O La Tatou Avanoa
Faamanuiaina mo le Usitaia i le Tulafono o le Sefuluai
Sabrina T., São Paulo, Pasila
A o ou laitiiti, ma oo ai lou aiga i le tele o tofotofoga i mea tautupe lea na oo mai lava i le pe tusa o le 10 o ou tausaga. Sa le mafai ona maua e lou tama se isi galuega, o lea sa galue ai i le faatauina atu o ni oloa i autafa o le auala, ma e itiiti lava se tupe na maua mai ai. O lou tina sa nofo i le fale e vaai i maua ma lou tuagane laitiiti.
Ae e ui lava i le oo ai i le tele o faafitauli, ae sa i ai sa matou molimau e uiga i le totogiina o le sefuluai ma le tuuina atu o isi taulaga. Sa matou totogiina ma le faamaoni la matou sefuluai i masina taitasi ma e lei i ai se taimi na matou le mauaina ai ni mea. Matou te iloa ma le mautinoa sa faaauau ona faamanuiaina i matou ona o le agalelei e le mavae o le Alii ma na te tausia Ana folafolaga pe a tatou usiusitai i Ana poloaiga.
Na iu lava ina faamutaina o matou aso o tofotofoga i mea tautupe. O faamanuiaga ua tuuina mai e le Alii ia i matou i nai tausaga nei ua mavae atu, e matuai ofoofogia lava.
Ou te iloa mo i latou o e totogi ma le faamaoni sefuluai ma totogi a latou taulaga i le alofa ma le sini o le faamanuiaina o olaga o isi, o le a leai se mea e le maua, ma e mafai foi ona tupu ai se mea e sili atu ona lelei, e pei foi o au ma le matou aiga. O le a faateleina faamanuiaga. Ua ou iloa lena mea. Sa ou ola ai.
Faamaoni i Mea Uma
Alivsi H., Jalisco, Mekisiko
I amataga o semesa uma i le aoga, matou te mauafua ai se seti o ni oloa e aofia ai se api, o se api o fuafuaga fai, ma se oloa faataitai e eseese lava. I se tasi tausaga sa ou tu ai i le laina e aumai lau seti ma iloaina ai, o le oloa faataitai na ou mauaina sa faapitoa le aoga mo au.
I le faaiuga o le aso, sa ou vaaia ai sa latou tuuina atu ni oloa faataitai tailua o le oloa lava lea e tasi. O le a faigofie ona ou toe oo i le laina ma aumai se seti lona lua, o lea sa ou filifili ai loa e fai. Ma le isi mea, sa tufa fua, ma sa ou manaomia lena oloa.
Sa ou afe faavave i le faleletaua, lea na ou vaaia ai se telefoni feaveai na galo ai iina a se teine. O se tasi o ituaiga fou, ma e lei leva atu ona leiloa lau lava telefoni i le vaiaso na muamua atu. Ae sa ou lei mafaufau e tuu ai ma au. “O le gaoi le mea lena,” sa fai ai ia te au lava.
Ma, ao ou alu atu e aumai lau seti lona lua o mea mauafua, na ou iloaina ai o lena mea e tutusa lava ma le le faamaoni i le taofiga o le telefoni, aua o le a ou pepelo ma faapea atu e lei maua muamua sau seti.
Sa ou faafetai mo lenei aafiaga laitiiti lea na aoao mai ai ia te au se lesona tele. Sa ou aveina le telefoni i le [ofisa] ma ou alu i le fale ma lau api e tasi, tasi le api o fuafuaga fai, ma le oloa faataitai e tasi, ae faatasi ai ma se lagona manaia ona o le faamaoni i mea uma, e tusa lava po o le a le laitiiti.