Pagsinati og Kausaban sa Kasingkasing
Ni Elder Edward Dube
Sa Seventy
Kita makakaplag og kalipay sa makanunayon nga paningkamot sa pagsinati og kausaban sa kasingkasing samtang atong hangupon ang Pag-ula ni Jesukristo sa atong kinabuhi.
Mga paghulagway pinaagi ni Robert Hunt; detalye sa panapton © iStock/Thinkstock
Si Rosemary, ang among kinamagulangang anak, bag-o pang natawo nga masuso sa diha nga ang akong inahan mibisita kanamo gikan sa iyang baryo sa sentro sa Zimbabwe. Isip bag-o nga mga ginikanan, ang akong asawa, si Naume, ug ako naghinam-hinam kaayo sa pagbisita sa akong inahan. Matinguhaon kami nga makat-on sa tanan namong gikinahanglan nga masayran sa pagpadako og anak.
Sa iyang pag-abut, ang akong inahan mipagawas og usa ka lingin nga kwentas nga panapton. Giputos sulod sa panapton, mipasabut siya, mao ang usa ka butang nga dunay magic. Iyang gitunol ang kwentas ngadto ni Naume aron ipasul-ob sa liog ni Rosemary. Nakamatikod sa pagduha-duha ni Naume, ang akong inahan diha-diha dayon miingon: “Sukad sa pagkabata ang akong mama ug lola sa habig sa akong mama mihatag kanako niining dunay magic nga butang, nga nakapanalipod kanako ug sa tanan kong mga anak, lakip ang imong bana. Kini nga anting-anting manalipod sa inyong anak nga babaye gikan sa mga sakit ug sa tanang matang sa mga pagyamyam nga mahitabo kaniya, ug siya makabuntog sa bisan unsang malisud nga sitwasyon sa kinabuhi. Kiinahanglan siyang magsul-ob niini hangtud nga magsingko anyos na siya.”
Nianang higayona nagserbisyo ko isip presidente sa branch, ug diha-diha dayon naghunahuna ko, “Unsa kaha ang hunahunaon sa mga miyembro sa akong branch inigkakita nila niining ‘dunay magic’ nga kwentas sa liog sa among anak?” Dayon naghunahuna ko, “Tingali mahimo ra namo kining tabunan aron dili kaayo makita.” Akong gitan-aw si Naume; ang iyang ekspresyon nagsulti nako nga kinahanglang dili namo dawaton kini nga gasa. Akong gipangutana ang akong inahan kon makahimo ba siya og gamay, nipis nga kwentas, kanang dili kaayo makita. Mitubag siya nga dili kana mahimo, ug nga ang butang nga dunay magic mosalir og maayo sa porma nga iyang gihimo.
Sa makausa pa, si Naume mitan-aw nako nga klarong nagpahayag sa iyang pagdumili. Milingi ko sa akong inahan ug mipasabut nga isip presidente sa branch sa among lokal nga kongregasyon, dili ko komportable nga isul-ob ang kwentas sa among anak. Mitubag ang akong inahan nga nagpasidaan: misulti siya kanamo nga kon wala ang kwentas ang among masuso mamatay.
Usa ka Higayon sa Nakapatarantar nga Krisis
Pipila ka semana human niini nga panghitabo, ang among gamay nga si Rosemary nasakit og maayo. Kami walay kwarta aron dad-on siya sa doktor. Gabii kadto, ug nianang higayona misugod ko sa paghunahuna mahitungod sa gisulti sa akong inahan sa iyang pasidaan. Misugod ko paghunahuna nga maayo pa og gidawat nako ang kwentas. Ako unta kining gikuha ug gisul-ob sa liog ni Rosemary. Niining panahona sa kakulba, nakadungog ko og hinay, hinagawhaw nga tingog nga nag-awhag kanako nga mogamit og hugot nga pagtuo diha ni Ginoong Jesukristo. Diha-diha dayon misul-ob ko sa akong sinina nga pangsimba. Akong gikugos ang among anak ug mihatag og panalangin sa priesthood. Akong gibati ang kalinaw ug kahupayan, ug akong nabantayan nga ang akong asawa mibati sa samang paagi. Hapit diha-diha dayon si Naume ug ang gamay nga si Rosemary malinawon nga nakatulog. Ang among anak nga babaye nga si Rosemary naayo. Sa misunod nga mga adlaw hinay-hinay siyang naulian ug naangkon ang hingpit nga kahimsog. Pagkanindot nga milagro ang among nasaksihan! Ang Ginoo sa Iyang malumong mga kalooy mitabang nako ug milig-on sa akong hugot nga pagtuo diha Kaniya.
Mapasalamaton ko apan naulaw og gamay. Ania ako, usa ka returned missionary nga nagserbisyo isip presidente sa branch, apan mas nabalaka ko kon unsay ikasulti sa katawhan kay sa motuo sa Dios (tan-awa sa Mosiah 4:9). Oo, bisan ang akong inahan, kinsa akong gihigugma ug gidayeg og maayo, dili makasabut sa tanan nga mga butang. Kinahanglan nga mahimo kong labaw pa kaysa usa lang ka returned missionary; labaw pa kay sa usa ka presidente sa branch; kinahanglan kong mausab: nga makasinati sa unsay nasinati ni Alma.
Usa ka Higayon sa Dako nga Kausaban
Si Alma, ang pari sa dautan nga Haring Noah, posible nga misusi og maayo sa iyang kaugalingon sa dihang si propeta Abinadi nangutana niining matukion nga pangutana: “Kamo wala mogamit sa inyong mga kasingkasing aron sa pagsabut; busa, kamo wala magmaalamon. Busa, unsa ang gitudlo ninyo niini nga mga katawhan?” (Mosiah 12:27). Sama ni Alma, gikinahanglan nako nga adunay usa ka “dako nga kausaban nga nahimo diha sa [akong] kasingkasing” (Alma 5:12).
Isip usa ka pari sa korte ni Haring Noah, si Alma naanad sa haruhay nga kinabuhi. Siya midawat og suporta sa iyang pagpakabuhi pinaagi sa buhis sa mga katawhan. Siya nagtagamtam og posisyon sa gahum ug pagkainila. Siya usa niadtong kinsa “gibayaw sa garbo sa ilang mga kasingkasing” (Mosiah 11:5). Apan sa dihang si Alma nakat-on mahitungod sa pag-anhi sa Manluluwas sa kalibutan—sa Iyang mga pagtulun-an, pag-antus, kamatayon, ug Pagkabanhaw ug nga si Jesukristo mao “ang kahayag ug ang kinabuhi sa kalibutan; oo, usa ka kahayag nga walay katapusan, nga dili gayud mahimo nga mongitngit; oo, ug usab usa ka kinabuhi nga walay katapusan, nga wala na ang kamatayon” (Mosiah 16:9)—andam na siyang mag-usab. Andam na gani siyang mamatay kon gikinahanglan.
Detalye gikan sa Abinadi Has Testified, ni Walter Rane, sa maayong kabubut-on sa Church History Museum
Gipalibutan sa oposisyon ug mga kakuyaw nga naghulga sa kinabuhi, si Alma maisugong mihangyo kang Haring Noah nga tugutan si Abinadi nga mobiya nga malinawon. Ang mga lihok ni Alma nagagikan sa iyang kasingkasing; siya mibati sa gugma sa Manluluwas nga gitunol ngadto kaniya pinaagi sa propeta sa Ginoo nga si Abinadi.
Sa dihang ang akong inahan mitanyag kanako og usa ka kwentas alang sa proteksyon aron isul-ob sa liog sa akong anak, akong gibase ang akong kabalaka sa panggawas nga panagway. Nabalaka ko kon unsay mahunahuna sa mga miyembro sa among branch kanako. Dayag lang, wala pa ko hingpit nga makasinati nianang “dakong kausaban sa kasingkasing.” Sukad niadto nakaamgo ko nga ang atong kalampusan ug kalipay nakabase kon unsa ka hingpit kita nga andam modala sa ebanghelyo ngadto sa atong mga kasingkasing. Aron kita makakaplag og tinuod nga kalipay, ug kalinaw, “ang tiunay nga ebanghelyo ni Jesukristo kinahanglan gayud motuhop ngadto sa [atong] mga kasingkasing … pinaagi sa gahum sa Espiritu Santo.”1
Usa ka Oportunidad sa Pagpamatuod
Uban niini nga matang sa kausaban, ang paghimo sa Manluluwas nga atong ehemplo sa tanang mga butang ug sa tanan nga mga dapit makapahimo nato sa pagtabang sa uban. Si Alma nahimong usa ka gamhanang misyonaryo, nakatabang sa daghang tawo ug miorganisar sa Simbahan ni Kristo diha sa iyang mga katawhan kinsa milayas gikan kang Haring Noah.
Inyo bang nakita kon sa unsang paagi nga wala nako mapahimusli ang oportunidad sa pagpakigbahin sa ebanghelyo ngadto sa akong inahan sa dihang mitanyag siya kanamo niadtong dunay magic nga butang, nga iyang gituohan nga kanunay nga nanalipod kaniya ug sa iyang mga anak? Nahimo unta kong instrumento sa mga kamot sa Ginoo—sama ni Alma—kinsa misangyaw sa ebanghelyo ni Jesukristo ug “miusab sa ilang mga kasingkasing; oo, siya mipukaw kanila gikan sa lawom nga pagkatulog, ug sila nahigmata ngadto sa Dios” (Alma 5:7).
Kon maghunahuna ko nianang higayuna uban sa akong inahan, naghunahuna ko unsa kaha ang nahitabo kon miresponde ko nga sama kang Alma. Ang akong inahan tingali nahigmata ngadto sa Dios, ug ang iyang kausaban aduna untay positibo nga epekto diha sa akong mga igsoon. Kini nga kausaban duna dayon untay dakong epekto sa kinabuhi sa mga anak sa akong mga igsoon ug ngadto sa ilang kaliwatan.
Ang dakong kausaban ni Alma nabati dili lamang niadtong iyang natudloan ug ngadto kang kinsa siya mipamatuod apan usab sa iyang mga anak ug iyang kaliwatan. Ang iyang anak, si Alma, samtang nagsangyaw sa katawhan diha ug libut sa yuta sa Zarahemla, mipahinumdom kanila sa pagpamatuod sa iyang amahan kabahin sa Manluluwas nga si Jesukristo:
“Tan-awa, ako makasulti kaninyo—Wala ba ang akong amahan nga si Alma motuo diha sa mga pulong diin gisulti pinaagi sa ba-ba ni Abinadi? …
“Ug sumala sa iyang hugot nga pagtuo dihay usa ka dako nga kausaban nga nahimo diha sa iyang kasingkasing” (Alma 5:11–12).
Alang sa usa ka batan-ong tawo sama ni Alma, kining dakong kausaban sa kasingkasing, nga nagsugod pinaagi sa pagdapit ni Abinadi nga gamiton ang kasingkasing sa tawo sa pagsabut sa pulong sa Dios, mao ang yawe ngadto sa iyang kalipay ug kalampusan sa pagtabang sa uban: “Ug tan-awa, siya misangyaw sa pulong ngadto sa inyong mga amahan, ug dihay usa ka dako nga kausaban usab nga nahimo diha sa ilang mga kasingkasing, ug sila mipaubos sa ilang mga kaugalingon ug mitugyan sa ilang pagsalig diha sa tinuod ug buhi nga Dios. Ug tan-awa, sila mga matinud-anon hangtud sa katapusan; busa sila nangaluwas” (Alma 5:13).
Paghimo og Padayon nga Kausaban
Ang ubang kabatan-onan karon maglibug tali sa pagpili kon unsa ang matarung sa panan-aw sa Dios o sa pagpahimuot sa ilang mga ginikanan o mga tigbantay, kinsa tingali dili sama kanila og mga pagbati mahitungod sa katinuod sa ebanghelyo. Kon mag-atubang og sama nga pagpili, pangutan-a ang inyong kaugalingon, “Kini nga desisyon ba makatabang kanako nga mobati nga ang akong ‘mga buhat mao ang mga buhat sa pagkamatarung’ (Alma 5:16), ug naghimo ba gihapon kini kanako nga mobati ‘sa pag-awit sa awit sa matubsanon nga gugma’?” (Alma 5:26).
Samtang kitang tanan kinahanglang mohigugma ug modayeg sa atong mga ginikanan, kinahanglan kitang masayud nga ang pagpili nga atong gihimo adunay direkta nga epekto ngadto sa atong mga anak ug atong kaliwatan. Alang sa pipila kanato mahimong gikinahanglan ang pagpalayo gikan sa atong komportableng kahimtang, sama ni Alma, kinsa milayas gikan sa mga sulugoon ni Haring Noah ug mitudlo sa ebanghelyo sa lisud kaayo nga mga kahimtang. Siya mihimo og kausaban dili lamang sa iyang pamilya apan usab sa uban. Aron mosinati og kausaban sa kasingkasing, importante nga maghunahuna kita sa uban ug “makighiusa diha sa pagpuasa ug sa hugot nga pag-ampo alang sa kaayohan sa mga kalag kinsa wala [makaila] sa Dios” (Alma 6:6).
Unsa kaha kon ang among masuso nga si Rosemary wala makalahutay sa iyang sakit—bisan human sa panalangin sa priesthood nga akong gihatag ngadto kaniya? Ang pahimangno sa Ginoo usa ka kalig-on kanako: “Ang makakaplag sa iyang kinabuhi kawagtangan hinoon niini: apan ang magawagtang sa iyang kinabuhi tungod kanako makakaplag ra niini” (Mateo 10:39).
Kita makakaplag og kalipay sa makanunayon nga paningkamot sa pagsinati og kausaban sa kasingkasing samtang atong hangupon ang Pag-ula ni Jesukristo sa atong kinabuhi. Mapasalamaton ako niini nga kahibalo, ug nasayud ako dinhi sa akong kasingkasing nga ang atong Manluluwas mipadayon, “mag-antus sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan” (Alma 7:11). Ako nasayud nga adunay tinuod nga kasiguroan ug proteksyon sa paghimong ehemplo sa Ginoo ug sa pagsunod sa Iyang tambag.