Mga Pangutana ug mga Tubag
“Ang akong mga ginikanan mamalikas, maminaw og saba nga musika, ug motan-aw og dili angay nga mga salida sa TV. Unsay akong buhaton aron mobati sa Espiritu diha sa balay, ilabi na ma-Dominggo?”
Sa dihang nabunyagan mo, nadawat ninyo ang gasa sa Espiritu Santo. Nagpasabut kini nga walay bale sa inyong mga kahimtang, kamo mahimong makaangkon sa pakig-uban sa Espiritu kon inyong ipabilin ang inyong kaugalingon nga takus ug maghimo og maayo nga personal nga mga desisyon.
Sa inyong pag-ambit sa sakramento matag semana, mapahinumduman kamo sa inyong mga pakigsaad uban sa Langitnong Amahan sa “pagdala nganha [kaninyo] sa ngalan sa [Iyang] Anak, ug sa kanunay mohinumdom kaniya ug maghupot sa iyang mga sugo … nga [kamo] unta sa kanunay makabaton sa iyang Espiritu uban [kaninyo]” (D&P 20:77). Pinaagi sa paghupot sa inyong mga pakigsaad, magpabilin kamong takus sa pakig-uban sa Espiritu.
Ang pagtambong og miting sa sakrament ug ubang mga miting sa Simbahan dili lang ang maoy bugtong paagi aron matutokan ang inyong paghupot sa pakigsaad sa Dominggo. Bisan unsa pa ang inyong mga kahimtang sa panimalay, makapakita kamo sa Langitnong Amahan sa inyong pasalig sa inyong mga pakigsaad pinaagi sa pagbuhat sa inyong family history, pagtuon sa ebanghelyo, ug pagserbisyo sa uban, ilabi na niadtong nag-inusara o masakiton. Ang pagpili niining matang sa mga kalihokan, bisan kon ang mga sakop sa inyong pamilya magdumili, maghatag kaninyo og hingpit nga kalipay ug kamaya. (Tan-awa sa Russell M. Nelson, “Ang Igpapahulay Usa ka Kahimut-an,” Liahona, Mayo 2015, 129.)
Pagsulti
Miyembro man sa Simbahan o dili ang imong mga ginikanan, pakigsulti uban kanila mahitungod kon nganong importante nimo nga kanunayng makabaton sa Espiritu sulod sa inyong panimalay, ilabi nama-Dominggo. Sa imong kahimtang, makapili ka sa labing malinawon nga dapit sa balay ug dapiton ang uban nga mga miyembro sa Simbahan sa pag-uban kanimo ug dungan nga magdapit sa Espiritu nga maanaa diha. Nasayud ko nga kon ikaw mosunod sa pagbalaan sa adlaw nga Igpapahulay, ang Ginoo mopanalangin kanimo.
Joskares C., edad 16, Santo Domingo, Dominican Republic
Tutoki ang Pagbuhat sa Maayong mga Butang
Ang mga Dominggo maoy kanunayng lisud alang nako sa panimalay. Ako lang ang miyembro sa Simbahan diha sa akong balay, ug ang akong mga ginikanan ug mga igsoong lalaki manan-aw og TV ug maminaw sa ilang mga musika sa Dominggo. Gusto nakong ipakita ang akong gugma alang sa akong Langitnong Amahan pinaagi sa pagbalaan sa adlaw sa Igpapahulay. Makaadto ko sa akong kwarto ug magbasa sa mga kasulatan, maminaw sa musika sa Simbahan, ug mamisita sa akong mga higala o uban sa mga misyonaryo. Mapasalamaton kaayo ko nga nakaangkon og tabang sa Ginoo sa pag-sunod sa adlaw nga Igpapahulay sa makugihon nga paagi ug alang sa kalig-on nga kanunay Niyang gihatag kanako.
Lais de Jesus M., edad 19, Sergipe, Brazil
Dangup ngadto sa mga Kasulatan
Pakigsulti ngadto sa imong mga ginikanan mahitungod sa mga butang nga ilang gibuhat, apan kon dili sila maminaw, mahimo ka nga mag-ampo alang sa giya kon unsaon sa pagtabang nimo nga mabati ang Espiritu sa inyong panimalay. Aron mabati ang Espiritu sa akong panimalay, magbasa ko sa mga kasulatan, ug kana makadala dayon sa Espiritu sa kwarto.
Blake E., edad 14, Utah, USA
Pag-ampo alang sa Imong mga Ginikanan
Mahimo ka nga mag-ampo alang sa imong mga ginikanan. Sumala sa gisulat ni Mormon, “Ang Ginoo mahinumdom sa mga pag-ampo sa mga matarung, nga gipahimutang ngadto kaniya,” (Mormon 5:21). Ang imong mga ginikanan dili kaha mohunong diha-diha dayon, apan ang Ginoo motabang kanimo.
Cole M., edad 17, Arizona, USA
Gamit sa mga Kapanguhaan sa Simbahan
Kon aduna kay smart phone o tablet, mahimo kang magdownload sa Mormon Channel ug LDS Youth apps. Puno kini sa maanindot kaayo nga mga kanta, mga video, ug mga pakigpulog nga kanunayng makahatud sa Espiritu kon mopatukar ako niini! Sayon ra kini, apan nakatabang gayud kini nako aron mabati ang Espiritu bisan kon ako nalibutan sa mga kasaba. Makahimo kini og kalainan ug maghatud og kalinaw nga molukop sa balay.
HunterEve V., edad 16, Texas, USA
Sunda ang Ehemplo ni Kristo
Importante kini nga ang usa ka panimalay malukop uban sa Espiritu, apan mas importante kini nga ang usa ka tawo mao ang malukop niini. Si Kristo mao ang hingpit nga ehemplo sa pagbaton sa Espiritu uban Kaniya sa tanang panahon. Paningkamot lang gayud sa pagpakabuhi nga mas sama kang Kristo, magmabination ngadto sa uban, ug molantaw sa kalibutan sa paagi nga Iyang gihimo tingali mao ang labing maayong paagi aron magpabilin ang Espiritu uban kanimo bisan asa ka man.
Isabel W., edad 16, Oregon, USA
Pagsugyot og mga Kalihokan sa Pamilya
Ma-Dominggo, tingali isugyot ang mga kalihokan nga mahimo ninyong buhaton og dungan isip usa ka pamilya. Pagsugyot og bisan unsang butang nga ang pamilya makahimo og dungan diin kadtong dili maayong mga butang dili na mahitabo. Kon dungan ninyong gibuhat ang bisan unsang butang isip pamilya, kini makapasuod kaninyo. Ug kini makahatag kanila og lahi nga ideya sa unsay imong mahimo ma-Dominggo. Tingali sa pagkasunod Dominggo makaingon sila, “Oi, lingaw to ang atong gihimo sa una da—atoa tong buhaton pag-usab.”
Ryan B., edad 19, Idaho, USA