Savali a le Au Peresitene Sili
Valoaga ma Faaaliga Faaletagata Lava Ia
Saunia e Peresitene Henry B. Eyring
Fesoasoani Muamua i le Au Peresitene Sili
O le Ekalesia moni a Iesu Keriso ua toefuataiina mai ma ua i ai i le lalolagi i aso nei. O Le Ekalesia a Iesu Keriso o le Au Paia o Aso e Gata Ai sa taitaiina i taimi uma e perofeta ma aposetolo soifua, o e e maua e le aunoa le taitaiga mai le lagi.
O lena mamanu paia sa moni foi i aso anamua. Ua tatou aoao i le Tusi Paia: “E le faia lava se mea e le Alii o Ieova, ae faaalia Lona finagalo i Ana auauna o perofeta” (Amosa 3:7).
Ua toe fetalai mai le Atua i o tatou taimi, e ala i le Perofeta o Iosefa Samita. Na Ia faaalia mai e ala i le Perofeta o Iosefa le talalelei a Iesu Keriso i lona atoatoa. Na Ia toefuataiina mai Lana perisitua paia ma ona ki ma aia tatau, mana, ma matafaioi uma o le mana paia o le perisitua.
I o tatou aso, o perofeta ma aposetolo soifua ua faatagaina e saunoa, aoao mai, ma taitai i le pule mai le Atua le Tama ma le Alii o Iesu Keriso. Na fetalai atu le Faaola i le Perofeta, “O le mea ua fai atu ai Au o le Alii ua Ou fai atu ai, ma Ou te lē faatoese mai ai au lava ia; ma e ui ina mavae atu le lagi ma le lalolagi, e lē mavae atu lava lau upu, ae o le a faataunuuina uma lava, pe i lou lava leo po o i le leo o au auauna, ua tutusa lava” (MF&F 1:38).
I konafesi aoao e faalua i le tausaga, ua faamanuiaina ai i tatou i le avanoa e faalogologo ai i le afioga a le Alii mo i tatou mai Ana auauna. O se avanoa ua sili atu nai lo se tau. Ae o le taua o lena avanoa e faalagolago lea i le pe tatou te maua le upu i le uunaiga a le Agaga lava lea e tasi lea na tuuina atu ai i na auauna (tagai i le MF&F 50:19–22). E pei lava ona latou maua le taitaiga mai le lagi, e ao foi ona tatou maua. Ma e manaomia foi mai ia i tatou lena lava taumafaiga faaleagaga e tasi.
“Fai Lau Galuega”
O ni tausaga ua mavae sa talosaga mai ai ia te au se tasi o le Korama a Aposetolo e Toasefululua e faitau atu se lauga o le konafesi lea sa ia sauniaina mo le konafesi aoao. Sa avea au ma se sui laitiiti o le korama. Sa faamamaluina au i lona talitonu e mafai ona ou fesoasoani ia te ia ia maua upu na finagalo le Alii e tautala atu ai o ia. Sa ia fai mai ia te au ma se ataata, “Oi, o le 22 ai lea o le tusiga o le lauga.”
Ou te manatua le fautuaga sa tuuina mai ia te au e Peresitene Harold B. Lee (1899–1973) alofa ma agalelei, i se taimi na muamua atu ma le faamamafa maoae: “Hal, afai e te fia maua faaaliga, fai lau galuega.”
Sa ou faitau, mafaufau loloto ma tatalo e uiga i lena tusiga lona 22. Sa ou suesue i le mea sili ou te mafaia i le uunaiga a le Agaga Paia. E oo ane i le taimi na tuuina atu ai le lauga a lena sui o le korama, ua uma ona fai lau galuega. Ou te le mautinoa pe na ou fesoasoani i ai, ae ou te iloa sa suia au ina ua ou faalogo i le lauga na tuuina mai. Sa oo mai savali ia te au na sili mamao atu i upu sa ou faitauina ma sa ia tautalagia. Na sili atu ona anoa ia upu nai lo o upu sa ou faitau i ai i le tusiga. Ma o le savali sa foliga mai sa mo au, na fetaui lelei i ou manaoga.
E anapopogi ma tatalo auauna a le Atua ina ia maua le savali e finagalo o Ia ina ia latou tuuina atu ia i latou o e manaomia faaaliga ma musumusuga. O le mea na ou aoaoina mai i lena aafiaga, ma le tele o isi mea faapena o le, ina ia maua faamanuiaga maoae o loo maua mai le faalogo atu i perofeta ma aposetolo soifua, e ao ona tatou totogia e i tatou lava le tau o le mauaina o faaaliga.
E alofa le Alii i soo se tagata e mafai ona faalogo i Lana savali, ma Na te silafia loto ma le tulaga o tagata taitoatasi. Na te silafia le ituaiga faasaoga, le ituaiga faamalosiauga, ma le ituaiga upumoni o le talalelei o le a sili ona fesoasoani i tagata taitoatasi e filifili ai lona ala i le auala i le ola e faavavau.
O i tatou o e faalogo ma matamata i savali o le konafesi aoao, e i ai taimi e mafaufau ai pe a uma, “O le a le mea e sili ona ou manatuaina?” O le faamoemoe o le Alii mo i tatou taitoatasi o le, ina ia tatou tali atu: “O le a ou le faagaloina lava taimi na ou lagonaina ai le leo o le Agaga i lou mafaufau ma lou loto, na tau mai ai le mea e mafai ona ou faia e faafiafia ai lou Tama Faalelagi ma le Faaola.”
E mafai ona tatou maua lena faaaliga faaletagata lava ia pe a tatou faalogo i perofeta ma aposetolo, ma a o tatou galulue i le faatuatua ina ia maua, e pei lava ona saunoa Peresitene Lee e mafai ona tatou maua. Ou te iloa e moni lena mea mai aafiaga, ma e ala i le molimau a le Agaga.