E Mafai ona ou Maua se Tusi a Mamona?

Joni Hilton, Kalefonia, ISA

Illustration depicting an open purse and its scattered contents.

Sa ou lauina i lalo mea mai i lau ato, ma sa i ai iina i le pito i lalo faatasi ma lau pepa o le nofoa, se lomiga o le Ensign.

A o ou ulufale atu i le malae vaalele agai i le fale mai se asiasiga i ni uo ua leva, sa ou lagonaina le lotovaivai ou te lei faasoa atu le talalelei i lenei malaga. Sa ou tauaveina lava i taimi uma se Tusi a Mamona i la‘u ato ina ia faamanatu ai ia te a’u e tatalo mo se tasi e mafai ona ou tuuina atu i ai, ae o le tele o taimi e tumau ai i la‘u ato. O lenei malaga sa misi ai foi.

Sa ou manava loloa ma fai se tatalo o le faatoesega le leoa. Sa lagona lou pei o se tagata lotu faifeautalai leaga.

A o ou faaofiofi atu i le laina o le saogalemu, sa uunaia au e talanoa atu i le fafine sa i ou luma. Sa ma talatalanoa i mea ma te o i ai ona eseese ai lea o laina e o i ai. A o ou agai atu i lo‘u faitotoa, e ui i lea, sa ou vaai i le fafine lava lea e tasi. “Oi, talofa,” o lana tala lea. “Lelei ua vaai ia oe!”

Sa ou fesili atu ia te ia i le taimi e alu ese ai lana vaa. “Oi, toe tele ni itula—ua ou vave mai.”

“Ia, sau ta nonofo faatasi!” Na ou fai atu ai.

Sa i ai pea lou 45 minute a o lei ulufale atu i lau vaa, o lea na ma nonofo ai i lo’u faitotoa, ma talanoa e uiga i a ma galuega. Sa ou ta‘ua ai nisi o tusitusiga na ou faia mo le Au Paia o Aso e Gata Ai, ma na faafuasei lava ona ia mata fiafia.

“O oe o se Mamona?” sa ia fesili ai. “Sa ou manao e fia iloa atili e uiga i Mamona. E faapefea ona mafai ona ou maua se kopi o le Tusi a Mamona?”

“Ia,” sa ou fai atu ai, ma tatala la‘u ato, “o loo i ai sau tusi ii.”

“Oi, a‘u e,” o lana tala lea. “Ou te manatu atonu sa tatau ona ta feiloai i le aso.”

O le agaga faafetai sa lolovaia ai lo‘u loto. Ina ua ia fesili mai po o le a le mea e ese ai le Au Paia o Aso e Gata Ai mai isi lotu, sa ou lagonaina le taialaina i le tala e fai atu.

Sa ou fai atu o le a ou tau atu i faifeautalai e faafesootai o ia, ona valaau mai lea o lau vaa. Sa ou tatalaina la‘u ato ina ia maua la’u pepa o le nofoa ae sa le mafai ona maua. Sa ou lauina i lalo mea mai i lau ato. O iina, i le pito i lalo faatasi ai ma le pepa, sa i ai se lomiga o le konafesi aoao o le Ensign! Sa ou tuu atu ia te ia ma faafetai atu i le Alii na tatau ona ou sueina la‘u pepa o le nofoa. Sa ia ta‘ua e masani lava ona ia aumaia ni tusi e faitauina faatasi ma ia ae na ia lagonaina na le tatau i le taimi lenei.

“Atonu ina ia mafai ona ou faitau i lenei tusi,” o lana tala lea. Faatasi ai ma la‘u pepa o le nofoa, na ou opo maia o ia ma faatofa i ai.

O lenei la ua ma talanoa i vaiaso taitasi, ma sa ia ta‘u mai ia te au e uiga i a latou asiasiga faatasi ma tamaitai faifeautalai. Ua atoa nei le tausaga, ma ou te faamoemoe e vaai ia te ia i se aso ua papatiso. Ou te le iloa pe o le a tupu lena mea, ae ou te maofa lava i le galuega a le Tama Faalelagi e fesoasoani ai i o tatou ala e fesootai. Ou te faafetai ia te Ia mo le faafofogaina o la‘u tatalo ma le tuuina mai ia te au o se avanoa faigofie e faasoa atu ai se Tusi a Mamona.