea ato’a.
« ’Aita Dan tō ’ō nei ! » ’Ua tuō atu Hayden.
Horo mai nei pāpā i te pere’o’o nō te hi’o haere.
« Tē ’imi ra paha ’oia ia tāua », ’ua parau pāpā. « ’Aita i minuti. ’Aita ’oia i ātea roa ».
Tāmata noa Hayden i te vai hau, ’aita iho ā, ’ua viri’ō roa tōna ’ōpū. « E nehenehe ānei e pure ? »
« Tē mana’o nei au e mana’o maita’i roa te reira ».
’Ua ha’amāuruuru Hayden i te Metua i te Ao ra nō tōna teina ma te ani atu ’ia ’ite-vitiviti-hia mai Dan e rāua ’ia ’ore ’oia e ri’ari’a.
I te otira’a tāna pure, ’ua fa’aea te māfatu o Hayden i te ’ōtu’itu’i pūai.
Tāpe’a a’enei te pāpā i te tapono o Hayden. « ’Āhani ’o ’oe Dan ? I hea ’oe e haere ai ? »
Hi’o a’era Hayden, ’ua matara noa te ’ōpani i terā pae mai o te pere’o’o. Pāpū ē ’aita ’o Dan i ’ite mai ia rāua i te pae tāhatai. Toro ihora Hayden i tōna rima i ni’a i te hō’ē ’ē’a nā pīha’i iho. « ’Ia mana’o vau, e haere au nā terā ’ē’a », ’o tāna ïa i parau.
Tāpapa a’era rāua nā terā ’ē’a.
Mai te huru ra ē, ’ua maorohia te sētoni tāta’itahi ’e e mea teimaha. ’A haere noa ai Hayden, te pure noa ato’a ra ’oia i roto i tōna ’ā’au. Te tahi noa āteara’a i mua, tei te hō’ē tī’oira’a rāua ’e tei mua ri’i noa atu Dan.
« E Dan ! » ’Ua tuō atu Hayden.
Fāriu mai nei Dan ’e ’ata a’era. « Tei hea ’ōrua ? »
Tere fa’ahou a’enei te hora i tōna vitiviti. Horo atu ra Hayden ia Dan ra ’e tauahi pūai ihora iāna.
« ’Ua ’oa’oa roa vau i te ’itera’a ia ’oe », ’ua parau Hayden. Fa’ahiti ihora ’oia i te tahi pure poto nō te māuruuru o tōna ’ā’au.
’Ua ’ata noa mai ’o Dan. « Tei hea te i’a ? »
« ’A haere mai, e fa’a’ite atu vau ia ’oe », ’ua parau Hayden. ’Ua kirikiri tōna ’āvae i te horora’a atu i tātahi. « ’Āhani na e hi’o tātou nā vai e hī mai i te i’a mātāmua. Nā’u e tauturu ia ’oe ’ia tāmau i te ’āinu. »