Mga Tubag gikan sa mga Lider sa Simbahan

Unsaon sa Pagtabang sa mga Misyonaryo

Elder David A. Bednar

Sa Korum sa Napulog Duha ka mga Apostoles

Elder David A. Bednar

Gikuha gikan sa Abril 2008 nga pakigpulong sa kinatibuk-ang komperensya.

prayer

Giampo nato sa angay ang kaluwasan ug kalampusan sa full-time nga mga misyonaryo sa tibuok kalibutan. Ug ang komon nga elemento sa daghan natong mga pag-ampo mao ang hangyo nga ang mga misyonaryo giyahan nagdto sa indibidwal ug sa mga pamilya kinsa andam nga modawat sa mensahe sa Pagpahiuli. Apan akoa kana nga responsibilidad ug inyong responsibilidad sa pagpangita og tawo nga katudloan sa mga misyonaryo. Kini nga mga misyonaryo mga full-time sila nga mga magtutudlo, kamo ug ako mga full-time nga tigpangita. Ug kamo ug ako isip mga misyonaryo sa tibuok kinabuhi kinahanglang dili mag-ampo nga buhaton sa full-time nga mga misyonaryo ang atong trabaho!

Kon kamo ug ako matinud-anong mag-ampo pinaagi sa hugot nga pagtuo, sama sa gibuhat ni Joseph Smith—kon kita mag-ampo uban sa paghandum sa pagbuhat ug dili lamang sa pagsulti—nan ang trabaho sa pagsangyaw sa ebangelyo magpadayon sa talagsaong paagi. Ang mao nga pag-ampo pinaagi sa hugot nga pagtuo naglakip sa mosunod nga mga elemento:

• Magpasalamat sa Langitnong Amahan alang sa mga doktrina ug mga ordinansa sa gipahiuli nga ebanghelyo ni Jesukristo, nga nakahatag og paglaum ug kalipay sa atong mga kinabuhi.

• Mangayo og kaisug sa pag-abli sa atong mga ba-ba ug pagpaambit sa ebanghelyo sa atong pamilya ug mga higala.

• Mohangyo sa Langitnong Amahan sa pagtabang kanato sa pagpangita og indibidwal ug mga pamilya kinsa modawat sa atong imbitasyon nga matudloan sa mga misyonaryo diha sa atong panimalay.

• Mosaad sa pagbuhat sa atong bahin niining adlawa ug niining semanaha ug mangamuyo alang sa panabang sa pagbuntog sa kabalaka, kakulba, ug pagduhaduha.

• Magtinguha alang sa gasa sa pag-ila—alang sa mga mata nga makakita ug mga dunggan sa pagpaminaw sa mga kahigayunan sa misyonaryo kon [kini] moabut.

• Pag-ampo nga mainiton alang sa kalig-on sa pagbuhat sumala sa atong nahibaloan nga kinahanglan.

Ang pagpasalamat ipahayag, ug ubang mga panalangin mahimong pangayoon sa maong pag-ampo, nga tapuson sa pangalan sa Manluluwas. Ug dayon ang gipahinungod nga buhat niana nga pag-ampo magpadayon ug madugangan.

Kining sama nga sumbanan sa balaan nga pagpakigsulti ug gipahinungod nga buhat mahimong gamiton sa atong mga pag-ampo alang sa mga kabus ug mga timawa, sa mga masakiton ug sa mga sinakit, alang sa mga sakop sa pamilya ug mga higala nga naningkamot, ug alang niadtong wala na magtambungan og mga miting sa Simbahan.

Ako mopamatuod niana nga ang pag-ampo mahimong makahuluganon kon kita mangayo pinaagi sa hugot nga pagtuo ug pinaagi sa buhat. Akong imbitaron kitang tanan sa pag-ampo uban sa hugot nga pagtuo mahitungod sa atong balaanon nga sugo nga gihatag kanato sa pangsangyaw sa ebanghelyo. Kon kita mobuhat, ako mosaad nga ang pultahan pagaablihan ug kita mapanalanginan sa pag-ila ug sa pagbuhat sa mga kahigayunan nga ihatag.