Aoao i Latou e Faitau le Tusi a Mamona

Emilien Rioux, Quebec, Kanata

I le taimi o le ma auaunaga i le Misiona a Suitiselani Sineva, sa valaauina ma vaetofia ai au e avea ma peresitene o le paranesi, ae na valaauina lou toalua o se peresitene o le Aualofa. Sa ma galulue faatasi ma lo maua malosi atoa e toe faamalosi le paranesi sa tau faamalosi. E ui lava sa faatulagaina i le 1960, ae sa lei vaaia lava e le paranesi ni papatisoga mo le tele o tausaga ma e lei auina atu foi se faifeautalai i le misiona mo le 15 tausaga.

Sa iloa lelei lava lo matou manaomiaina o le fesoasoani a le Alii ina ia maua ai ni fofo mo le tele o faafitauli na feagai ma le paranesi. Ina ua uma ona ou tatalo e uiga i luitau o le paranesi, sa fetalai mai le Agaga o le Alii ia te au, “Aoao atu i tagata o le ekalesia e faitau le Tusi a Mamona, ma o le a faamanuiaina ai oe.”

O le taimi lava lena, sa matou faia ai ni fuafuaga e faatautino tagata uma o le ekalesia e amata faitau le Tusi a Mamona.

Sa mulimuli mai ai ni taunuuga maoae. Sa toe foi mai le toafilemu ma le Agaga i le paranesi. Sa auai ni aiga fou i le Ekalesia. O le faaosofia e ala i lona manao e auauna atu, sa alu ai se alii talavou i se misiona. Na faamalolosia le tele o faaipoipoga sa luitauina, ma sa faateleina le vavalalata o aiga. O loo faaauau pea ona alualu i luma lenei paranesi i le taimi nei.

Ua matou molimauina ma tagata o le paranesi le mana faavavega o le Tusi a Mamona. E moni lava o le maaauau o la tatou tapuaiga ma a tatou molimau o le talalelei ma ia Iesu Keriso. Ma te alolofa tele i ai ma o maua loto atoa. O se punavai o le malamalama e le uma ma e le masuia.

O lenei aafiaga na aoaoina ia i maua e faapea, o le Tusi a Mamona o le auala mautinoa lava lea e fesoasoani ai i o tatou uso ma tuafafine e o ese mai i fafo o ataata o le pogisa faaleagaga lea e ufitia ai le lalolagi. O lenei tusi e aumaia ai le toafilemu, olioli, fiafia, ma se naunautaiga malosi e mulimuli i le Faaola o Iesu Keriso.