E Tusa Lava Pe E te Matamuli

Saunia e Elder José A. Teixeira

O Le Fitugafulu

Elder José A. Teixeira

Faalagolago i le Alii, ma o le a Ia faamanuiaina oe i au taumafaiga e faasoa atu le talalelei.

shy missionary

Ina ua avea au ma se peresitene fou o le misiona i Pasila, sa ou faatalanoaina ai ni alii faifeautalai. Sa ou fai atu i se tasi e faamatala mai ia te au e uiga ia te ia lava.

“Ou te matamuli lava,” sa ia fai mai ai. Sa popole o ia ona sa faalavelave lona matamuli i lona mafai ona auauna atu.

Sa ou fesili atu, “E te manatu la e mafai e le Alii ona fesoasoani ia te oe ia avea ma se faifeautalai lelei?”

“Ou te talitonu e mafai ona fai e le Alii o soo se mea.”

“Ia tuu atu la ia te Ia e fesoasoani ia te oe. Faamata e mafai ona e faia lena mea?”

“Ou te mafaia,” o lana tala lea.

E tatau ona ou tauina atu, ao savali ese atu o ia, sa ou mafaufau, “Ia, talosia ia aoga.”

Na mavae atu vaiaso ma e lei umi ae toe o mai foi na lava faifeautalai mo faatalanoaga. O le taimi la lenei, sa fai mai le soa a le alii faifeautalai matamuli, “Peresitene, ou te le iloa po o le a le mea sa e tauina atu ia te ia, ae e mautinoa lava na faia ai se eseesega. Ua matuai lelei lava o ia i le talanoa atu i tagata.” Ma o lea sa ou tulimatai ai i le ma feiloaiga ma ia.

Ina ua sau o ia i lou ofisa, sa tilotilo o ia i lalo i ona vae.

“E i ai sau tala fiafia,” o lana tala lea. “O loo ou matamuli pea, ae sa ou ole i le Alii e fesoasoani mai ia te au. Ona tatala lea o lou gutu ma atama ona tautala. Ma e te silafia oe? O loo ou faia i taimi uma lava. Ou te le manatua mea ou te fai atu ai. Ae o le mea e ofoofogia ai e fiafia i ai tagata. Latou te lagona le Agaga. Latou te malamalama ia te au ma i mea ou te tau atu ia i latou.”

Sa ou maofa i le vaai i le suia o lenei faifeautalai ina ua ia tuu atu lona faatuatuaga i le Alii. Sa avea o ia ma se tufugaaao maoae i le aumaia o le fiafia i tagata e toatele.

Faatoilaloina o le Fefe

Tatou te lagona le popole i nisi o taimi pe a tatou faasoa atu le talalelei. Ae e pei ona faaalia e lenei faifeautalai matamuli, o le a taitai i tatou e le Alii pe afai tatou te faalagolago ia te Ia. O le a fesoasoani le Agaga Paia ia tatou iloa upu e fai atu (tagai i le 2 Nifae 32:2–3), ma a lagona e tagata le Agaga, e masani ona latou tali mai i se auala lelei. E toatele tagata e faagaeetiaina i mea tatou te talitonu i ai ma mananao ai ia iloa atili.

Olioli Tele

E i ai sau molimau o le a taiala i tatou e le Tama Faalelagi i a tatou taumafaiga e faasoa atu le talalelei, ma i lena faagasologa o le a tatou lagona ai le olioli tele. O le mea moni, o lena olioli o le a i ai faatasi ma i tatou e le mo na o le taimi nei, ae faapea foi i le lalolagi a sau. (Tagai i le MF&F 18:16.) O se mafuaaga lelei lena e aluese ai mai lou siosiomaga ua e masani ai ma faia se mea, e tusa lava pe e te matamuli.

O Popolega e Tolu e Mafai Ona E Faatoilaloina

E ese mai i le matamuli, ou te iloa nisi o popolega faaopoopo e tolu lea e mafua ai ona tatou faapea, “Ou te fefe ona afai ou te talanoa e uiga i le talalelei, o le a leai ai ni au uo.” E faafetai ona, faatasi ai ma le faatuatua, e mafai ai ona faatoilalo na popolega.

1. E le lava ni mea ou te iloa.

   Afai e le lava lou malamalama e uiga i le talalelei, e mafai ona fesoasoani atu faifeautalai faamisiona. E mafai ona latou aoao mai ia i tatou le savali o le Toefuataiga, fesoasoani e faamalolosia o tatou faatuatua i le Alii o Iesu Keriso, ma fesoasoani ia tatou malamalama i le salamo ma le auala e faaaoga ai i o tatou olaga, ma le mafuaaga e taua ai le papatisoga ma le meaalofa o le Agaga Paia. O le isi punavai sili o le malamalama o le Talai Lau Talalelei. Ou te uunaia alii talavou ma tamaitai talavou uma ia i ai se kopi ma ia faia o se vaega o a latou suesuega i aso uma faatasi ma au tusitusiga paia.

2. Ou te lei faia muamua lava lenei mea.

   Afai e leai sou poto masani, faataitai i faifeautalai! E mafai ona latou fesoasoani ia te oe ia iloa faamatalaga e fai atu ma faamatalaga e aua le faia i se tulaga faapitoa. A o e faaalu se taimi faatasi ma faifeautalai, o le a e lagona lo latou alolofa i le talalelei ma mo o latou uso a tagata. Ua latou maua le lototele e faasoa atu ai le talalelei; e mafai ona latou fesoasoani atu ia e faia foi faapea.

3. Ou te fefe e faasoa atu.

   A faasoa atu a tatou molimau, ua tatou fesoasoani i a tatou uo ia iloa mea e sili atu ona taua, ma amata ai ona latou faaaloalo ia i tatou ma alolofa ia i tatou i se malamalama e ese mai. O lenei mea e tai tupu lava i taimi uma. E toatele tagata talavou e fai mai, “Sa ou fefe lava, ae ina ua ou tautala faamaoni atu, sa amata ona faatuatuaina au e au uo ma fai mai ni isi fesili se tele.” E le tatau ona tatou fefefe i le faasoaina atu o mea ua tatou maua. E taua aua e aumai mai le Atua. Ma o le a se isi auala sili e faaali atu ai le alofa i a tatou uo nai lo o le faasoa atu ia i latou o mea ua tatou iloa e moni?