Mausali Faaleagaga: Fausiaina o se Vaa e Le Goto
Saunia e Elder Dale G. Renlund
O Le Korama a Aposetolo e Toasefululua
Mai se faigalotu a le Iunivesite o Polika Iaga na faia i le aso 16 o Sete., 2014. Mo le tusiga atoa i le faaPeretania, asiasi i le speeches.byu.edu.
Tatou te manaomia le lava o le mausali faaleagaga e faatautaia lelei ai o tatou olaga i le olaga nei ma toe foi saogalemu atu ai i lo tatou aiga faalelagi.
Aikona ma atapue o le vaa © lublubachka/Thinkstock, MicheleBolero/Thinkstock, David Harding/Thinkstock
I le amataga o le seneturi lona 17, sa poloaiina ai e le tupu o Suetena o Gustav II Adolf, le fausiaina o se vaatau o le a faaigoaina o le Vasa. Sa anoanoai le tele o punaoa na manaomia ai, ae maise lava o le aruna lea o le a fauina ai le vaa. Sa mataituina ma le totoa e Gustav Adolf le faagasologa o le fauga, ma taumafai ia mautinoa o le a ausia atoatoa e le Vasa ona faamoemoega.
Ina ua amata le fauga, sa faatonu ai e Gustav Adolf ia fau faaumi atu le Vasa. Talu ai ona na uma ona fau ia lagolago o le lautele mai le aruna anagata, o lea na faatonu ai e le tupu le au tufuga e faaopoopo le umi o le vaa e aunoa ma le toe faaopoopoina o le lautele. E ui lava sa iloa e tufuga fauvaa atamamai o le faia o lenei mea o le a fetuunaia ai le gafatia o le folau saogalemu o le Vasa, ae sa mumusu e tau i le tupu se mea na latou iloa sa lei fia faalogo i ai. O lea na latou usitai ai [i le tupu]. Sa manao foi Gustav Adolf ia le na o le tasi le fogavaa o lenei vaa e i ai fana e pei ona masani ai, ae ia tuu ni fanafanua i fogavaa e tolu, ma ia tuu fanafanua aupito sili ona mamafa i le fogavaa pito i luga. Ma, sa usitai foi tufuga, ae na le tusa ai ma lo latou silafia lelei.
I le aso 10 o Aokuso, 1628, sa amata ai e le Vasa lana malaga muamua. Ina ua tuua e le Vasa le uafu, sa taia e se savili malosi ona la, ma amata ai ona malifa le vaa. E lei umi, “ae tifato ma pisi atu ai le vai i ava o fanafanua seia oo ina alu ifo malie lava i le taele o le sami ma ona la, tagavai ma mea uma.”1 Na pe a ma le 4,200 futu (1,280 m) le mamao o le malaga muamua a le Vasa.
O le manao o Gustav Adolf mo se faailoga o le maoae o lona paoa na faaleagaina ai le mamanu o se mea na semanu o se vaa folau matagofie, le vaatau sili ona malosi o lona vaitaimi. O le mumusu o tufuga fauvaa e tautatala atu—o lo latou fefefe i le toasa o le tupu—na le silafia ai e le tupu lo latou atamamai ma le malamalama. Na aveesea le taulaiga a tagata uma na aafia ai i sini o le galuega faatino: ia puipuia Suetena ma ia faalauiloa atu ai i atunuu i fafo lona manaia. O se vaa e taumafai e tetee i tulafono o le fisiki ua na o se vaa o le a le opeopea.
Ina ia mafai ona tatou faatautaia ma le manuia o tatou olaga i le olaga nei, tatou te manaomia le lava o le mausali faaleagaga e faafetaiaia ai maagao ma maafaalavea aao, fai suiga e manaomia, ma toe foi saogalemu atu i lo tatou aiga faalelagi. O loo i ai mea e mafai ona tatou faia e faateleina ai lo tatou mausali faaleagaga. O le a ou taua ni mea se fa.
O le usitaia o Poloaiga a le Atua
O le muamua, o le usitaia o poloaiga a le Atua. E pei lava ona sa aafia le Vasa i tulafono faaletino, tatou te aafia uma i tulafono faaleagaga. E leai se tasi e sao ai. E tatau ona tatou usitai i nei tulafono faaleagaga, lea ua tatou taua o poloaiga a le Atua.
O le galulue ai ma tulafono faaletino i le fauina o le vaa, atonu na pei na taofiofia ai Gustav Adolf, ae na semanu e le goto le Vasa ao lei amataina lana misiona pe ana usitaia nei tulafono. Nai lo lena, semanu e i ai le saolotoga ma le maufetuunaia ina ia ausia ai le mea na faamoemoeina e fai.
E faapena foi la, o le usiusitai i tulafono a le Atua e faasaoina ai lo tatou saolotoga, fetuutuunai, ma le gafatia e ausia ai o tatou faamoemoega. O poloaiga e le o faamoemoe e faasasa ai i tatou. Nai lo lena, o le usiusitai e tau atu ai i le faateleina o le mausali faaleagaga ma le fiafia umi.
O le usiusitai o le tatou lava filifiliga lea. Na fetalai Iesu, “Faauta, ua ou tuu atu ia te outou poloaiga; o lea ia outou tausi au poloaiga.” (3 Nifae 15:10). E faigofie lava. Filifili loa. Filifili nei e usiusitai atoatoa. E leai se mea o le a atili faateleina ai le mausali faaleagaga. E leai se mea o le a tuuina mai ia i tatou le saolotoga sili atu e ausia ai misiona o o tatou olaga.
Faalogo i Fautuaga ma Avea ma ni Tagata Aoaoina o le Olaga Atoa
Lona lua, e tatau ona tatou gauai ma faalogo atu i fautuaga mai punavai faatuatuaina ma tautino atu i tatou lava ia avea ma ni tagata aoaoina o le olaga atoa.
O se tasi o tulaga lamatia o le mauaina o le atamai o le faasausili lea e mafai ona oo mai pe a tatou mafaufau ua tele mea ua tatou iloa, ma ua leai se mea o totoe e aoaoina. Ua tatou vaai uma i lenei mea i tagata taitoatasi o e ua faalagolago tele foi i lo latou lava atamai. E faigata tele ona aoao se tagata ua manatu ua ia iloa mea uma.
O le nofouta ai i lenei mea, ma le naunau ia avea ma se tagata aoao o le olaga atoa, na saunoa ai Peresitene Henry B. Eyring, Fesoasoani Muamua i le Au Peresitene Sili e faapea, “O loo pei lava au o se tamaitiiti, o le a tele ni mea e tatau ona ou aoao ai. E toetoe lava o tagata uma e mafai ona latou aoao mai se mea ia te au.”2 Ina ua ia tuuina mai ai le valaauga ia te au e avea ma se Pulega Aoao, sa aoao mai e Peresitene Eyring se lesona taua ia te au. Sa ia saunoa, pe a faalogo atu o ia o faamatala e se tagata se tala sa ia faalogo muamua i ai, pe faaaoga se mau ua ia iloaina lelei, e fesili ifo ia te ia lava, “Aisea ua faamamafa mai ai e le Alii lena mea mo au?” ma “O le a se mea ou te lei aoaoina mai lena tala po o le mau?” Afai tatou te mananao e faateleina lo tatou mausali faaleagaga, o le a tatou naunau e aoao ma o le a lava lo tatou lotomaualalo e talia ai taitaiga e tusa lava po o le a lo tatou matutua ma le poto masani.
O la tatou lava filifiliga. E mafai ona tatou faalogo atu ma usitai i fautuaga e tuuina mai ia i tatou e taitai o le Ekalesia, ae maise lava o i latou tatou te lagolagoina o ni perofeta, tagatavaai ma talifaaaliga; e matua; ma uo faatuatuaina—pe leai foi. E mafai ona tatou saili e avea ma ni tagata aoao o le olaga atoa—pe leai foi. E mafai ona tatou faateleina lo tatou mausali faaleagaga—pe leai foi. Afai tatou te le faateleina lo tatou mausali faaleagaga, o le a pei i tatou o le Vasa—o se vaa e le opeopea.
Auauna Atu i Isi
Lona tolu, o le taulai atu o manatu ma taumafaiga i fafo atu, tausiga o isi, ma le auauna atu i isi, e faateleina ai lo tatou mausali faaleagaga.
E manino lo tatou iloa atu o le faavavau pe a tatou taulai atu i isi ao tatou saili e fesoasoani i fanau a le Tama Faalelagi. Na ou iloaina e sili atu le faigofie ona maua o musumusuga pe a ou tatalo e fia iloa pe mafai faapefea ona ou fesoasoani atu i se isi tagata nai lo na o le tatalo mo au lava.
Atonu tatou te talitonu e i ai se taimi i le lumanai o le a tatou i ai i se tulaga lelei atu e fesoasoani ai. O le mea moni, o le taimi lenei. Ua tatou sese pe afai tatou te mafaufau o le a sili atu ona faigofie pe a tele atu o tatou taimi, tele atu ni tupe, po o le tele atu o soo se mea e auauna atu ai i isi. E tusa lava po o a tulaga, o loo i ai sa tatou filifiliga. Pe o le a tatou fesoasoani atu i isi pe leai? Tatou te le pasia le suega taua o le olaga nei pe afai tatou te le filifili e fesoasoani atu ia i latou o manaomia le fesoasoani. Ma, afai tatou te fesoasoani atu, tatou te faateleina ai lo tatou lava mausali faaleagaga.
Avea Iesu Keriso ma o Tatou Faavae
Aikona ma atapue o le vaa © lublubachka/Thinkstock, MicheleBolero/Thinkstock, David Harding/Thinkstock
Lona fa, o le mea mulimuli, ma e sili ona taua, e faateleina lo tatou mausali faaleagaga e tusa ai ma le maualuga lea tatou te faatuina ai Iesu Keriso e avea ma o tatou faavae.
A aunoa ma Keriso, e fetosoai i tatou e pei o se vaa e felafoaiina i luga o galu. E leai so tatou malosi aua ua leai sa tatou la. Tatou te le mausali, ae maise i taimi o afa, aua ua leai se tatou taula. E leai se taitaiga po o se faamoemoega aua ua leai ni a tatou mea e uli ai. E tatau ona tatou avea Keriso ma o tatou faavae.
Ina ia mafai ona feagai, faatoilalo, ma ia saunia mo maagao ma maafaalavea aao o le olaga, e ao ona tatou usitai i poloaiga a le Atua; ia lotomaualalo, manao, ma naunau e avea ma tagata aoao o le olaga atoa; auauna atu i isi; ma faatuina Iesu Keriso e avea ma faavae o o tatou olaga. A tatou faia faapea o le a faateleina lo tatou mausali faaleagaga. E le pei o le Vasa, o le a mafai ona tatou toe foi atu i le uafu saogalemu, ua faataunuuina lo tatou faamoemoega.