Auaunaga i le Ekalesia
O Le Mana o le Faiaoga o Aiga
E alala le tusitala i Arisona, ISA.
E faapefea ona mafai ona tatou aoaoina se aiga e le mafai lava ona faatagaina i tatou i totonu o le faitotoa?
Sa tofia au e faiaoga o aiga ma Uso Erickson, o se tagata e matua atu o la‘u uarota o se faiaoga o aiga tuuto. Sa ia tuuina mai ia te au le faia o le faatulagaina o taimi, lea ou te lei popole ai.
O se tasi o o ma aiga, o le au Wright (ua suia le igoa), sa le auai malosi i le Ekalesia. Ina ua ou valaau atu i le aiga, fai mai Uso Wright, “Aua lava e te toe valaau mai i lo’u aiga.”
Sa ou tau atu ia Uso Erickson le mea ua tupu. O le masina na sosoo ai, ina ua fai mai ou te toe valaauina le au Wright, sa ou faamanatu atu ia te ia le manao o Uso Wright e aua le toe valaau atu. Na finau mai Uso Erickson ou te valaau pea, ma sa ou faia. Ina ua tali mai e Uso Wright le telefoni, sa ou fai atu ia te ia e aua le tuua i lalo le telefoni ia te au ma ta‘u atu ia te ia o la’u soa o faiaoga o aiga sa finau mai lava ou te valaau atu. Sa ou fesili atu pe mafai ona ma faiaoga o aiga ia te ia e ala i le valaau atu i masina taitasi. Sa ioe mai o ia.
Mai lena taimi, sa ou valaauina le au Wright i masina taitasi. O taimi uma lava ou te valaau atu ai, fai mai Uso Wright, “Ua uma lau valaau.” Ona ia tuu lea i lalo le telefoni. Ou te lei maua ai se faafitauli i lena mea, ma e lei manaomia e Uso Erickson se isi mea.
Ae ina ua mavae ni nai masina, na fautua mai Uso Erickson ua tatau ona ma anapopogi mo le au Wright. Sa ou ioe atu, i se tasi Aso Sa na ma tatalo ma anapopogi ina ia maua se auala e aapa atu ai ia Uso Wright. O le taeao na sosoo ai a o ou pasi atu i le fale o le au Wright i lou alu atu i le galuega, sa sau Uso Wright i fafo o le fale. Sa ou iloa atu se loli meataalo i lalo ifo o se tasi o pa‘u pito i tua o lana taavale, o lea sa ou tu ai ma ta’u atu ia te ia. Sa ia faafetai mai ia te au.
“Oi,” sa ou fai atu ai, “o a‘u o lou faiaoga o aiga.”
Sa ia toe faafetai mai ia te au a o ou alu ese atu i le galuega.
Sa ou telefoni ia Uso Erickson e ta‘u atu ia te ia le mea na tupu. Sa ia fai mai ia te au e valaau Uso Wright e faatulaga se taimi mo se faiaoga o aiga mo le afiafi na sosoo ai, lea na ou faia. O Uso Wright sa sagisagi mai ma le fiafia. Sa matou maua se asiasiga matagofie ma le aiga ma toe seti se isi taimi talafeagai. Sa ou tuua lo latou fale ma se molimau sili atu o le anapogi ma le tatalo, ma le taua o le avea ma se faiaoga o aiga.
Mulimuli ane i lena vaiaso, na matou iloa ai, na faatagaina e Uso Wright faifeautalai faamisiona e amata ona aoaoina lona afafine e 15 tausaga le matua. Sa ia tatalo mo ni masina ina ia mafai ona faamaluluina le loto o lona tama ma ia tuu atu o ia e papatiso. I le aluga o taimi na amata ona o mai le aiga i le lotu, ma na iu lava ina ioe mai Uso Wright ina ia papatisoina lona afafine. O le mea moni, o ia lava na papatisoina o ia.
Ou te faafetai sa maua e Uso Erickson le Agaga. O lona malamalamaaga i le taimi o lenei aafiaga na fesoasoani ia te au e maua se molimau sili atu i le mana ma le gafatia o le tuuto o faiaoga o aiga.