O Tatou Aiga, O Tatou Auaiga
O Se Toe Faatasiga Mamalu
O tusitala e alala i Iuta, ISA, ma sa auauna atu i le Misiona a Ghana Accra.
O le tele o tausaga o le nonofo valavala ma le lototiga na uma ina ua aumaia e le Alii se tama ma se atalii faatasi i le malumalu.
O se taeao matagofie ia Aperila 2012 ina ua ulufale atu ia John Ekow-Mensah i totonu o le Malumalu o Accra Ghana. O le uso matua, o lenei ua i lona 80 tausaga, na faimalaga mai ma se vaega o le Au Paia mai Nkawkaw, lea sa nofo ai na o ia. Sa fuafuaina e le vaega e nonofo i le po i ni potu lata ane mo tagata o le malumalu ma faaalu aso e lua e auauna atu ai i le malumalu.
A o nofonofo i totonu o le malumalu, sa faatalitali Uso Ekow-Mensah ina ia auai i sauniga amata ae nofo ane i ona tafatafa se alii e laitiiti ia te ia. O le alii e laitiiti ia te ia, e 54 tausaga, sa fuafua e o i se sauniga o le faaeega paia ma lona faletua i lena taeao ae, na tuai ona taunuu mo lena sauniga, sa ia filifili ai e fai ni sauniga amata.
“O fea e te sau ai?” O le fesili lea a uso Ekow-Mensah.
“Sekondi,” o le tali lea a le alii.
“O le fea vaega o Sekondi?” O le fesili lea a Uso Ekow-Mensah.
“Ketan,” o le tali lea a le alii e laitiiti ia te ia, “i le eria o loo i ai aoga.” A o faaauau le talanoaga, na lagonaina e alii uma e lua le mea e ono taunuu i ai nei fesili.
I le uunaia e se lagona faateleina o le iloaina o le isi, na tilotilo atu le alii laitiiti ia Uso Ekow-Mensah. “O oe o lo‘u tama,” na ia faailoa mai. “O ai lou igoa?”
“John Ekow-Mensah.”
“O lo‘u igoa foi lena,” o le tali lea a le atalii.
Ata na tusia e Brian Call; ata pue mai faaaloaloga a tusitala
Ina ua uma ona auauna atu i le malumalu, sa nonofo alii e toalua mo se taimi umi i le potu selesitila, ma toe fesootai o la olaga ma toe faaolaolaina lo la alofa. E ui o mea uma sa fai mai ai ma faia e Uso Ekow-Mensah le Itiiti. na faaaloalo ma talafeagai, sa foliga mai sa lei saunia lelei o ia e taliaina ma le loto atoa lona tama—seia oo ina ia iloaina pe aisea na tuua ai ma pe aisea na le mafai ai ona faafesootai mai lona tama i lona aiga.
Toeitiiti atoa le 50 tausaga talu ai, na faaipoipo ai Uso Ekow-Mensah le Matua i se tamaitai e ona le tinamatua—le tina e aupito matua i lena taimi—na pule aoao i la latou ituaiga. O le mea e faanoanoa ai, na tetee le tina pule i le faaipoipoga a John i lana tama. I lana[tamaitai] faatauanau na iu lava ina tetea le ulugalii ina ua faatoa atoa le fa po o le lima tausaga o le la tama matua, o John le Itiiti. Sa iloa e John le Itiiti. lona tinamatua o se tamaitai malosi, ma galue malosi, ae le o le mana lea na aveesea mai ai ia te ia fesootaiga uma ma lona tama moni mo le toeitiiti atoa le 50 tausaga.
O le vavae ese mai le aiga na motusia uma ai sootaga. Ona o le leai o ni telefoni po o auaunaga i le meli, sa leai se auala e fesootai ai John le Matua ma lona aiga. O lana sailiga mo se galuega na aveese mamao atu ai o ia. Sa nofo o ia i Mankessim pe tusa o le 1963 i le 1989, lea sa ia faia ai se tamai faleoloa vali. Mai iina sa ia siitia atu i Ada, lea na faailoa atu ai o ia i le talalelei a Iesu Keriso e se tamaitai na ia valiina lona fale. Na auai Uso Ekow-Mensah le Matua i le 1991 i le Ekalesia.
Ona o Uso Ekow-Mensah le Itiiti. sa laitiiti tele ina ua tatala le faaipoipoga a ona matua, na te le malamalama tele i lona tupuaga. O nisi taimi e fai mai ai lona tina o ia o se “kopi maoi” o lona tama, ae na o le pau lena o lona malamalama.
Ina ua ia tuputupu ae ma faaipoipo, o John ma lona faletua o, Tepora, na filifili e sue se ekalesia e mafai ona la auai. Sa i ai John i le Iunivesite o Ghana i Accra ina ua ia vaai i se mekasini o le Liahona i luga o se fata. Sa ia pikiina i luga ma sa fiafia tele i mea na tau mai ai. Na matauina e John le na lolomiina: O Le Ekalesia a Iesu Keriso o le Au Paia o Aso e Gata Ai.
Ina ua foi mai John mai le aoga i lona aiga i Sekondi, sa naunau mai lona toalua e ta‘u atu ia te ia se ekalesia sa ia aoaoina mai i se uo. Sa ia ta’u atu ia te ia o le igoa o Le Ekalesia a Iesu Keriso o le Au Paia o Aso e Gata Ai. Sa tau atu e John o le ekalesia lea sa ia faitau i ai i se mekasini i le iunivesite.
Sa aoaoina atu le talalelei ia John ma Tepora ma papatisoina i le 1999. I le sefulu tausaga mulimuli ane, sa faamauina i latou i le Malumalu o Accra Ghana, ma o le toatolu e sili ona laitiiti o le la fanau e toalima sa faamauina ia i laua.
Ma i le malumalu ia Aperila i le 2012, na maligi loimata a o iloaina e le tama ma le atalii le tasi ma le isi. Sa faateteleina lo la olioli i lo la malamalama faapea sa eseese auala na la auai ai i le Ekalesia ma maua lo la ala i le malumalu i lena taeao matagofie.
Tama ma le atalii, na toe faatasia i le malumalu ina ua mavae le toeitiiti 50 tausaga o le nonofo valavala.