Pagserbisyo diha sa Simbahan
Dili Mahitabo Samtang Ako ang Nagserbisyo
Ang tagsulat nagpuyo sa California, USA.
Ang yawe sa kalampusan mao ang paghigugma sa batan-ong mga lalaki samtang nagserbisyo kita kanila.
Suod ako sa pamilya kinsa dunay anak nga anaa sa Young Men. Atol sa kalihokan samtang siya usa pa ka deacon, usa ka lider mikorihir ug mipakaulaw kaniya sa atubangan sa iyang kaedad. Sunod niana iyang gibati nga wala siya kinahanglana, mihunong sa pagtambong sa mga kalihokan, ug nangita og mga higala sa gawas sa iyang ward.
Kana nga kasinatian dunay dakong epekto ngari kanako. Determinado ko nga ang ingon niana dili mahitabo kon ako ang magserbisyo kon ako ang tawagon sa pagserbisyo uban sa batan-ong mga lalaki. Duha ka tuig ang milabay gitawag ako sa pagserbisyo uban sa mga deacon.
Paglabay sa pipila ka bulan akong nakita ang akong kaugalingon uban sa usa ka batan-ong lalaki nga pirming dili motuman sa mga lagda.
“Mao kini ang limit,” sa katapusan miingon ko kabahin sa iyang mga aksyon. “Ayaw paglapas niini.”
Milapas siya niini, nagkatinubagay kami og gamay, ug mibiya siya.
Unya, nagkig-istorya ko niya aron masulbad ang among kasungian. Miingon ko, “David, gihigugma ko ikaw ug usa ka ka buotan nga batan-on, apan dili ko ganahan sa pipila ka butang nga imong gibuhat. Ang ubang mga batan-ong lalaki nagtan-aw nimo isip usa ka lider, ug kon makakita sila nimo nga nagbuhat og dili maayo, mosulay usab sila niini.”
Nasulbad ra namo, mibati siya nga gidawat na, ug kaming mga lider mitabang nga maminusan ang iyang pipila ka personal nga mga hagit. Sa dihang nag-edad na siya og 14, mihangyo siya nako nga mo-orden niya nga usa ka teacher. Karon, paglabay sa katuigan, kon makakita siya nako gakson gyud ko niya og hugot, ug maghisgot siya uban ang pagdayeg mahitungod sa iyang panahon diha sa Young Men.
Kon higugmaon nato ang batan-ong mga lalaki ug maglipay uban nila, masayud sila niini. Mao kana ngano nga ang akong mga magtatambag ug ako tinud-anay gyud nga magpakita og tinguha sa among batan-ong mga lalaki. Wala gyud kami maghimo og kalihokan tungod kay kini anaa sa libro, gibuhat namo tungod kay nasayud kami nga ang batan-ong mga lalaki makat-on og kahanas, motubo, ug malingaw.
Sa usa ka okasyon, kami dunay usa ka batan-ong lalaki kansang mga ginikanan dili interesado sa among programa.
“OK ra kana,” gisultihan nako sila, “apan mosugot ba kamo nga sa gihapon ang inyong anak moapil, makat-on, ug malingaw?”
Giapil namo siya sa among programa, ug sa wala madugay ang iyang mga ginikanan miingon nga OK na nga moapil siya sa tanan. Nakita nila nga ang ilang anak nakat-on ug nalingaw. Sa wala madugay nagmisyon siya. Ang iyang manghud nga lalaki milambo usab ug nagmisyon usab.
Nakita namo ang kalambigitan sa mga lider nga magtinguha nga molambo ang usa ka batan-ong lalaki ug magkat-on, maglambo ug sa katapusan magmisyon. Makatagbaw nga magtan-aw sa batan-ong mga lalaki nga motubo, ug makalingaw nga makat-on uban kanila. Ang yawe sa kalampusan mao ang paghigugma sa batan-ong mga lalaki samtang nagserbisyo kita kanila.