Tala Faamamai o le Talalelei
O Le Perisitua: O Se Taula Mausali
Saunia e Elder L. Tom Perry (1922–2015)
O le Korama a Aposetolo e Toasefululua
O lenei tusiga sa saunia e Elder L. Tom Perry, i aso e lua a o lei maliu, ina ia faasoa atu i le au perisitua arona.
O le malosiaga silisili i lou olaga o le perisitua a le Atua. Ou te talitonu o le a avea foi o se taula mautinoa mo outou alii talavou. Ae ina ia i ai lona mana i lou olaga, e tatau ona e malamalama i ai ma faaaogaina.
Uluai Aafiaga i le Perisitua
Sa ou ola ae i se siosiomaga lelei i Logan, Iuta. Sa leai ni ou popolega ao ou laitiiti e uiga i meaai po o le fale po o le aoga. Ae masalo ona o le faigofie o le olaga, sa ou manaomia ai se mea e pipii i ai o le a taula ai au.
Mo au o lena taula o le perisitua a le Atua. Sa ese se tulaga na ou i ai ao ou tuputupu ae. Sa valaauina lou tama e avea ma epikopo ina ua tasi lou tausaga, ma sa avea o ia ma ou epikopo mo le 19 tausaga. O lana taitaiga faaletamā ma faaleagaga sa o se fesoasoani tele lea ia te au.
Ou te manatu o le mafuaaga sili lena sa ou tulimatai atu ai i le mauaina o le Perisitua Arona i le atoaga o lou 12 tausaga. Ou te manatua le aso faapitoa sa ou lagonaina ai lima o lou tama i luga o lou ulu ao ia faauuina au. Ina ua mavae lena, sa ou siitia atu i tofi o le Perisitua Arona ma maua ni valaauga sa ou matuai fiafia i ai.
O le tufaina o le faamanatuga sa sili ona faapitoa ia te au. E mafai ona vaaia i tagata e tautino atu i latou lava e usitai i le Alii ma tausi Ana poloaiga, a o latou aai ma feinu i faatusa o Lona tino ma le toto.
Tuputupu Ae i le Malamalama o le Perisitua
A o faagasolo pea le taimi, sa ou faauu mai le aoga maualuga, ma i le uma ai o se tausaga i le kolisi, sa valaauina loa au i se misiona. Sa ou fiafia i ona minute uma, ma sa ou alofa i au soa. O se tasi [o au soa] na faapitoa lava ona avea ma se malosiaga ia te au. Sa tele ni mea na ou aoaoina mai ia te ia ao faataunuuina o maua tiutetauave.
Ona sa aafia le atunuu i le taua, ina ua ou foi mai mai lau misiona sa ou auai loa i le Marini a le Iunaite Setete. Ina ua uma le taua, sa ou toe foi i le kolisi, faaipoipo, ma amataina se aiga. O ni fesiitaiga faamanuiaina i le galuega na aveina atu ai au i le tele o nofoaga i le salafa o le Iunaite Setete, lea sa tele ni mea na ou aoaoina ai ao ou auauna atu i le tele o valaauga o le perisitua. Na iu ina ou tuvae i Boston, Massachusetts, lea sa ou auauna atu ai o se peresitene o le siteki. O iina sa valaauina ai au e avea ma se fesoasoani i le Toasefululua ma i le mavae ai o le 17 masina, [sa valaauina loa] i le Korama a Aposetolo e Toasefululua.
O Lesona na Aoaoina o se Aposetolo
O a ni mea ua ou aoaoina i le avea ai o se tasi o le Korama a le Toasefululua?
Ua ou aoaoina o loo i ai se taiala, se taula, ma se puipuiga i le perisitua.
Sa i ai lava i taimi uma le perisitua. Ao lei sau Atamu i le lalolagi, sa ia te ia le perisitua. Ao taapeape solo le fanau a Atamu faatasi ma le perisitua, sa alagatatau ai ona faatulaga le faiga na tuuina atu ai le perisitua. Na faia e le Alii lena mea e ala i le valaauina o Aperaamo e pulefaamalumalu i lona aiga o e umia le perisitua. Sa faaauauina pea lenei faatulagaga i lalo o Isaako ma Iakopo, o le na suia mulimuli ane lona igoa ia Isaraelu.
I seneturi mulimuli ane, sa faapea ona oo ai le fanauga a Isaraelu i le faatagataotauaina. Na auina atu e le Alii ia Mose e laveai i latou, ae ina ua ia faia, sa faamaonia e i latou lava, latou te lei saunia o se nuu mo le Perisitua Mekisateko. O lea na tuua ai i latou ma le Perisitua Arona seia oo i le taimi o le Faaola.
E ese le malie o le mea na muai fai e le Faaola ina ua Ia amataina Lana galuega. Sa ia faatulagaina le Perisitua Mekisateko. Sa ia valaauina Aposetolo e toasefululua, ma aoao i latou i tulafono ma le faatulagaga o le perisitua. Sa ia valaauina Peteru e avea ma Aposetolo taitai, ua faavaeina ai se faasologa o le pulega i Lana Ekalesia. I lena vaitaimi ma lenei vaitaimi, o Iesu Keriso e filifilia Lana Aposetolo taitai e pulefaamalumalu i le Ekalesia, ma o le Faaola e aoao mai ia te ia i ona tiute faaleperisitua.
O lea la, o le perisitua e i ai se laina tuusao mai lo tatou Alii ma le Faaola e ala mai i le Aposetolo taitai i le isi Aposetolo ma oo atu ai i isi e umia le perisitua i le Ekalesia. Ua tuuina mai ki o le pulega i le au Aposetolo, ma afai e i ai na ki i luga o le lalolagi, o le a taitaiina i tatou e le Alii lava Ia. O lenei taitaiga faalelagi e puipuia ai i tatou ma faamautinoa mai ia i tatou, o le a le alu ese lava le Ekalesia mai le upumoni. O le a tumau pea le ogatasi aua e le o taitaiina e se tagata o le faalelalolagi. O loo taitaiina e le Alii.
Aoao i Aoaoga Faavae o le Perisitua
O le fautuaga sili lava ou te tuu atu mo outou alii talavou o le, ia suesue i aoaoga faavae o le perisitua, malamalama i le mana o loo ia te outou i le faaaogaina o tou perisitua, ma aoao i auala e mafai ona faamanuiaina ai o outou olaga ma olaga o isi.
Ou te folafola atu afai o le a e aoao i aoaoga faavae o le perisitua ma faataunuu ou tiute o le perisitua, o le mautinoa lava le avea o le perisitua ma taula o le a e saogalemu ai faaleagaga ma aumai ia te oe le olioli tele. Ia avea ma se korama moni o le perisitua. Aapa atu i au uo ma aumai i latou i lau korama. Ia fatuai se usoga i lau korama lea o le a avea ma faavae tumau mo o outou olaga.