Autalavou

O Afi ma Lesona o le Usiusitai

Sa faamatala mai e Peresitene Thomas S. Monson se tasi o taimi na aoaoina ai o ia i le taua o le usiusitai. Ina ua valu ona tausaga, sa asiasi atu lona aiga i le latou tamai fale i luga o atumauga. Sa la mananao ma lana uo e faamama se vaega vaoa mo se afi o le tolauapiga. Sa la taumafai e faamama le vao i le veleina, tase’i ma lalafo i le malosi na la mafaia, ae sa pau le mea na la mauaina sa na o ni nai vaovao i o la lima. Sa faamalamalama mai e Peresitene Monson, “Ona ou mafaufau lea i le tali tonu lea na oo mai i lo’u mafaufau e valu tausaga le matua. Sa ou fai atu ia Danny, ‘E na o le pau lava le mea ta te manaomiaina o le susunuina o nei vao. E tau lava na ona ta susunuina o se li’o i totonu o vao!”

E ui lava na ia iloaina sa lei faatagaina o ia e faaaoga se afitusi, ae sa ia tamoe atu i le tamai fale e aumai, ma sa la faamumuina ai ma Danny se tamai afi i lena vaega vaoa. Sa la faamoemoe e pe lava le afi ia, ae nai lo lena sa sasao tele ma avea ai ma se afi matautia. Sa la taufetuli atu ma Danny mo se fesoasoani, ma sa lei pine ae faataalise mai le au matutua e tape le afi a o lei oo atu i laau.

Sa faaauau le saunoaga a Peresitene Monson, “Sa ma aoaoina ma Danny ni lesona faigata ae taua i lena aso—o se vaega tupito lava, o le taua o le usiusitai.” (Tagai i le “O Le Usiusitai e Aumaia ai Faamanuiaga,” Liahona, Me 2013, 89–90.)

E pei foi o Peresitene Monson, na e aoaoina ea se lesona o le usiusitai i se auala faigata? O a ni sini e mafai ona e faia ia tausia ai lou lava saogalemu e ala i le usiusitai i le lumanai?