Savali a le Au Peresitene Sili
O Faamanuiaga o le Usiusitai
Saunia e Peresitene Thomas S. Monson
Ata na tusia e Jim Madsen
“O le lesona aupito sili e mafai ona tatou aoaoina i le olaga faaletino,” sa aoao mai ai Peresitene Thomas S. Monson, “e faapea a fetalai mai le Atua ma tatou usiusitai i ai, o le a tatou sa’o pea i taimi uma.”1
O le a faamanuiaina foi i tatou. E pei ona saunoa mai Peresitene Monson i se konafesi aoao talu ai nei: “A tatou tausia poloaiga, o le a fiafia atili o tatou olaga, sili atu ona faamalieina, ma itiiti le faigata. O le a faigofie atu ona onosaia o tatou luitau ma faafitauli, ma o le a tatou mauaina faamanuiaga folafolaina [a le Atua].”2
I fuaitau nei mai aoaoga a Peresitene Monson i le avea ai ma Peresitene o le Ekalesia, ua ia faamanatu mai ai ia i tatou o poloaiga o le taiala sili lea ona mautinoa i le fiafia ma le filemu.
O Taiala mo le Malaga
“E le i aumaia poloaiga a le Atua ina ia faaoso ita ia i tatou pe avea ma ni faafitauli i lo tatou fiafia. Ae e moni le faafeagai. O Le na foafoaina i tatou ma alofa ia i tatou ma le atoatoa, e silafia le auala tatou te manaomia ona ola ai i olaga ina ia maua le fiafiaga silisili e mafai ona maua. Ua Ia saunia ni taiala mo i tatou ia, afai tatou te mulimuli ai, o le a taitai atua i tatou ma le saogalemu i lenei malaga faaletino e tele ina lamatia. Tatou te manatuaina upu o se viiga masani: ‘Tausi Poloaiga! O i ai le malu; ma le filemu’ [tagai “Tausi Poloaiga,” Viiga, nu. 186].”3
Malosi ma le Malamalama
“O le usiusitai o se uiga tupito lea o perofeta; ua latou maua ai le malosi ma le malamalama i le talafaasolopito atoa. E taua mo i tatou le iloaina tatou te agavaa foi i lenei puna o le malosi ma le malamalama. E faigofie ona avanoa ia i tatou taitoatasi i le asō pe a tatou usiusitai i poloaiga a le Atua. …
“O le malamalama lea tatou te sailia, o tali o loo tatou mananao ai, ma le malosi ua tatou manaomia i nei aso e faafetaiaia ai luitau o se lalolagi faigata ma fesuisuiai e mafai lava ona fai mā tatou pe a tatou naunau e usiusitai i poloaiga a le Alii.”4
Filifili e Usiusitai
“O le uiga masani o o tatou taimi o le talia gofie. E faaalia e mekasini ma ata televise ia tagata lauiloa o atatifaga, o toa manumanu o malae afeleti—o i latou e moomoo i ai le toatele o tupulaga talavou e faataitai i ai—e le amanaiaina ai tulafono a le Atua ma lē taofiofia ai faiga e tumu i le agasala, e foliga mai e leai se aafiaga leaga. Aua e te talitonu i ai! E i ai le taimi o le faamasinoga—o se taimi e faapaleni ai tusi. E tofu lava le Cinderella ma lana vaeluapo—a lē o le olaga nei, o le isi. O le a oo mai le Aso Faamasino mo tagata uma. … Ou te aioi atu ia te outou e filifili ia usitai.”5
Olioli ma le Filemu
“Atonu e foliga atu ia te oe i nisi taimi o i latou i fafo i le lalolagi o loo matua fiafia lava nai lo oe. O nisi o outou atonu e lagonaina le taofiofia e tulaga faatonuina o le amio lea e ao ia i tatou i totonu o le Ekalesia ona usitaia. Peitai, ou uso e ma tuafafine, ou te tautino atu ia te outou, e leai ma se mea e mafai ona aumaia le olioli sili atu i o tatou olaga po o le filemu sili atu i o tatou agaga nai lo le Agaga lea e mafai ona afio mai ia i tatou pe a tatou mulimuli i le Faaola ma tausi i poloaiga.”6
Savavali Sa’o
“Ou te molimau atu ia te outou, e le mafuatiaina o tatou faamanuiaga folafolaina. E ui ina foufou mai afa, e ui ina to mai uaga i o tatou luga, ae o lo tatou malamalama i le talalelei ma lo tatou alolofa i lo tatou Tama Faalelagi ma lo tatou Faaola, o le a faamafanafanaina ma lagolagoina i tatou ma aumaia le olioli i o tatou loto pe a tatou savavali sa’o ma tausi poloaiga. O le a leai se mea o lenei lalolagi e mafai ona manumalo ia i tatou.”7
Mulimuli i le Faaola
“O ai lenei Tagata o faanoanoaga, ua masani ma le tiga? O ai le Tupu o le mamalu, lenei Alii o au? O Ia o lo tatou Matai. O Ia o lo tatou Faaola. O Ia o le Alo o le Atua. O Ia o le Mataisau o lo tatou Faaolataga. O loo Ia valaau mai, ‘Mulimuli mai ia te au.’ O loo Ia faatonu mai, ‘Ina alu ia, ma ia faapea ona fai.’ O loo Ia augani mai, ‘Tausi au poloaiga.’
“Ia tatou mulimuli ia te Ia. Ia tatou faataitai i Lana faataitaiga. Ia tatou usiusitai i Lana afioga. I le faia o lea mea, tatou te avatu ai ia te Ia le meaalofa paia o le lotofaafetai.”8