Manatunatuga
Tausamaaga Mulimuli a Maleva
E alala le tusitala i Iuta, ISA.
“E te fia manao e taumafa i le faamanatuga?” Sa ou fesili atu ai i lo’u tina ua vaivai a talioti.
Ata na tusia e Christopher Thornock
Sa ola lo’u tina i le 92 tausaga le matua ma maliu ai talu ai nei. Sa i ai o ia i le maota gasegase ina ua tonu i fomai ua le o toe i ai se isi mea e mafai ona toe faia sei vagana ai le faatoafimalieina o ia i le mea e mafai ai seia oo ina maliu.
A o faia ni tapenaga e avatu o ia i le fale, sa o mai ni alii se toalua mai se uarota i le lotoifale i totonu o le potu ma fesili mai ia te au pe faamata e fia manao lo’u tina i le faamanatuga. Sa muamua ou fai atu i ai, “Leai, faafetai.” Sa faigata ia tina ona folo se meaai (tulou). Ona ou faapea atu lea, “I se isi manatu, sei ou fesili atu pea ia te ia.” Sa ou faalatalata atu i lona taliga ma fai i ai, “E toalua au perisitua o loo i ai iinei. E te fia manao e taumafai e taumafa i le faamanatuga?” I se leo vaivai ae manino sa ia tali mai ai, “Ioe.”
Ina ua uma ona faamanuia, sa ou pikiina i luga se fasi falaoa mai le fata, vavae sina fasi mea lava ma tuu atu lemu i lona fofoga. Sa ia taumafai teisi i ai, ma sa ou faamalulu atu i nai alii ia ona ua fai sina umi o tau faatino. Sa la faamautinoa mai ia te au e le afaina. Ina ua mavae le tatalo lona lua, sa ou avae le tamai ipu uga o le vai ma tuu atu i ona laugutu. Sa ia fai sina ana miti teisi, ae sa ou te’i i le lelei o lona foloina o le vai.
Sa ou faafetai atu i nei tuagane, ma sa o ese atu mo le isi potu na sosoo ai. Sa maliu filemu tina pe tusa ma se itula mulimuli ane.
I aso na soo ane ai, sa ou iloa ai le maeu naua o se taimi paia sa faatagaina au e faasoa ma si ou tina. O le mea mulimuli lava sa ia faia i lenei olaga o le taumafa lea i le faamanatuga. O le upu mulimuli lava sa ia saunoa i ai o le “Ioe”—ioe i le taliaina o le faamanatuga, ioe i le ofoina atu o lana taulaga o “se loto momomo ma le agaga salamo” (3 Nifae 9:20), ioe i le tauaveina i ona luga o le suafa o Iesu Keriso ma folafola atu e manatua pea o Ia, ioe i le mauaina o Lona Agaga. O mea mulimuli lava na oo atu i ona laugutu o faatusa o le faamanatuga.
E maeu le suamalie o lana tausamaaga mulimuli i lana tofo! E ui i le vaivai tele e minoi pe tautala, ae atonu sa ia lagonaina le maeu o lona malosi ia Keriso! Atonu e maeu lona lagonaina o lona faafetai mo Lona mana togiola ma gafatia, lea na tauaveina o ia i na taimi faaiu o lana malaga i le olaga faaletino ma faaloaloa atu ai ia te ia le faamoemoe mo le ola e faavavau.
O vaiaso taitasi uma a o tatou aai ma feinu i le faamanatuga, tau ina ia tatou taufai maua uma le lotofaafetai mo le avanoa ua tatou maua e toe faafou ai a tatou feagaiga ma lagona ai le faamagaloga ma le alofa tunoa a o tatou taumafai ia avea atili e faapei o lo tatou Tama oi le Lagi ma Lona Alo, o Iesu Keriso. Ona mafai lea ona avea o le areto ma le vai ma tatou, e pei lava foi ona i ai mo lo’u tina, “ua sili ona suamalie i luga o mea uma ua suamalie, … ma sili ona paepae i luga o mea uma ua paepae” (Alema 32:42).