Seia Tatou Toe Feiloai
SAILIGA o Meaalofa Faaleagaga
Saunia e Peresitene George Q. Cannon (1827–1901)
Fesoasoani Muamua i le Au Peresitene Sili
Mai le The Latter-day Saints Millennial Star, Ape. 23, 1894, 258–61; ua faalaugatasia faailoga ma mataitusi tetele.
E toafia outou o loo saili mo nei meaalofa ua folafola mai le Atua e tuuina mai?
Ata na pueina e © iStock/Thinkstock
E mafai ona maua e alii ma tamaitai uma i le Ekalesia a Keriso ia meaalofa o le Agaga o le Atua ua vaevaeina atu ia i latou e tusa ai ma o latou faatuatua ma e tusa ai ma le finagalo o le Atua. …
E toafia outou … o loo saili mo nei meaalofa ua folafola mai le Atua e tuuina mai? E toafia outou, pe a outou ifo atu i luma o lou Tama Faalelagi i le lio o lou aiga po o i au nofoaga lilo, e talosaga atu mo nei meaalofa ina ia tuuina mai ia te oe? E toafia outou e ole atu i le Tama, i le suafa o Iesu, e faaali mai o Ia lava ia te oe e ala i nei mana ma nei meaalofa? Pe tou te o i lea aso ma lea aso, e pei o se faitotoa e feliuai i ona sooga, e aunoa ma se manatu i ai i le mataupu, e aunoa ma le faaaliga o se faatuatua, ua faamalieina i le papatisoina ma avea ma tagata o le Ekalesia ona malolo ai lea iina, ma mafaufau faapea, ua mautinoa lou faaolataga ona ua e papatisoina? …
… Ou te iloa e finagalo le Atua e faamalolo i e mamai, e finagalo o Ia e tuu mai le meaalofa o le iloatino o agaga, o le meaalofa o le poto, o le malamalama ma valoaga, ma isi meaalofa e ono manaomia. Afai e i ai se tasi o i tatou e le atoatoa, o lo tatou tiute le tatalo mo le meaalofa o le a faapea ona tatou atoatoa ai. E I Ai Ni Ou Le Atoatoa? E matuai tumu au i le le atoatoa. O le a lou tiute?. O le tatalo i le Atua e tuuina mai ia te au meaalofa o le a faasao ai nei le atoatoa. Afai o au o se tagata ita, o lou tiute le tatalo mo le alofa moni, lea e onosai ma e agalelei. Pe o au ea o se tagata losilosivale? O lou tiute le saili mo le alofa moni, lea e le losilosi. E faapena i meaalofa uma o le talalelei. Ua faamoemoeina mo lenei faamoemoega. E leai se tasi e tatau ona faapea mai, “Oi, e le mafai ona ou tuua lenei mea; o lou a natura lea.” E le tauamiotonuina ai o ia, ona o le mafuaaga, ua folafola mai le Atua e tuuina mai le malosi e faasao ai nei mea, ma tuuina mai meaalofa o le a aveesea ai i latou. Afai e leai se poto i se tagata, o lona tiute o le ole atu i le Atua mo le poto. E tutusa lava ma isi mea uma. O le fuafuaga lena a le Atua e faatatau i Lana Ekalesia. E finagalo o Ia i Lana Au Paia ina ia faaatoatoaina i le upumoni. O le faamoemoega lenei ua Ia tuuina mai ai nei meaalofa ma faaee mai i luga o i latou o e saili i ai, ina ia mafai ona avea i latou ma tagata atoatoa i luga o le fogaeleele, e ui lava i o latou vaivaiga e tele, aua ua folafola mai le Atua e tuuina mai meaalofa e alagatatau mo lo latou atoatoaga.