Pagkamatinguhaon ug Pagkadisipulo
Ni Elder David F. Evans
Sa Seventy
Gikan sa pakigpulong sa usa ka debosyonal, “Tenacity,” nga gipakigpulong didto sa Brigham Young University niadtong Nobyembre 4, 2014. Alang sa kompleto nga pakigpulong sa Iningles, adto sa speeches.byu.edu.
Batuni ang pagtuo sa Dios ug ang Iyang mga saad, ug buhata ang unsay husto sa tanang higayon, nga walay pagsapayan kon kinsa ang nahibalo.
Image © iStock/Thinkstock
Ang usa ka online dictionary mipasabut sa pagkamatinguhaon nga “kamakanunayon, pagpadayon, ug dili matarug nga determinasyon.” Nag-ingon sab kini nga, “Ang pagkamatinguhaon usa ka kalidad nga gipakita sa tawo kinsa dili daling moundang—tawo nga padayon nga mosulay hangtud makab-ot ang ilang tumong.”1
Atong gikinahanglan ang pagkamatinguhaon aron mahimo kitang tinuod nga mga disipulo sa Manluluwas ug makab-ot ang tinuod nga maayong mga tumong—sa pagkahimong talagsaong misyonaryo, sa paghuman sa atong edukasyon, sa pagpangita og mahangturong kompanyon, ug pagsugod og usa ka pamilya—nga nahibaloan sa atong Langitnong Amahan nga gikinahanglan natong maangkon aron maandam para sa kahangturan. Ang atong abilidad sa pagkamatinguhaon sa tanang butang modeterminar kon mamahimo ba kitang mga anak sa Dios nga Iyang nahibaloan nga atong makab-ot ug mahimo.
Ang henerasyon karon sa full-time nga mga misyonaryo gitawag og “labing maayong henerasyon sa mga misyonaryo sa kasaysayan sa Simbahan” ug gikumpara kini ngadto sa 2,000 ka batan-ong mga manggugubat ni Helaman.2 Bisan sa talagsaong mga kinaiya ug kamatinguhaong pagtuo ug paningkamot niining mga batan-on, si Helaman, nga ilang lider, namahayag: “Dihay duha ka gatus, gikan sa akong duha ka libo ug kan-uman, kinsa nakuyapan tungod sa ka kulang sa dugo; bisan pa niana, sumala sa kaayo sa Dios, ug sa among dako nga kahibulong, ug usab sa hingpit nga kalipay sa among tibuok nga kasundalohan, walay usa kanila nga namatay” (Alma 57:25).
Giluwas sila “tungod sa ilang hilabihan ka hugot nga pagtuo diha niana diin sila gitudloan sa pagtuo—nga adunay makiangayon nga Dios, ug si kinsa ang dili magduha-duha, nga sila mapanalipdan pinaagi sa iyang kahibulongan nga gahum” (Alma 57:26).
Si Helaman miingon mahitungod kanila: “Sila mga batan-on, ug ang ilang mga hunahuna mga lig-on, ug sila mibutang sa ilang pagsalig diha sa Dios sa kanunay” (Alma 57:27).
Mao usab kini ngari kanato. Sa kinabuhi, sa panahon nga moabut ang ulan ug baha ug moharos ang hangin ug mokuso-kuso kanato ug sa atong panimalay diha nato matino kon ang atong pagtuo lig-on ba ug kon misalig ba kita kanunay sa Dios. Dayag lang nga walay pagsulay kon walay kalisdanan.
Ayaw Pagkaluya
Pipila ka tuig nang milabay, ang akong asawa, si Mary, ug ako ang nagdumala sa Japan Nagoya Mission. Ang mga termino nga walay kahadlok, kaisug, kusgan, abtik, ug matinud-anon nga naghulagway sa 2,000 ka batan-ong manggugubat (tan-awa sa Alma 53:20) naghulagway usab sa mga misyonaryo nga among giserbisyuhan. Lain nga deskripsyon sa 2,000 ka batan-ong manggugubat—ang uban nakuyapan (tan-awa sa Alma 57:25)—naghulagway usab sa uban sa among mga misyonaryo.
Ang misyon dili sayon. Mao usab ang kinabuhi. Ang tanan mangaangol sa pipila ka paagi. Ang pipila niini nga kasakit maggikan sa wala masulbad nga mga kalapasan. Ang uban tungod sa aksidente o balatian. Ang uban tungod sa atong makita nga gisalikway ang ebanghelyo ni Jesukristo sa atong mga minahal o dili na matinud-anon sa unsay ilang nahibaloan nga tinuod. Apan pinaagi sa tanan niini atong nailhan ang Dios, ug motubo kita sa pagkahimong mga disipulo sa Manluluwas. Ang atong mga kasingkasing mausab, ug kana nga kausaban mahimong permanente samtang pilion nato ang pagkamatarung batok sa sala ug kamaduha-duhaon.
Ang 2,000 ka batan-ong manggugubat nagmatinguhaon sa ilang mga tinguha. Dayag lang nga dili sila mohunong, bisan og lisud ang ilang agianan. Ang unang henerasyon sa ilang mga amahan ug mga inahan gitudloan ni Ammon ug sa iyang kaigsoonan. Kadto nga mga misyonaryo dunay dakong kalampusan, apan nagpadayon sila ug wala mohunong dihang nagkalisud na ug makaluya ang ilang misyon.
Gihulagway ni Ammon kadtong mga panahona: “Karon sa diha nga ang atong mga kasingkasing nasubo, kita hapit na unta mobalik, tan-awa, ang Ginoo mihupay kanato, ug miingon: Lakaw taliwala sa inyong mga kaigsoonan, ang mga Lamanite, ug antusa uban sa pailub ang inyong mga kasakit, ug Ako mohatag nganha kaninyo sa kalampusan” (Alma 26:27).
Uban sa kamainantuson ug kamatinguhaon, si Ammon ug ang iyang mga kompanyon milahutay sa ilang mga kasakit ug sa katapusan nakab-ot ang talagsaong kalampusan.
Kamatinguhaon diha sa Ebanghelyo
Niadtong 1999, si Sister Marci Barr miadto sa Japan Nagoya Mission gikan sa Columbus, Ohio, USA. Ang pagsulti og hinapon dili sayon para niya, apan nagmatinguhaon siya. Dihang nakakat-on siya sa pagsulti, wala gayud siya mohunong sa pagpakigsulti sa mga tawo mahitungod sa ebanghelyo.
Talagsaong mga saad gihimo para sa matinud-anon, mapadayunon, ug matinguhaong mga misyonaryo kinsa moabli sa ilang mga ba-ba uban sa kaisug ug gugma ug kinsa molihok gamit ang tanan nilang kusog sa mga pamaagi nga gihimo sa Ginoo (tan-awa sa D&P 31:7). Apan ang ubang mga misyonaryo nahadlok nga isalikway ug tugutan nga ang ilang kahadlok mobuntog sa mahigugmaon nilang kaisug.
Apan dili kang Sister Barr! Nangita siya ug mitudlo, ug mitudlo siya ug nangita sa tibuok niyang misyon.
Sa katapusang adlaw sa iyang pagmisyon, si Sister Barr mibiyahe ngadto sa mission home sa Nagoya. Nianang gabhiona interbyuhon na nako siya ug gisulthan nga nakahimo siya og talagsaong buhat. Sa sunod nga adlaw siya mopauli na.
Dihang mibiyahe siya, nakakita siya og pundok sa high school nga mga babaye nga nag-istoryahay sa subway. Giduol niya sila ug nangutana kon mahimo ba siyang makig-istorya nila. Gisulti niya ang mahitungod sa ebanghelyo ug ang Pagpahiuli niini. Dayon mihatag siya og missionary tract sa usa ka babaye nga daw interesado ug giingnan nga dunay sister missionaries nga motudlo niya sa ebanghelyo.
Dayon si Sister Barr miadto sa mission home ug giinterbyu, nga wala mosulti nako bahin sa iyang kasinatian didto sa subway. Para niya komon ra kadto. Gibuhat lamang niya unsay nahibaloan niya nga husto, hangtud sa katapusan. Tingali mao kini ang pinakamaayong depinisyon sa sa pagkamatinguhaon Nahibalo ko: Bisan unsay mahitabo, padayon nga magbaton og hugot nga pagtuo sa Dios ug sa Iyang mga saad, ug buhaton unsay husto sa tanang higayon, nga walay pagsapayan kon si kinsa ang nahibalo.
Mipauli na si Sister Barr sa Columbus. Didto sa student ward nahimamat niya ang iyang umaabut nga bana , ug magkauban silang mipalambo sa ilang pamilya sa ebanghelyo ni Jesukristo.
Ang babaye sa subway—si Hitomi Kitayama—gitudloan sa mga sister missionaries. Si Hitomi nagpadayon ug mipakita sa kaugalingon niyang paagi sa pagkamatinguhaon dihang gidawat niya ang mga kamatuoran sa ebanghelyo, gibuntog ang pagsupak sa mga sakop sa pamilya ug ang kaugalingon niyang mga pagduha-duha.
Among nahimamat si Hitomi mga unom ka tuig ang milabay sa mission conference sa Tokyo, diin nagserbisyo siya isip usa ka misyonaryo. Gisultihan mi niya bahin sa panagtagbo nila ni Sister Barr didto sa subway ug sa misunod niya nga pagkakabig sa ebanghelyo.
Human sa iyang misyon nahimamat ug naminyo siya og laing returned nga misyonaryo, si Shimpei Yamashita. Makadasig gayud, si Shimpei anak sa tawo nga among gitudloan ni Elder Randy Checketts atol sa ting-init niadtong 1971 samtang nagserbisyo ko sa una nakong misyon sa Japan.
Dili lang sa pagsangyaw sa ebanghelyo nga kita nagkinahanglan sa pagkamatinguhaon sa paghimo unsay husto. Nanginahanglan kita sa susamang matarung nga kamatinguhaon samtang maningkamot kita sa pagbuntog sa personal nga sala ug tintasyon, sa pagkompleto sa atong edukasyon, ug sa pagtinguha og usa ka mahangturong pamilya. Gikinahanglan nato ang kamatinguhaon, ug kamasinabuton samtang makigtambayong kita sa atong kapikas ug mga anak ug moatubang sa mga hagit nga moabut sa kaminyoon ug sa pamilya. Ug gikinahanglan nato ang kamatinguhaon, pasalig, ug pailub kon ang mga panalangin nga atong gitinguha dili moabut sa panahon nga atong gipaabut.
Sa tanan niini ug sa uban pang matarung nga mga butang, ang atong pasalig, sa paghimo sa husto ug mahimong husto pagahagiton sa kalibutan. Apan dili gayud kita mohunong. Kinahanglan nga padayon kitang mosulay hangtud makab-ot ang atong tumong. Ang atong tumong, mao ang kinabuhing dayon uban sa atong bana o asawa, uban sa atong mga anak, ug uban sa ilang mga anak para sa henerasyong moabut.
Paghimo og Angay nga mga Tumong
Unsaon nato sa pagpalambo ang atong pasalig sa paghimo og husto, ug unsaon nato sa pagbaton og kusog sa pagtuman niini?
Una, mag-establisar kita og mga tumong nga angay para molampus ug haum sa katapusang tumong sa kinabuhing dayon. Naglakip kini sa mga tumong sa edukasyon ug panarbaho nga mosangput ug mohaum sa pamilya, personal nga kalamboan, serbisyo, kaaktibo sa simbahan, ug personal nga kalipay. Usa ka bahin sa paghimo niining mga tumong mao ang kaugalingon natong pagpili, apan ang laing bahin kinahanglang maglakip sa pag-ampo ug personal nga pagpadayag. Kon may igo kamong pagpakabana nga tinguhaon ang kabubut-on sa Dios, Siya motubag.
Kauban sa mga butang nga kinahanglan ninyong iampo mao ang pagpangita og takus nga kompanyon nga inyong madala sa templo ug mohimo og sagradong mga pakigsaad. Kon gusto mong mohimo ug motuman sa sagradong mga pakigsaad ug dunay kadasig nga kab-uton ang pinakamaayo ninyong mga tumong, tinguhaa sa mainampuong paagi ang mga panalangin ug responsibilidad sa kaminyoon.
Pinaagi niini ug sa ubang dapit sa inyong kinabuhi, sutaa kon unsa ang gustong ipahimo sa Dios kaninyo. Tun-i kini. Himoa ang mga desisyon. Dad-a kini ngadto sa Ginoo ug sutaa. Unya ipadayon uban sa pagkab-ot sa inyong mga tumong.
Niining tanan, kon gusto kitang magmatinguhaon sa matarung nga mga butang, kinahanglang magpaduol kita sa Ginoo pinaagi sa matarung nga pagpakabuhi. Pipila ka butang ang mas mobalda nato sa pagkab-ot sa atong matarung nga mga tumong kay sa pagkahimong dili takus sa mga panalangin sa Espiritu sa atong kinabuhi.
Himoa ang matarung nga mga tumong. Mag-ampo kanunay ug tinguhaon ang giya sa Ginoo. Magmahimong takus ug likayan ang mga butang nga mobalda sa inyong kalamboan. Magbaton ug gamiton ang rekomend sa templo. Tumana ang inyong mga pakigsaad, ilabi na kon ang kinabuhi lisud. Tinguhaa ang mga panalangin sa mahangturong kaminyoon ug pamilya. Unya magpadayon. Ayaw paghunong. Ayaw pag-undang.
Magmatinguhaon sa tanang matarung nga butang. Inyong makita nga magkalig-on ang inyong pagtuo, ug inyong makita ang inyong kalig-on ug mga talento nga mas molambo ug motubo samtang magkalig-on ang inyong pagtuo. Ug hinumdumi ang gisaad ni Elder Jeffrey R. Holland sa Korum sa Napulog Duha ka mga Apostoles: “Ang ubang panalangin moabut dayon, ang uban dugay, ug ang uban dili moabut hangtud didto sa langit; apan para niadtong mohangup sa ebanghelyo ni Jesukristo, moabut kini.”3