O Leo o Le Au Paia o Aso e Gata Ai
Aisi atu mo le Alofa Mutimutivale
Ata na tusia e Stan Fellows
I se malaga i se aai lata ane i Esitonia, sa ou vaaia ai se alii o aisi mo se tupe. O le mea e ofo ai, sa ou iloa o ia mai le taimi sa ou auauna atu ai o se faifeautalai i lena aai i le 10 tausaga na muamua atu. Sa ia amoina se ato lapoa o atigi fagu palesitika, e pei lava o le taimi muamua, e ao ma faatau atu mo se tupe. Sa ou manatuaina sa fesili i taimi uma o ia mo ni nai tupe faasili, ma a e avatu ia te ia na te fesili mai pe o i ai nisi tupe o totoe ia te oe.
Sa faateia lava au i le vaai atu ia te ia. Ma i le mavae ai o le 10 tausaga o loo tumau pea o ia i le mea e tasi—ae ua fai sina matua teisi, ae sa foliga mai o loo ia ola pea i le olaga lava e tasi o le aisi mo se tupe i lea aso ma lea aso. Sa ou mafaufau i tausaga matagofie e 10 na ou ola ai i lea lava taimi, lea sa aofia ai le faaipoipo atu i le malumalu, faateleina o le aotauina, mauaina o se galuega lelei, ma le olioli i se soifuaga maloloina lelei.
Sa ou manatu atonu o le taimi mulimuli lea ou te vaai ai ia te ia, ma sa ou lagonaina e tatau ona ou foai atu ia te ia se mea. Ae o le faafitauli sa na o se tupe pepa sa ia te au sa sili atu nai lo le mea sa ou loto e foai atu. Sa fai si o’u le fiafia i le filifiliga na ou faia—o le leai o se mea e foai atu ia te ia po o le foai atu ia te ia o se mea e sili atu ma le mea na ou manao i ai. Sa tonu ia te au o le a leai lava se eseesega tele e faia mo au ma o le a lelei ai lona aso, o lea sa ou foai atu ai ia te ia le tupe.
E lei atoa ni aso se lua mulimuli ane ae ou oo i se tulaga faapea, ae o le taimi la lea, o au le tagata lea ua aisi atu nei mo le alofa mutimutivale. Sa fenumiai ia te au le aso mo se tusitalosaga mo se sikolasipi taua lava. Sa ou manatu na ou auina atua i le lua vaiaso na muamua atu, ae sa lofituina au ina ua ou toe siakia le aso ma iloa ai e tasi le aso na tuai ai ona ou lafoina.
O le aofaiga o le sikolasipi sa faaselauina le aofaiga na ou foai atua i le tagata aisi, ma ou iloa ai o lea tulaga sa le o se mea na faafuaveta. Sa oo ina ou aisi atu mo le alofa mutimutivale, i le tatalo i lo’u Tama Faalelagi faapea ai ma imeli na avatu i taitai o le iunivesite. Sa latou faapea mai o le a tuu i totonu le tusitalosaga ae o le a tusi i ai sa tuai atu.
Sa taliina la’u tatalo ma sa faamanuiaina a’u e maua le sikolasipi, lea sa fesoasoani tele ai ia i maua ma lo’u toalua i mea tautupe. Ae o le mea e sili atu ona taua, o lenei aafiaga na ou aoaoina ai se lesona taua tele: pe le o i tatou uma ea o ni tagata aisi? (tagai Mosaea 4:19).