Auauna Atu i Talaatu o Ioritana
Pe po o fea lava se mea e manaomia ai oe e le Alii.
Ata na pueina e © iStock/Thinkstock
Na tele naua le manaomia.
I le amataga o le 2013, e toalima tagata na mamai i le misela ia na i ai i le tolauapiga a tagata sulufai i Zaatari i le atunuu Tutotonu i Sasae o Ioritana. Na silia ma le 100,000 tagata sulufai Suria, na nonofo i ni nofoaga ua ova le toatele, na lamatia i le mauaina i lenei vairasi e vave le pipisi, ma matautia. Na fuafua e le malo o Ioritana se taumafaiga tele maoae o tuipuipui e taofia ai le faamai mai le pipisi atu. O le fuafuaga o le faia lea o tuipuipui o le aofai e le itiiti ifo ma le 90,000 tagata sulufai Suria e i le va o le 6 masina ma le 30 tausaga i totonu o le periota e lua vaiaso.
Ae sa i ai se faafitauli. O le vailaau sa i ai i lea i le United Nations Children’s Emergency Fund (UNICEF). O le Matagaluega o le Soifua Maloloina o Ioritana sa i ai falemai. O mea latou te lei mauaina o sapalai o mea ia e teuina ma auina mai i totonu o pusaaisa—o tui, pusa e tuu ai meafaigaluega maamaai, kula o vailaau—ma ua utiuti le taimi.1
Ona o mai ai lea o Ron ma Sandi Hammond, o faifeautalai matutua a le uelefea na auauna atu o ni faatonu o le atunuu i Ioritana mo le Auaunaga Limafoai a le AAG. Ona o Ron ma Sandi ua masani ona galulue ma le Malo Aufaatasi o le UNICEF ma le Matagaluega o le Soifua Maloloina, na vave lava ona auai i le galuega tuufaatasi i le va o nei faalapotopotoga e fuafua pe faapefea ona fesoasoani le Auaunaga Limafoai a le AAG.
Fai mai Ron, “Na matou fesiligia le tau o le faatauina mai o sapalai o mea e manaomia le malulu. Ina ua latou tau maia ia i maua, na ma fai atu, ‘Ma te manatu e mafai ona fesoasoani mai le Auaunaga Limafoai a le AAG.’ Na latou fai mai, ‘O le a le vave? Ua tatau loa ona tatou faagaoioia vave lenei mea!’”
Na faamaonia e le Auaunaga Limafoai a le AAG i totonu o le 20 itula le faatauina o sapalai o mea e manaomia le malulu. “Ina ua ma tau atua i le Matagaluega o le Soifua Maloloina ma le UNICEF,” o le tala lea a Ron, “na matuai faateia lava i latou. E faapefea e se FLM [Faalapotopotoga e Le i le Malo] ona vave tele ona gaoioi? E le gata na agai i luma le taumafaiga o tuipuipui e pei ona fuafuaina, ae na uunaia ai foi se taumafaiga i le atunuu atoa ia tuipuipui le faitau selau o le fia afe o tagata sulufai o Ioritana ma Suria.”
Ituagavale: ata mai le faaaloaloga a Samir Badran, UNICEF-JORDAN; mamanu i tua atu ma ata pue o Amman, Ioritana © iStock/Thinkstock
Na puipuia le faalavelave.
Ma le isi, o lenei faigapaaga a le UNICEF, Matagaluega o le Soifua Maloloina o Ioritana, ma le Auaunaga Limafoai a le AAG na fatuina se tulaga faamoemoeina mo ni fesootaiga i le lumanai.
O le ala na oo atu ai Ron ma Sandi Hammond i lena taimi taua i Sasae Tutotonu o se molimau lea o le faatuatua o le au Hammond ma le uunaiga mai le polokalama o faifeautalai matutua a le Ekalesia.
Manaomia: Ulugalii Faifeautalai
I le 2012 na auauna atu ai le au Hammonds o ni tagata faigaluega i sauniga i totonu o le Malumalu o Rexburg Idaho. Na i ai se pisinisi faamanuiaina fomai nifo a Ron ma sa faiaoga i le Matagaluega o Mataupu Faalelotu i le Iunivesite o Polika Iaga-Idaho. Ae o le faatulagaga filemu masani o o la olaga na faafuasei lava ona suia i se uunaiga manino faaleagaga ia auina vave atu pepa e auauna i se misiona. O le taimi na faateia ai i laua. O le la fanau ua faaipoipo na i ai i ni tulaga eseese o le feoaiga i galuega ma toe suia nofoaga, ma e lei i ai se mafaufau o Ron e litaea. Ae na faamautinoa atu e le Agaga ia i laua na manaomia i laua ma o le a lelei mea uma.
O le mea na tulai mai, sa anapopogi ma tatalo taitai perisitua i le laumua o le Ekalesia ina ia maua se ulugalii sao e auauna atu o ni taitai o le atunuu mo le Auaunaga Limafoai a le AAG i Amman, Ioritana.
“Sa matuai manino mai lava,” o le tala lea a Sandi, “na muamua atu le Alii ia i maua, ma saunia faamatalaga o le tofiga faapitoa na i ai ia te Ia mo maua. Ma te iloa Na te faia lenei mea mo faifeautalai taitasi e auauna atu. O se faamafanafanaga le iloa ua faatulaga uma e le Faaola mea mo oe e auauna atu ai ae e te lei taunuu atu lava.”
“I le toe tepa i tua,” ua fai mai ai Ron, “ma te faafetai ma te lei faamoemoe pe naunau foi mo se nofoaga faapitoa e auauna atu ai. O le tuuina atu o na mataupu i aao o le Alii na faatagaina ai o Ia e tuu mai ia i maua se aafiaga semanu ma te le mauaina lava.”
O lena aafiaga na aofia ai le galulue faatasi ma le aiga tupu o Ioritana i galuega faatino o auaunaga alofa e fiafia i ai le aiga tupu. Na galulue faatasi le au Hammonds ma falemai o le lotoifale ma falemai laiti e saunia aoaoga i tagata faigaluega o le falemai o Ioritana i tomai tau faasaoina o le ola i le faamanavaina o pepe faatoa fananau mai, lea na mafua ai se faaitiitiga maoae o le aofai o pepe fou e maliliu. Na ala atu ia la taumafaiga ma taumafaiga a isi ulugalii faifeautalai, na saunia ai e le Auaunaga Limafoai a le AAG aoaoga ma mea faigaluega i falemai o mata ma faalapotopotoga o auauna atu i e e le atoatoa le malosi. Faatasi ai ma i latou na lagolagoina e le au Hammonds ma isi faifeautalai uelefea o se nofoaga autu lea e aoaoina tamaitai e le atoatoa le malosi i le auala e mamanu ai ofu ma faia ofu faapitoa ma mea taulima. O nei tomai na tuuina atu ai i tamaiti aoga le avanoa ina ia tausia lelei ai i latou lava ma o latou aiga.
Ituagavale: ata mai le faaaloaloga o le Auaunaga Limafoai a le AAG; taumatau: ata mai le faaaloaloga a le au Hammonds
O isi galuega faatino na aofia ai le galulue ma isi FLM ma le malo o Ioritana i le tali atu i faalavelave faafuasei ma le sailia o tamaiti aoga Ioritana ia taliaina se sikolasipi e tasi po o le lua foi i tausaga taitasi e auai ai i le Iunivesite o Polika Iaga. O se tasi o aafiaga sili ona faamalie loto i le au Hammonds o le galulue faatasi lea ma le Ekalesia Katoliko Latina e fausia ni potu aoga mo Kerisiano Iraki na leai se nofoaga e potopoto ai.
Faatasi ai ma le Alii i Lona Tovine
Ao i ai i Ioritana na aoao le au Hammonds i le moni o le folafolaga a le Alii ia i latou e auauna atu ia te Ia: “O le a Ou alu muamua atu i o outou luma. O le a ou i ai i lo outou lima taumatau ma lo outou agavale, ma o le a i ai lou Agaga i o outou loto, ma sio faataamilo outou e auagelu, e sapasapai outou i luga. (MF&F 84:88).
“O loo auai le Atua i le galuega,” ua fai mai ai Ron. “O loo i ai o Ia i lalo i le tovine faatasi ma Ana auauna. Soo se ulugalii lava e o atu i se misiona e faatasi atu i ai i le tovine le Alii o le tovine. E le gata ina ma talitonu i vavega i Ioritana; na ma ola ai.”
E aunoa ma se masalosalo, o agelu na la lagonaina “faataamilo” i luga o i laua na aofia ai ni tino faalelagi, ae na aofia ai foi tino faalelalolagi, ae maise le la fanau, o e na lagolagoina la laua filifiliga e auauna atu mamao mai le aiga.
Ma na faamanuiaina lo la aiga mulimuli ane e le mana puipui, ma le lagolago o le Alii. O filifiliga o galuega taua ma fesiitaiga o nofoaga na faia, ma o popolega i faaletonu e ono tutupu i le fanau mai o se pepe na foia ao liliu atu le la fanau i le Alii, fefautuaai faatasi, ma tatalo ma anapopogi mo le tasi ma le isi.
O faamanuiaga na maua e le la fanau na matuai ofoofogia lava ma ina ua valaaulia Brother ma Sister Hammond e faaumi le la misiona e lua-tausaga i le tolu, na faaalia e le la fanau le lagolago fiafia. Na latou lagonaina na faia e le Alii se mea faapitoa lava mo i latou o se taunuuga tuusao lava o le auaunaga a o latou matua.
Ae, na lagonaina lava o se osigataulaga le tuueseesea o le aiga o le au Hammond. O le mamao ese mai ia i latou la te alolofa i ai sa faigata. Ae sa lei faigata tele e pei ona semanu e i ai i le taimi ua tuanai. O le tekinolosi na mafai ai mo le aiga ona aafia i olaga o le tasi ma le isi i le tele lava o taimi e manaomia ai. Fai mai Sandi, “E le motusia fesootaiga a ulugalii ma o latou aiga. Sa matou fesootai soo ma aiga o a maua fanau i lo matou aiga. Ona o le talanoa ma vaai i foliga ma imeli, o fanau a ma fanau e toafa, na fananau ao ma auauna atu, na iloa maua ma na fiafia ma faafeiloai mai ina ua ma toefoi atu.”
Tatalaina o Mata ma Loto
Ituagavale: ata mai le faaaloaloga o le Auaunaga Limafoai a le AAG; taumatau: ata mai le faaaloaloga a le au Hammonds
I le tele o faamanuiaga na lagona e le au Hammonds na la maua mai le la auaunaga o le tatalaina lea o o laua mata i le agalelei ma le faauo o tagata o Ioritana. Ina ua faatoa maua e le au Hammonds le la valaauga, na la le mautonu e uiga i tagata o le a la auauna atu i ai.
“Ae na ma iloaina o a ma uo Mosalemi e agamalu ma agalelei,” sa fai mai ai Ron, “ma ua ma mautinoa a latou lagonaina ua lamatia i maua, latou te faia soo se mea e puipui ai i maua.
“O lo latou alofa e ofoofogia. E le mananao tagata Ioritana ia iloaina o i ai se isi o manaomia se fesoasoani pe afai e mafai ona latou fesoasoani i ai. Sa latou faafeiloaia lava tagata sulufai talu mai le taimi ao lei fanau mai Tavita. O loo i ai i le Tusi Paia le tele o mau faasino i ‘tala atu o Ioritana,’ ma na amata ona sainiina a maua tusi ‘Tala atu o Ioritana,’ o se faailoaga o le auaunaga alofa na faamanuiaina ai i maua e tuuina atu i lenei atunuu agaalofa faasolopito. Mo le tele o senituri sa avea ai Ioritana ma nofoaga o le alofa, ma na faamanuiaina e le Alii tagata mo lena mea.”
O le galulue vavalalata ma tagata o Ioritana na mafai ai e le au Hammonds ona atiina ae nisi o faauoga malolosi. “Na valaaulia i maua i ni nai ‘aiga o le Iftar, o le ‘aiga e faaiu ai le anapogi o le Ramadan i aso taitasi,” “Na valaaulia foi i maua e a ma uo Moselemi e auai i pati o faamauga, faaipoipoga, ma isi faatasiga e faatatau i aiga.”
E le talai le Ekalesia pe faatagaina le papatisoina o tagata Moselemi i Ioritana po o se isi nofoaga e faasa ai e le tulafono, o lea e lei faasoaina atu ai e le au Hammonds ni faamatalaga e uiga i le Ekalesia. Nai lo lena, na la taulai atu i le fausiaina ma le faatumauina o fegalegaleaiga—ma le aiga tupu, paaga o galuega alofa o le lotoifale, o isi ulugalii faamisiona na auauna atu ma i laua, ma taitai o lotu ma le malo. Pe a fesiligia e uiga i le Ekalesia, e uunaia e le au Hammonds tagata e fesili mai e asiasi i le LDS.org.
O Le Valaauga e Auauna Atu
A mafaufau i le maoae o aafiaga o Ron ma Sandi, pe la te lagonaina pe ua faapitoa i laua i isi ulugalii na valaaulia e auauna atu—pe o le a valaaulia e auauna atu?
Ioe—ma leai. “Na ma auauna atu i le nofoaga ma i le taimi na manaomia ai e le Alii se ulugalii e i ai o ma tomai faapitoa ma aafiaga o le olaga,” ua fai mai ai le au Hammonds. “Ae ua moni lena mea mo faifeautalai matutua uma lava. Soo se ulugalii lava ua i ai le tomai e auauna atu ai i se misiona ua saunia e auauna atu i ni auala faapitoa mo i latou. Pau lava le mea latou te manaomia o le faatino o le faatuatua ia lava e o ai i le mea e manaomia ai i laua e le Alii, ma o le a Ia faaaogaina i laua e faia se eseesega i olaga o isi.”
“E mafai e ulugalii ona faia se eseesega,” na saunoa mai ai Elder Robert D. Hales o le Korama a Aposetolo e Toasefululua: “E mafai e ulugalii ona faataunuuina mea ofoofogia e le mafai e se isi lava ona faia. …
“… O auala e mafai ona auauna atu ai ulugalii e matua anoanoai lava. E amata mai i le lagolagosua a le ofisa o misiona ma aoaoga faaletaitai e oo atu i potu gafa, o galuega faalemalumalu, ma auaunaga o le fesoasoani atu—o loo i ai se avanoa e faaaogaina ai toetoe lava o soo se tomai po o se taleni ua famanuiaina ai oe e le Alii. …
“… Ua tele mea ua e mauaina i lou olaga; ia e alu atu ma foaifua atu i le galuega a lo tatou Alii ma le Faaola. Ia faatuatua; o loo silafia e le Alii le mea o loo manaomia ai oe. E matua tele lava le manaomia o outou, uso ma tuafafine, ma ua matua toalaiti lava le aufaigaluega.”2