O Le Aiga ua Faauuina e le Atua

Ia suesue ma le agaga tatalo lenei savali ma saili ia iloa mea e faasoa atu. O le a faapefea ona faateleina e le malamalama i le, “O Le Aiga: O Se Folafolaga i le Lalolagi” lou faatuatua i le Atua ma manuia ai i latou e te vaavaaia e ala i asiasiga a faiaoga asiasi? Mo nisi faamatalaga, alu i le reliefsociety.lds.org.

Ata

family walking near the temple

Ata na pueina i luma o le Malumalu o Buenos Aires Atenitina

“I upu o le [pese a le Peraimeri], ‘The Family Is of God,’ … ua faamanatu mai ai ia i tatou le aoaoga faavae mama,” sa saunoa mai ai Carole M. Stephens, Fesoasoani Muamua i le Au Peresitene Aoao o le Aualofa. “Ua tatou aoao e le gata o le aiga e ou le Atua ae ua avea foi i tatou taitoatasi ma vaega o le aiga o le Atua. …

“… O le fuafuaga a le Tama mo Lana fanau o se fuafuaga o le alofa. O se fuafuaga e faatasia ai Lana fanau—Lona aiga—faatasi ma Ia.”¹

Sa saunoa mai Elder L. Tom Perry (1922–2015) o le Korama a Aposetolo e Toasefululua e faapea: “Tatou te talitonu foi o aiga malolosi ua masani ai e le gata o iunite faavae ia o se malo mautu, o se tamaoaiga mautu, ma se aganuu mautu o tulaga faatauaina—ae o i latou foi o iunite faavae o le faavavau ma o le malo ma le faigamalo a le Atua.

“Tatou te talitonu o le faatulagaga ma le faigamalo o le lagi o le a fausiaina i aiga ma aiga lautele.”²

“O tagata uma, e tusa lava po o a o latou tulaga faaleulugalii pe toafia foi le aofai o le fanau, e mafai ona avea ma e puipuia le fuafuaga a le Alii o loo faamatala mai i le folafolaga o le aiga,” sa saunoa ai Bonnie L. Oscarson, Peresitene Aoao o Tamaitai Talavou. “Afai o le fuafuaga lea a le Alii, e tatau foi ona avea ma a tatou fuafuaga!”³

Mau Faaopoopo

Mataupu Faavae ma Feagaiga 2:1–3; 132:19

O Le Aoaoga Faavae o le Aiga

Sa aoao mai e Sister Julie B. Beck, le sa avea muamua ma Peresitene Aoao o le Aualofa e faapea o le mataupu paia o le aiga e faavae lea i le Foafoaga, le Pau, ma le Togiola a Iesu Keriso:

“Ua saunia e le Foafoaga o le lalolagi se nofoaga e mafai ona nonofo ai aiga. Na foafoaina e le Atua se tane ma se fafine o ni afa tutusa taua se lua o se aiga. O se vaega o le fuafuaga a le Tama Faalelagi ina ia faamauina Atamu ma Eva, ma fatuai ai se aiga e faavavau.

“… Ona o le Pau ua mafai ai e i laua ona maua atalii ma afafine.

“O le Togiola [a Keriso] e mafai ai e le aiga ona faamau faatasi e faavavau. Ua mafai ai ona maua e le aiga le tuputupu ae ma atoatoaga e faavavau. O le fuafuaga o le fiafia, ua taua foi o le ata o le faaolataga, o se fuafuaga na foafoaina mo aiga. …

“… O le aoaoga faavae lea a Keriso. … A leai le aiga, e leai se fuafuaga; leai se mafuaaga mo le olaga faaletino.”⁴