O Fea Lau Lotu?
Dee Jepson, Idaho, ISA
I le taimi o o‘u tausaga i le militeli, o nisi taimi o se luitau le sueina o se falesa o Le Au Paia o Aso e Gata Ai. I se faaaliga laitiiti, sa ou mafai ona maua au lava i se aai fou po o se atunuu fou foi.
I se tasi Aso Sa sa ou maua au lava i Amsterdam, Holani. I le 8:30 i le taeao na faafuasei ona fofogaina mai e lo matou taitai ua fai lo matou aso malolo. Ua uma ona fai toniga, sa ou tauanauina se uo e momoli i le lotu. I lana taavale totogi, sa fai ai le ma talanoaga lenei:
Uo: “O fea la lau lotu?”
Au: “Ou te le iloa ona ou te lei sau muamua lava i lenei aai. Ae afai e mafai ona tatou oo atu i le nofoaga autu o le aai i le kuata i le iva, e mafai ona tatou maua ai.”
Uo: “Aisea? O le a le mea e tupu i le kuata i le iva?”
Au: “O le taimi lena o le a tatou vaaia ai faifeautalai Mamona ua agai atu i le falesa.”
Uo: “Faapea a au na e fai mai e te lei i ai iinei muamua?”
Au: “Ou te le‘i i ai.”
Uo: “E faapefea la ona e iloa e i ai se falesa iinei?”
Au: “O loo i ai lava se falesa iinei ma ni faifeautalai Mamona.”
Uo: “Ua lelei, o lea ua tatou i ai i le nofoaga autu o le aai. Ua kuata i le iva, ma ou te leo vaai i ni faifeautalai.”
Au: “A lae ua o mai.”
Uo: “Fea? O lau tala o tamai tagata na e mamao a i o o loo kolosi le auala? E matuai le mafai lava ona tatou iloa atu po o ai i latou mai iinei.”
Ina ua matou maua atu faifeautalai, sa ou oso ese mai le taavale ma faia se talanoaga fiafia ma ia i latou, faatalofa, talasua, talie, ma ataata.
Au: “Faafetai mo le momoliina mai o au.”
Uo: “Faapea a au na e fai mai e te le iloaina na alii?”
Au: “Ou te le iloa. Faatoa matou feiloai.”
Uo: “E le talanoa faapena tagata sei vagana latou te iloa lelei e le tasi le isi.”
Au: “O le a ou faamalamalama atu i se taimi.”
Uo: “Ou te le mautinoa e mafai ona ou toe maua lenei nofoaga, ma e te lei tau maia le taimi e toe piki ai oe.”
Au: “O sauniga e tolu itula. Ona valaaulia lea o a‘u e se aiga mo le toonai. A uma ona matou aai ma talanoa mo se taimi, o le a latou momoli atu au i le laumua.”
Uo: “E te le iloa o le a valaaulia oe e se tagata e toonai ma toe momoli atu oe.”
Sa ou faamautinoa atu ia te ia o le a lelei le tausiga o au ma ou toe faafetai atu ia te ia.
Sa musuia sauniga. Sa ou taliaina le tagata muamua o le toatolu na valaaulia au e toonai. I le taimi o le toonai sa matou faia se talatalanoaga faagaeetia e uiga i le tuputupu ae o le Ekalesia i Holani.
Ua faamanuiaina a‘u i le mauaina o tagata o le Ekalesia i le tele o taimi o lo’u olaga. O nisi taimi matou te feiloai i maota tautupu, ma o nisi taimi i fale faatauvaa. O nisi taimi matou te feiloai i faleie tuufua, ma le pefua. O nisi taimi matou te feiloai i falelotu o falemai. O nisi taimi matou te feiloai ai i ni faleie tetele po o fafo i lalo o le lagi.
Po o fea lava matou te feiloai ai, ou te fiafia lava i taimi uma sa ou faia se taumafaiga e saili le Ekalesia. Aua e pei ona fetalai mai le Alii, “Aua o le mea ua faapotopoto ai se toalua po o se toatolu i lo‘u igoa, ou te i ai faatasi ma i latou” (Mataio 18:20).
“Afai e mafai ona tatou oo atu i le nofoaga autu o le aai i le kuata i le iva,” sa ou fai atu ai i la‘u uo, “e mafai ona tatou maua se falesa.”