Tulaga Faatonuina Tumaua le Tama Faalelagi
Mai se saunoaga i le faigalotu, “Standards and Tolerance,” na tuuina atu i le Iunivesite o Polika Iaga–Idaho i le aso 13 Novema, 2012. Mo le tusiga atoa i le gagana Peretania, asiasi i le byui.edu.
E tumau lava tulaga faatonuina a le Atua, ma e leai se tasi e mafai ona suia. O tagata e manatu latou te mafaia o le a matua faateia lava i le Faamasinoga Mulimuli.
Ata na pueina e smauy/iStock/Thinkstock
O la‘u galuega muamua ina ua foi mai le kolisi, o le galue mo se kamupani fau vaalele autu. A o i ai iina, sa ou aoao ai, ina ia faia ni vaalele e saogalemu, e faia e le kamupani ni faailoga faapitoa mo vaega taitasi. O vaega e tatau ona faamaoniaina pe a ausia tulaga faatonuina uma, e aofia ai lona foliga, le lapoa, o mea e faaaoga, ma le malosiaga.
Afai o se vaega e talafeagai ma tulaga faatonuina, o le a tuu i le suegaoloa mo le fausiaina o se vaalele. Afai e le ausia tulaga faatonuina, o le a teena le vaega ma toe faafoi atu i le na auina mai ai. E faaeteete i latou na auina mai vaega ina ia malamalama ai ma ausia mea uma e manaomia, e aofia ai le malosiaga.
Pe o le a e naunau ea e tietie i se vaalele e gaosia mai i vaega e le lelei? E leai lava! O le a e manao i vaega ia sili atu nai lo le tulaga faatonuina. O nisi tagata, e ui i lea, e foliga mai e naunau e talia amioga le lelei i o latou olaga. Ae na o le iloaina, malamalama, ma le ola ai i aoaoga faavae a Keriso e mafai ai ona e faaaogaina le amio e manaomia e agavaa ai mo le faaeaga.
O le malosiaga e talia ai o se upu e faalogoina soo i le lalolagi i aso nei, e masani lava i le anotusi o le malosiaga po o le taliaina o aganuu po o amioga a isi tagata. O nisi taimi e faaaoga e tagata e mananao i le taliaina e fai se mea e aunoa ma le manatu i lona aafiaga i le sosaiete po o isi. O lo‘u faamoemoega e le o le talanoa e uiga i lena faauigaga, ae e taulai atu i le uiga o le faaaogaaga o le upu ma lona aoga mo i tatou.
O le malosiaga e talia ai e faaaoga e faamatalaina ai le fesuiaiga e taliaina mai se tulaga faatonuina ua tusia. I se vaega ua fausia, o le malosiaga e talia ai atonu e faamaoti mai e lima inisi le umi (13 cm), e faaopoopo pe toese ai se tasi vae afe o se inisi (0.0025 sm). O se isi vaega atonu e tusia e faia mai se mea faapitoa e 99.9 pasene le mama, e pei o poloka auro. Ua faatulaga e le Alii le faapalepale ina ia fesoasoani ia i tatou e agavaa ai mo le faaeaga.
Tulaga Faatonuina ma le Faamasinoga
O tulaga faatonuina mo le faaolataga ua ta‘ua o poloaiga, ia ua tuuina mai e lo tatou Tama oi le Lagi. O nei tulaga faatonuina e faatatau i vaega uma o o tatou olaga ma i taimi uma. E le faasolosolo le faaaogaina i se taimi faapitoa po o se tulaga faapitoa. O poloaiga e faamatalaina le faapalepale e manaomia e agavaa ai mo le faaeaga.
O loo i ai se faamasinoga e faapea, i se tulaga, e pei o le faagasologa o le faamaoniga mo se vaega o le vaalele. E pei lava ona i ai ni suega mo le agavaa mo vaega o le vaalele, o lo tatou Tama oi le Lagi o loo i ai le faamasinoga e iloa ai pe o le a faamaonia i tatou. O se faamanuiaga mo i tatou le iloa ma ausia tulaga faatonuina o loo i totonu o le malosiaga e talia ua faatulagaina e le Alii.
O le a e manatua sa valaaulia taupou e toasefulu i le faataoto a le Faaola i le tausamaaga o le faaipoipoga. Ina ua taunuu atu le alii faaipoipo, o le toalima sa i ai suauu ma sa mafai ona ulufale i totonu. O le isi toalima na tuai mai ma sa le mafai ona ulufale atu. (Tagai i le Mataio 25:1–13.)
E faatatau i lenei faataoto, na saunoa mai Elder Dallin H. Oaks o le Korama a Aposetolo e Toasefululua: “O le matua taufaamata’u lava o le savali o lenei faataoto. O taupou e toasefulu, e faasino i tagata o le ekalesia a Keriso, aua sa valaaulia uma lava i le tausamaaga o le faaipoipoga, ma sa iloa foi e tagata uma mea sa manaomia, ina ia mafai ai ona ulufale atu pe a sau le faatoafaiava. Ae sa na o le afa o i latou sa saunia ina ua sau o ia.”1
O taupou muamua e toalima na ausia le tulaga faatonuina, ma e tatau foi ona tatou faapena.
Na foafoa e le Atua i tatou i Lona lava faatusa. O le fuafuaga mo i tatou i lenei lalolagi o le mauaina o se tino, maua le poto masani, maua sauniga, ma tumau e oo i le iuga. O tulaga faatonuina ua faatuina ma o le faapalepale ua faataatitia e tatau ona tatou ola ai ina ia agavaa mo le faaeaga. Ua folafola mai e le Atua, e mafai ona faaeaina i tatou, ae ua Ia fetalai foi, “O Aʼu, o le Alii, e noatia aʼu pe a outou faia mea Ou te fai atu ai; ae a outou lē faia mea Ou te fai atu ai, e leai se folafolaga mo outou.” (MF&F 82:10).
Tulaga Faatonuina ma le Faitalia
I le fuafuaga a le Atua o le faaolataga, ua mamanuina i tatou, faatulagaina, ma faalamolemoleina ina ia avea faapei o Ia. O se mea e tatau ia i tatou taitoatasi ona oo i ai faaletagata lava ia.
“Aua faauta, o laʼu agaluega ma loʼu mamalu lenei—ia aumaia le tino ola pea ma le ola faavavau o le tagata” (Mose 1:39).
Ua faatuina e le Atua mea e tatau ona tatou faia ma tulaga faatonuina e tatau ona tatou ausia. O se mea e mataina le matagofie e faapea, e Na te tuuina mai ia i tatou le filifiliga saoloto e filifili ai pe talia ma ausia na tulaga faatonuina. Ae peitai, o loo i ai taunuuga o a tatou filifiliga. Na ia tuuina mai ia i tatou le faitalia, ae Na te lei tuuina mai ia i tatou le pule e suia ai tulaga faatonuina po o taunuuga o a tatou filifiliga.
Ona o loo i ai tulaga faatonuina ma o loo i ai lo tatou faitalia e filifili ai, o loo i ai se Faamasinoga Mulimuli, i le taimi lea o i tatou taitoatasi o le a iloiloina e iloa ai pe tatou te ausia tulaga faatonuina—i se isi faaupuga, e iloa ai pe na tatou ola ai i totonu o tulaga faatonuina ma malosiaga e talia ai ua tusia e le Atua. O Lana faamasinoga o le iuga lea.
O le aoaoga faavae o le salamo e faatagaina ai i tatou ina ia faasa‘o pe foia le faaletonu, ae e sili atu ona lelei le taulai atu i tulaga faatonuina a le Atua nai lo le fuafua e faaaoga le mataupu faavae o le salamo a o lei oo i le Faamasinoga. Sa ou aoaoina lenei lesona a o ou laitiiti.
A o talavou sa ou faaaluina o‘u taimi o le taumafanafana e galue ai i le faatoaga a lo’u tamamatua i Wyoming, ISA. O se lafumanu o mamoe ma povi e sili atu ma le 2,000 eka (810 ha), ma isi laufanua faaopoopo. O le faatoaga lafumanu na manaomia ai le tele o meafaigaluega. Ona o le nofoaga autu mo mea e lipea e sili ona latalata e matuai mamao ese lava, na aoaoina i matou e tamamatua ia tausisia ma le faaeteete meafaigaluega ma siaki le tulaga o mea uma ae matou te lei tuua le fale o le faatoaga. Afai matou te oo i se tulaga faaletonu, sa masani lava o ni maila le mamao mai le fale o le faatoaga, ma o lona uiga o se savaliga umi.
E lei umi se taimi mo au e aoaoina ai le tulafono o taunuuga. Sa sili atu lava le aloese mai faafitauli nai lo le faia o se savaliga umi. E faapena foi i poloaiga a lo tatou Tama Faalelagi. E mafai ona Ia silafia le eseesega i le va o se tasi o loo taumafai moni ia avea faapei o Ia ma se tagata o loo tulei le pito ae taumafai e tumau ai i totonu o le mea e faatagaina.
Tulaga Faatonuina ma le Faafeagai
O loo i ai i latou i le lalolagi i aso nei o loo taumafai e aveese pe suia tulaga faatonuina ua faatuina e le Atua. E le o se mea e ofo ai lenei mea.
“Oi talofa i e latou te taʼu le leaga o le lelei, ma le lelei o le leaga, i e e fai lepouliuli ma malamalama, ma le malamalama ma pouliuli, i e e fai le mea oona ma mea suamalie, ma mea suamalie ma mea oona!” (2 Nifae 15:20).
E le tatau ona faaseseina i tatou po o le faalogo atu ia i latou o le a taumafai e faatalitonu i tatou ua suia ia tulaga faatonuina o le Atua. E leai se pule ia i latou e sui ai tulaga faatonuina. Ua na o Le na faia le mamanu, o le Tama Faalelagi, e mafai ona suia tulaga ua tusia.
O i tatou uma e faigofie ona iloa le faavalevalea tele pe a faalogo atu le e saunia vaega o le vaalele i ni tagata e le malamalama o loo taumafai e faia ni suiga i tulaga tusitusia po o le malosiaga o se vaega. O le a leai se tasi o i tatou e manao e lele i se vaalele e fausia i ni vaega faapena.
Ata na tusia e Thomas Lammeyer/Hemera/Thinkstock
E faapena foi, e leai se tasi o le a tuuaia se gaosi vaalele i le le manatunatu lelei po o le le faapalepale pe a ia teena na vaega. O le a le faatagaina e le gaosi vaalele o ia lava e faafefeina pe sauaina ina ia taliaina ni vaega e lē faamaonia. O le faia o lena mea o le a lamatia ai lana pisinisi ma olaga o le pasese e ono felelei i ana vaalele.
E faapena foi i tulafono ma poloaiga a le Atua. E tumau Ona tulaga faatonuina, ma e leai se tasi e mafai ona suia. O tagata e manatu latou te mafaia o le a matuai faateia lava i le Faamasinoga Mulimuli.
Ausiaina o Tulaga Faatonuina
O lo tatou Tama Faalelagi na faia le mamanu o le fuafuaga o le faaolataga. Ua Ia faatulagaina lelei mea uma e manaomia mo i tatou ina ia agavaa e toe foi atu i Lona afioaga. O tulaga faatonuina ua faatuina, faailoa, ma e faigofie ona maua e i tatou taitoatasi.
Ua ta‘u mai e le Faaola ia i tatou o i tatou uma lava e mafai ona ausia tulaga faatonuina. O le Upu o le Poto o se faamaoniga o lenei mea, ua ta‘u mai ai e “Ua tuuina mai o se mataupu autu faatasi ma se folafolaga, ua fuafua i le malosi o lē ua vaivai ma lē ua sili atu ona vaivai o leau paia atoa, o e ua taua pe mafai ona taua o le au paia” (MF&F 89:3; faaopoopo le faamamafa).
Ua aoao mai foi le Faaola o le a tatou “lē faaosoosoina [i tatou] e sili atu i luga o le mea e mafai ona [tatou] gafatia” (MF&F 64:20), ae e tatau ona tatou “mataala ma tatalo e le aunoa” (Alema 13:28).
O loo ia te outou le mana: “Aua ua i totonu ia te [outou] le mana, lea ua [outou] pule ai ia te [outou] lava. O le a lava le tulaga e oo i ai le faiga e tagata o mea lelei, o le a leai lava se ala o le a aveesea ai lo latou taui” (MF&F 58:28).
E mafai ona e ausia tulaga faatonuina ma le faapalepale. E i ai lou tomai e agavaa ai mo le faaeaga.
Taitaiga mai le Agaga Paia
Tatou te maua tulaga faatonuina e ala i le auai i le lotu ma le suesue ma faatinoina aoaoga faavae e maua i tusitusiga paia ma upu a perofeta o aso nei.
O le puna sili o le taitaiga o le uunaiga e oo mai i le Agaga Paia, lea o le a aoaoina i tatou i mea uma e tatau ona tatou faia (tagai i le 2 Nifae 32:2–3). Faatasi ai ma le fesoasoani a le Agaga Paia ma le Malamalama o Keriso (tagai i le Moronae 7:16–18), e mafai ona tatou iloa le sa‘o ma le sese. E mafai ona taialaina i tatou i o tatou olaga atoa. E mafai ona tatou lagonaina i o tatou loto ma manatu e oo mai i o tatou mafaufau ia e mafai ona tuuina mai le faamafanafanaga ma le taitaiga. E moni lenei mea e oo lava i le fanau.
Ua folafola mai e le Atua o le a Ia fesoasoani ia i tatou a o tatou taumafai e ausia Ona tulaga faatonuina. E pei lava ona tatou le naunau e felelei i se vaalele e gaosia mai i vaega e le lelei, e le tatau ona tatou taliaina pe faataitai i amioga e le lelei. E na o le iloaina, malamalama, ma le ola ai i aoaoga faavae a Keriso e mafai ai ona tatou agavaa mo le faaeaga.