Ataata
E Le o le Vavega sa MA Mananao Ai
E alala le tusitala i Iuta, ISA.
O nisi taimi tatou te tatalo ma tatalo seia oo ina tiga o tatou tulivae mo le vavega tatou te mananao ai, peitai ona tuuina mai ai lea e le Atua ia te i tatou o le vavega tatou te manaomia.
I ni nai masina ou te faauu ai mai le kolisi ma, sa ou faamoemoe, o le a fanau mai la’u pepe muamua. Sa naunau lava lo’u toalua e pei o a’u e amata ona maua se ma fanau.
E tasi le tausaga, fa masina, tele le mau suesuega pe ma’ito ae leai, e lima suesuega faaafuafua ae leai foi, e lua masina faanoanoa sa inuvai ai, ma le afe ma afe o loimata i se taimi mulimuli ane, sa leai se pepe ma sina faamoemoe itiiti mo le afuafuaina faalenatura. Ina ua valaau mai le ofisa o le fomai ma faapea mai e faasino i ma’ua i se fomai faapitoa mo le faaafuafuaina, sa ma teena. Ua faamamafa mai e taulima ai nisi faamatalaga, tatou te manaomia ai se malologa. A e ou te le i tuuina i lalo le telefoni, sa fai mai le tausi soifua, “Telefoni mai pe a i ai sa oulua vavega.”
O vavega, e ofoofogia. E oo mai i ni tulaga tetele ma laiti. E oo mai pe a tatou le faamoemoe e oo mai, ma pe a tatou matua manaomia lava. Ma o nisi taimi tatou te tatalo ma tatalo seia oo ina tiga o tatou tulivae mo le vavega tatou te mananao ai, peitai ona tuuina mai ai lea e le Atua ia te i tatou o le vavega tatou te manaomia.
Mo se taimi umi sa ma tatalo faatauanau ai mo se tamaitiiti, ae sa foliga mai na gugu le lagi. Na iu lava ina oo mai ia te i ma’ua e sese le mea sa ma tatalo atu ai. E silafia e le Atua po o a faamanuiaga tatou te manaomia ma le taimi tatou te manaomiaina ai. E silasila o Ia i le ata tele. Ua ma vaai atu nei i ai. O lea na ma suia ai. Ua taofi lo ma tatalo atu mo le mea sa ma mananao ai ae amata ona faapea atu “faafetai.”
Le Tama Faalelagi, faafetai atu ia te Oe mo le faamanuiaina o i ma’ua i le tasi ma le isi.
Faafetai atu ia te Oe mo aiga ma uo alolofa.
Faafetai atu ia te Oe mo fanau o loo siomia ai i ma’ua ia e mafai ona ma fiafia ai seia oo ina maua sa ma’ua lava fanau.
Faafetai atu ia te Oe mo fomai ma le saienisi ua mafai ona tatala mai ai mea e aoga ma mea e le aoga i o ma’ua tino.
Ma (o lenei le mea e sili ona faigata ona fai atu ai) faafetai atu ia te Oe mo lenei tofotofoga.
O le lotofaafetai mo le mea tonu ua nutimomoia o ma’ua loto sa faigata, ae sa ma iloaina e alofa le Tama Faalelagi ia i ma’ua. O le mea lea e i ai i se vaipanoa o lenei tofotofoga ia faamanuiaga. O le a ma le maua lava ia faamanuiaga pe a ma tuu atu e faatoilaloina i ma’ua e le tofotofoga. Nai lo lena, sa ma filifili ia loto faafetai—ma ina ua ma faia, na oo ina manino mai le faamanuiaga:
Sa atili ai ona ma faalagolago i le tasi ma le isi, fefaasoaai o ma’ua lagona, ma atili alofa ai le tasi i le isi.
Sa ma faalagolago atili i le Alii ma tatalo atili.
Sa ma latalata atili i le Faaola, lagonaina atili Lona mafuta mai, ma alolofa atili ia te Ia.
Sa ma lagonaina le alolofa o aiga ma uo o e sa tatalo mo i ma’ua.
Ma o le taimi lava na ma aloaia ai nei faamanuiaga uma, sa lofituina i ma’ua i le filemu aupito mama ma le matagofie e lei mafaufauina.
O le leai o so ma’ua aiga po o se fanau i lena lava taimi, e le faapea ai e lei manatu mai le Atua. Sa na ona manaomia lava o lo ma faatuatuaina o Lana taimi, ma sa ma manaomia Lona filemu e faaolaolaina ai lena faatuatuaina. Sa ma manaomia Lona filemu e fusifusia ai o ma’ua loto nutimomoia ma aumaia ia i ma’ua le faatuatua e agai atu ai pea i luma.
Filemu o le vavega sa ma manaomia—e le o le vavega sa ma ole atu ai, ae o le vavega sa sili ona ma manaomia.