O Le Vavega o le Vevela Feoloolo
E te manao ai i le taimi nei—pe e te manao ina ia sa’o?
Mafaufau faapea o se alii talavou o loo i le fale na o ia ma ua fiaai (e seasea lava fiaai aua e ai soo, ioe, ae tau ina mafaufau i ai). Ia mafaufau nei ua tonu i lenei alii talavou e taumafai e fai se saunisi faasisi e tao lava e ia mo le taimi muamua lava.1 Mafaufau sa lei aoaoina lava e matua o lenei alii talavou o ia i le taoina o le sisi ma na te lei matauina lava [ona matua] ma le totoa i taimi la te faia ai.
Faapea la, e ui ua maua uma e lenei alii talavou mea uma e fai ai ma ua sao lelei: falaoa, sisi, sina pata i luga o le patua o le falaoa (ma sina meioneise i totonu ona ua ia atamai). Ona sosoo lea, ua ia toso mai i fafo le falai ma tuu i luga o le ogaumu. (O loo tatou mafaufauina foi e le o i ai sana ogaumu faapitoa e tao ai po o se isi masini mo le faiga o lenei meaai.)
Ia mafaufau nei ua oo atu se manatu patino i lona mafaufau—o se manatu e toatele lava tagata latou te le amanaiaina (pe faavalevalea ai foi mo se taimi) e mafaufau i ai: “Afai ou te kiina i luga le vevela, o le a vave ona vela.”
Mafaufau po o le a le mea e sosoo ai. (Po o le masalo foi e te le tau mafaufau i ai.)
O le a ia mauaina a le o le paanunu atoa, ma enaena lelei le falaoa ia po o le liusuavaia atoa ma le piipii o le sisi—ae le o mea uma e lua. E foliga mai lava, o le a ia maua se falaoa e foliga ma galemulemu (ma masalo lava e tofo) pei o se maa o le lava ma se sisi e lei liusuavaia uma, lea e le faatosinaina sesi e aia.
O lona faafitauli, e pei ona outou vaai i ai, o se tuufaatasiga o le faavalevalea (lea e faatagaina) ma le le onosai (lea, e ui e malamalama i ai, ae tau le faatagaina). Afai na te toe faia lea measese i se isi taimi, o le a itiiti ifo lona faatagaina, talu ai ona e le mafai ona tuuaia i le faavalevalea ae o le a mafua uma lava mai le le onosai.
Ina ia faia ia sa’o, e ao ona ia iloaina le vavega o le vevela feoloolo.
O Le Feoloolo e Le o le Faafiufiu
O le setiina i le feoloolo i luga o se ogaumu ua matua lelei atoa mo le taoina o le sisi ma le tele o isi meaai ona na te faatagaina meaai ina ia vela i le taimi atoa e aunoa ma le mu i le pito i fafo. E na o le pau lava si ona lave e manaomia ai se taimi sili atu ma le gauai, lea e manaomia ai la le onosai.
Sa fetalai mai le Alii, “Faaauau pea i le onosai seia faaatoatoaina outou” (MF&F 67:13). O loo Ia saunoa ii e uiga i le ituaiga o atoatoa lea e sili atu i lo le faiga o ni saunisi sisi e tao ia lelei atoa; e finagalo o Ia ia tatou avea atili e faapei o Ia. O Iesu Keriso o le faataitaiga sili o le onosai. Ma o se vaega o le mulimuli i Lana faataitaiga o lona uiga o le faalauteleina o la tatou vaai, ia vaai i tala atu o mea mo na o le taimi nei, ma vaai i taui sili atu e oo mai mai le lotopulea, faatuatua, usiusitai, taumafaiga mausali ma faifai pea, loa ona talitiga, ma le alofa—i nisi upu, ia maua le onosai.
O le uiga la, o le onosai e aofia ai le faatalitali, lea e atonu e faafiufiu, ae e pei ona aoao i tatou e Peresitene Dieter F. Uchtdorf, Fesoasoani Lua i le Au Peresitene Sili, e sili atu nai lo le tau na ona faatalitali: “O le onosai o lona uiga o le faatalitali mataalia ma le tumau. O lona uiga o le faia pea o se mea ma faia mea uma tatou te mafaia—galulue, faamoemoe, ma le faatinoina o le faatuatua; lavatia o faigata i le malosi, e tusa lava pe ua faatuutuu manaoga o o tatou loto. O le onosai e le na o le tumau, ae o le tumau lelei ai!”2
E le na o le tuuina o le saunisi sisi e tao i luga o le apa ma galo ai; ae o le vaavaaiga ma le feliua’iga i le taimi sa’o.
E le na o le tau na ona alu i le aoga po o le seminare po o le lotu; o le aoao mataalia po o le tapuai.
E le na o le faatalitali mo se molimau o le Tusi a Mamona ina ia faaee mai i ou luga ona na e ole atu mo se molimau; ae o le faaauau pea ona faitau, suesue, mafaufau loloto, tatalo, ma le ola ai e tusa ma mataupu o lena tusi.
E le na o lou nofo ai iina a o loo faatauemu mai au uo i lau lotu; ae o le tatalo mo i latou ma manao moni mo i latou ina ia maua se suiga o le loto ma faia mea e te mafaia e faataunuu ai.
E le na o le faatalitali seia atoa le 16 e tafao faamasani ai; ae o le aoao ia fiafia e usiusitai ma taumafai ia malamalama i le auala o le a faamanuiaina ai oe i le mulimuli i fautuaga a perofeta.
Ki i Lalo le Vevela
O le onosai ma le faapaleplae, po o le lotopulea, o vaega uma ia o “fua o le Agaga” (tagai Kalatia 5:22–23). E ui o loo i ai mea faananati e manaomia ai se faatinoga vave po o se tali vave atu i ai (e pei lava o ni meaai e manaomia se vevela tele), ae e tatau ona e vaai ia te oe lava ua atiaeina se onosai ma se lotopulea sili atu. Afai e te lagonaina o loo tupu lenei mea, o se faailoga lena o loo galue le Agaga i lou olaga.
O le vavega o le vevela feoloolo e mafai ona avatua ia te oe se saunisi sisi ua tao lelei atoa, aano o hamburger e le foliga i ni maatā hoki e piniki le ogatotonu, e eena ae le uliuli (ua mu), ma le araisa e vaivai ma maveve nai lo le malō ma paagugu. Ae o le onosai o le a i ai lona “atoatoa [i le] galuega” (Iakopo 1:4) i lou olaga, e fesoasoani ia te oe ia fetaomi i luma ia avea atili e faapei o Iesu Keriso, ma le aumaiga o le faatosinaga a le Agaga Paia, ma le mea silisili o le fesoasoani lea e taitai atu oe i le ola e faavavau.
A o e matauina ia mea e mafua ai ona e le onosai, mafaufau i lena saunisi sisi e tao (po o soo se isi lava meaai e talafeagai ma oe) atoa ai ma mea e mafai ona e ositaulagaina e ala i le tuu atu i le le onosai e taiala au faatinoga. Afai e te lagona le tausalaina o le lolo atu i le le onosai i le tele o taimi, ia, e tupu i tagata uma. E mafai ona e salamo ma toe taumafai e mulimuli i le faataitaiga ma aoaoga a Iesu Keriso. E sili atu ma le tasi le saunisi sisi e fia taoina, ma e le o tuai lava ona aoao e uiga i le faaatoatoaina lea e mafai ona faia e ala i le onosai.